БАЛИГЕ БАРЧУ СУЛУУ БАРБЫ?

«Супер сулуу-2016» сынагынын тандоо туруна ат салышып жаткан акыркы катышуучуларга добушуңузду бериңиз. Добуш берүү сулуулар гезит бетине чыккан жума күнү саат 9:00дөн баштап кийинки аптанын шаршемби күнү саат 15:00гө чейин
SUPER.KG порталы аркылуу жүргүзүлөт. Көп упай чогулткан катышуучу финалга өтөт. Финалда жеңүүчү болгон бийкеч алыскы Индонезияда, океандар кучагында жаткан Бали аралына барып эс алууга жолдомо алат.

ЖАҢЫЛАЙ ТААЛАЙБЕК КЫЗЫ

Жашы – 19
Параметри – 86-63-92
Бою – 167 сантиметр
Салмагы – 56 килограмм
Учурда – Ош мамлекеттик социалдык университетинин медициналык колледжинде 2-курста окуйт

«ФУТБОЛ, ВОЛЕЙБОЛ ОЙНОЙМ»

– Жаңылай, кайсы жердин кызы болосуң?
– Ош облусунун Ноокат районуна караштуу Ак-Булак айылынан болом. Бишкекке каникулга келгем. Бул мүмкүнчүлүктү колдон чыгарбай, сиздер уюштурган сулуулар сынагына катышып, өзүмдү сынап көргүм келди.

– Медицина тармагында билим алып жатыптырсың, жагып жатабы?
– Бул өзүм тандаган кесип эмес. Мен юридикалык факультетке тапшырып, укук коргоочу болгум келген. Ата-энем каршы болуп, алардын каалоосу менен медициналык колледжге тапшыргам. Бирок азыр бул кесипти жакшы көрүп калдым.

– Эркек мүнөз кыздай көрүнөсүң...
– Бул спортко кызыкканымдан болсо керек, волейбол, футболду жакшы ойнойм. Мектепте балдарга кошулуп футбол ойноп, коңшу айылдын балдары менен беттешчүбүз. Ал эми волейбол боюнча мектептин курама командасынын мүчөсү болчумун.

МЕДИНА ЫБЫШЕВА

Жашы – 20
Параметри – 84-66-93
Бою – 169 сантиметр
Салмагы – 55 килограмм
Учурда – Кыргыз улуттук консерваториясынын вокал бөлүмүндө 1-курста окуйт


"ТАСМАГА, КЛИПКЕ ТАРТЫЛГАМ"

– Медина, мурда да сулуулар сынагына катышканыңды айтып калдың...
– "Супер сулуу-2013" сынагынын жеңүүчүсү Орункүл Шабралиева уюштурган "Мисс Краса-2015" сынагына катышып, 2-вице мисс аталгам. Ошол сынактан кийин "Дүйнөнүн топ модели-2015" сынагына катышууга жолдомо алып, каражаттын тартыштыгынан улам бара албай калгам. Азыр бул сынакты жеңип, Бали аралына саякаттагым келип жатат.

– Музыкалык окуу жайда окуганыңа караганда чыгармачылыкка жакын окшойсуң?
– Ата-энем чыгармачыл адамдар. Алардын жолун жолдоп мен да чыгармачылыкты тандап алгам. Буга чейин Мураталы Күрөңкеев атындагы музыкалык окуу жайды артыкчылык менен бүтүргөм. Мурда Курмангазы Азыкбаев жетектеген "Энесай" тобунда флейтада ойночумун. Ошондой эле Геннадий Базаровдун "Ноктюрн" тасмасында эпизоддук ролдо тартылгам, Гүлнур Сатылганованын "Бала – бакыт" клибинде эненин образын жараткам. Учурда кичинекей балдарга бий ийриминен сабак берем.

SUPER.KG порталында жүргүзүлгөн добуш берүүнүн жыйынтыгында Динара 80 добуш алып, финалга чыкты. Ал эми
Санрабига 36 добушка ээ болду.