Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

УБАКТЫЛУУ ӨКМӨТ «АТАМБАЕВ ОТУНБАЕВАДАН КЕЧИРИМ СУРАСЫН» ДЕДИ

№722 02-сентябрь-08-сентябрь, 2016-ж


Конституцияны өзгөртүү аракетинин айланасындагы талаш-тартыш улам күчөп барат. Кыргыз өлкөсү быйыл Эгемендүүлүгүнүн 25 жылдыгын белгиледи. Мамлекет башчы Алмазбек Атамбаев 31-август күнү "Ала-Тоо" аянтында калкка куттуктоо сөзүн сүйлөп жатып дал ушул Баш мыйзамдын тегерегиндеги талаш-тартыш боюнча өз ойлорун айтты. Өзү учурунда мүчө болгон Убактылуу өкмөттү оор кылмыштарга айыптап ачуу сөздөрүн жаадырды... Мындан бир күн мурун, 30-августта Убактылуу өкмөттүн мүчөлөрү Баш мыйзамга өзгөртүү киргизүүгө каршы экенин билдиришип, президентке жана парламентке кайрылуу жолдошкон болчу.

АТАМБАЕВДИ ТААРЫНТКАН УБАКТЫЛУУ ӨКМӨТТҮН КАЙРЫЛУУСУ

Убактылуу өкмөт мүчөлөрүнүн кайрылуусу жалпы коомчулукка, ар бир кыргыз жаранына, эң ириде бир кезде бакиевдик авторитардык бийликке каршы бирге күрөшкөн, буга чейин Конституцияны коргоп келип, бийликтен кетерине бир жыл калганда "Баш мыйзамга өзгөртүү киргизүү керек" деп позициясын өзгөрткөн президент Атамбаевге да жолдонгон эле.
"Биз парламенттик республика курабыз деп жарыя кылганбыз. Бул жалпы коомдук келишим болгон. Мекендештерибиз өз ишеними менен жаңы конституциялык түзүмдүн жана парламенттик системдин легитимдүүлүгүн камсыз кылышкан... Алты жыл өткөндөн кийин биздин Конституциянын артыкчылыктарына күбө болуп турабыз. Учурунда мамлекетке туруктуулук берген, бир топ жыл алдыга карай бийик дөөлөттөргө негиз болуп калган мындай документ менен сыймыктансак да болот. Ошондуктан биз Конституцияга өзгөртүү киргизүү демилгесинин процедурасына гана эмес, анын ички мазмунуна дагы каршы экенибизди билдиребиз...
Президентти, Жогорку Кеңештин депутаттарын 2020-жылга чейин Конституцияны өзгөртүүдөн баш тартууга чакырабыз. Учурдагы Конституцияны өзгөртүү 2020-жылдын 1-сентябрынан кийин гана мүмкүн.
Биз Кыргызстан элин аракеттеги Конституциянын кол тийгистигин 2020-жылга чейин коргоого жана өлкөдө авторитардык режимдин калыбына келишин токтотууга чакырабыз",- деп жазылат Убактылуу өкмөттүн мүчөлөрүнүн кайрылуусунда. Кайрылууга Роза Отунбаева, Өмүрбек Текебаев, Азимбек Бекназаров, Эмилбек Каптагаев, Кеңешбек Дүйшөбаев, Исмаил Исаков, Болот Шер жана Элмира Ибраимова кол койгон. Буга чейин Конституцияны шашылыш өзгөртүүгө каршы чыгып жаткан Темир Сариев кол койгондордун арасында көрүнбөйт.

УБАКТЫЛУУ ӨКМӨТТҮН КУРАМЫНДА КИМДЕР БОЛГОН?

7-апрелде Бакиевдин бийлиги кулатылып, 8-апрелде Элдик курултайдын Борбордук комитетинин мүчөлөрү тарабынан Убактылуу өкмөт түзүлгөн. Убактылуу өкмөттүн төрайымы болуп Роза Отунбаева дайындалып, ал өкмөт бир эле учурда президенттин да, парламенттин да милдетин аткармак болгон. Элге кайрылуусунда Роза Отунбаева Убактылуу өкмөт жарым жыл ичинде алдыга коюлган негизги максаттарды, алсак, Баш мыйзамга өзгөртүү киргизип, жаңы парламентти шайлоого шарт түзүү жана башка иштерди аркалай тургандыгын билдирген.

  • Убактылуу өкмөттүн төрайымы – Роза Отунбаева;
  • Экономика боюнча орун басары – Алмазбек Атамбаев;
  • Финансы боюнча орун басары – Темир Сариев;
  • Конституциялык реформа боюнча орун басары – Өмүрбек Текебаев;
  • Прокуратура жана сот иштери боюнча орун басары – Азимбек Бекназаров;
  • Убактылуу өкмөттүн аппарат жетекчиси – Эмилбек Каптагаев;
  • Ички иштер министри – Болот Шер;
  • УКМКнын төрагасы – Кеңешбек Дүйшөбаев;
  • Саламаттыкты сактоо министри – Дамира Ниязалиева;
  • Өзгөчө кырдаалдар боюнча министри – Дүйшөнкул Чотонов;
  • Коргоо министри – Исмаил Исаков;
  • Финансы полициясынын төрагасы – Эркин Бөлөкбаев;
  • Бишкек шаарынын мэри – Иса Өмүркулов;
  • Айлана-чөйрөнү коргоо жана токой чарбасы боюнча мамлекеттик агенттиктин директору – Топчубек Тургуналиев;
  • Социалдык тармак, коомчулук жана ЖМК менен байланыш боюнча координатору – Элмира Ибраимова.

ОТУНБАЕВА АТАМБАЕВДИН СӨЗҮНӨ КАРШЫЛЫК БИЛДИРИП АЯНТТАН БАСЫП КЕТТИ

Кыязы бул кайрылуу президент Атамбаевдин талуу жерине тийгендей. Анткени 31-август күнү ал калың элдин алдында куттуктоого эч эле коошпогон сөздөрдү сүйлөп турду... Көпчүлүктүн көңүлүн бурган-бул ажо Атамбаевдин Убактылуу өкмөт мүчөлөрүнө карата айткан пикири болду.
"2010-жылкы референдумда биз Роза Отунбаеваны мамлекет башчы катары легалдаштырдык. Жана ошол кезде бул туура кадам болгон, себеби эч ким "убактылуулар" менен иштешкиси келбей жаткан. Эч ким!
Ошондуктан мен башынан эле, 2010-жылдын 7синен 8-апрелге караган түнү алгачкы жолугуубузда Убактылуу өкмөттүн түзүлүшүнө жана Конституциянын шашылыш кабыл алынышына каршы болгом. Анткени парламент Отунбаеваны спикер кылып шайлоого даяр болчу (ред. парламенттин көп бөлүгүн анда "ак жолчулар" түзчү), анда ал автоматтык түрдө Кыргыз Республикасынын Президентинин милдетин аткаруучу болуп калмак. Биз легитимдүү жол менен бара алмакпыз. Балким, ал жолдо кан аз төгүлөр беле?.."- президент мына ушул сындуу сөздөрдү берилүү менен сүйлөп жатканда анын аркасында экс-президент Роза Исаковна Бишкек мэри Албек Ибраимов, өкмөт башчы Сооронбай Жээнбековдун жанында турган. Президент: "Эгер сиз унутуп калган болсоңуз, парламент жыйында сиздин оозуңузду жап кылганы биздин эсибизде!"- деп трибунадан конок катары чакырылган Роза Отунбаеванын дарегине түркүн сөздөрүн жаадырып киргенде, Роза Исаковна ошончо элдин, чиновниктердин көзүнчө ажонун сөзүнө каршылык ишаратын билдирип, далысын сала трибунадан басып кетти. Экс-президенттин бул кадамын түз эфирде бүткүл кыргыз көрүп турду.

 

АЖО ОПУЗАЛООГО ӨТТҮБҮ?

Алмазбек Атамбаевдин койлорго карата өзгөчө мамилеси бардыгы байкалат. Буга чейин эл "нарындыктар, силер койсуңар" деди", "жок, ал сөздү монтаждап жасап коюшту" деп ажонун сөзүнүн аныгына жетпей талкуулап келишкен. Бул куттуктоо сөзүндө да койлор менен теке тууралуу икая айтып "кыргыздар текелерди ээрчий турган кой эмес" деп кимгедир кыжынып алды. Президент буга катар: "Кыргыздын байлыгын, кыргыздын жерин ким сатканы ачылат! Ачылып башталды. Мародёрлук да ачылат. Банк ячейкаларын тономой да ачылат. Кадыржан Батыровду ким үгүттөгөн, ким качырганы да ачылат",- деп эл алдында сөзүн улады.
Президент Атамбаевдин бул сөздөрү түрдүүчө талданууда. Экс-депутат Равшан Жээнбеков: "Мындай сөздөрү менен президент Атамбаев ага кыйшаюусуз баш ийген укук коргоо органдарына түз жана кыйыр түрдө "эмнеси болсо да Отунбаева, Текебаев, Бекназаров, Сариевге иш козгогула" деген буйрук берди. Бул жаңы ажыдаардын коркунучтуу жана эң туура эмес буйругу!"- деп өзүнүн Фейсбук баракчасы аркылуу ой бөлүштү.

Өмүрбек Текебаев: "АКАЕВ ДА, БАКИЕВ ДА КОНСТИТУЦИЯЛЫК РЕФОРМА ЖҮРГҮЗГӨН. АЛАР КАЙДА?.."

Алмазбек Атамбаевдин мындай билдирүүлөрү боюнча Өмүрбек Текебаев өз комментарийин мындайча берди: "Биздин мамлекет башчыбыз Атамбаев элди бириктирип, шыктандыргандын ордуна бөлүп-жарганга, тарыхыбызды сыйлап, андан сабак алгандан көрө кечээки тарыхты өзүнүн жеке кызыкчылыгына бурмалаганга аракет кылып, эл алдында өзүнүн гана эмес, өлкөнүн да абийирин төктү. Эгер өзү эле уят болсо, ал өзүнүн иши деп коёт элек. Бул анын өзүнүн иши эмес, жалпыбыздын ишибиз. Ошон үчүн бүгүнкү күн биздин тарыхыбызда эң жаман күндөрдөн болуп калды деп ойлойм. Атамбаев өчөшүп, "мен конституциялык реформаны жүргүзөм эле, жүргүзөм" деп эл алдында кайра-кайра эле ант берип жатат. Мейли, жүргүзсүн. Бакиев да, Акаев да жүргүзгөн, алар каякта?.."- деди.
Буга катар ал: "Роза Исаковнанын орду дүйнөлүк деңгээлде. Мен жоопкерчилик менен айта алам, ал эң биринчи кезекте эркектер даабай жатканда жоопкерчиликти өзүнө алды. Алмазбек Атамбаев, Азимбек Бекназаров жана мен да жоопкерчиликти ала албай турганда Роза Исаковна жоопкерчиликти өзүнө алды. Баарыбыз угуп, сыйлап, Убактылуу өкмөттүн төрайымы, кийин өткөөл мезгилдин президенти кылып тандап алдык. Эл билип, Конституцияга жана Роза Исаковнага өткөөл мезгилдин гаранты катары добуш берди.
Отунбаеванын эмгегин кыргыз эли эле эмес, бүтүндөй дүйнө билет. Ал президенттиктен кеткенине 5 жыл болсо дагы өкмөттөн бир тыйын албай, республиканы кыдырып, пайдалуу иштерди жасап жүрөт. Атамбаев да эртең кетет. Ал Отунбаева жасаган иштин 1 пайызын да жасай албайт. Ал үчүн билим, авторитет, анан чын дилден элдин тагдыры үчүн күйүш керек. Атамбаев эртең эмне кылат? Өзү айтты "мен чарчадым, уктайм, пианино ойнойм" деп. Мына, өзүнө берген баасы. 1 жыл дагы өтөт, уктасын, абдан катуу уктасын",- деп билдирди.

Тынар Курбаналиев: "МЕНИН ИНТЕРМЕДИЯМДЫ АЯНТТА БИРӨӨ АТКАРЫПТЫР..."

Куудул Тынар Курбаналиев өзүнүн социалдык тармактагы баракчасы аркылуу: "Урматтуу достор, баарыңарды Эгемендүүлүктүн 25 жылдыгы менен куттуктайм, анан бүгүн "Ала-Тоо" аянтында мен ойногон интермедияны бирөө кайталады дейт, укпадыңарбы?"- деп жазып чыкты. Куудулдун бул билдирүүсүн интернет колдонуучулары байма-бай бөлүшүп жатышты.
Ушул эле күнү Убактылуу өкмөттүн мүчөлөрү билдирүү таратышты. Анда алар президент Атамбаевдин аны түз мааниде айтканда колунан бийликке жетелеп келген Роза Отунбаевага жана 2010-жылдагы референдум боюнча айткан сөздөрүнө нааразычылык билдиришип: "Бул мамлекет башчысын мындай кой, өзүн жигитмин деп эсептеген ар бир адам жасабай турган жорук",- дешти. Муну менен кошо Убактылуу өкмөт мүчөлөрү президенттин экс-президент Роза Отунбаевадан расмий түрдө кечирим сурашын талап кылышты.
Ошону менен президент Атамбаев авторитардык режим менен чогуу күрөшүп, революцияны чогуу ишке ашырышкан санаалаштарынан терс бурулду. Коомчулук эми саясий абал курчуй турганынан шек санабай турат.

Мирлан Өмүралиев
politika@super.kg


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  -3 
Талкуу жабык.
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21193;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: