Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

АТАМБАЕВ ЖАНА АНЫН ЖАН-ЖӨКӨРЛӨРҮ КАНТИП «ДАСТАНДЫН» МҮЛКТӨРҮН МЕНЧИКТЕШТИРИШКЕН?

№728 14-октябрь-20-октябрь, 2016-ж


2008-жылдын 13-ноябрында Кыргызстан менен Орусиянын ортосунда «Дастан» Трансулуттук корпорациясы (ТУК)» ачык акционердик коомунун (ААК) базасында кыргыз-орус биргелешкен ишканасын түзүү боюнча макулдашууларга кол коюлган. Мындай чечим Орусия президенти Дмитрий Медведевдин Кыргызстанга болгон расмий иш сапары учурунда жарыяланган эле. Жаңы түзүлгөн биргелешкен ишкана көп пайда алып келери, ишкананын акциясынын баасы көтөрүлө тургандыгы, орус тарап ал акцияны сатып алууга даяр экендиги баарына белгилүү болчу. Төмөндө сөз дал ошол дүйнөдөгү уникалдуу, стратегиялык мааниси бар аскер багытындагы заводдун кээ бир объектилери кантип Алмазбек Атамбаев жана анын жан-жөкөрлөрүнүн колуна өтүп кеткендиги туурасында болмокчу.

МАКСИМ БАКИЕВДИН АЯГЫНА ТОЛУК ЧЫКПАЙ КАЛГАН «ОПЕРАЦИЯСЫ»

Атасы Курманбек Бакиевдин жанында жүргөн Максим Бакиев инсайдерлик маалыматтардан кабардар болгондуктан, мындай ыңгайлуу жана пайдалуу учурду колдон чыгарып жибергиси келбей, өзү жана достору менен «Дастан» аркылуу кирешеге ээ болгусу келет. Кыргыз-орус биргелешкен ишканасы түзүлөрүн алдын ала билип Максим Бакиев «Фаберон» ЖЧКсы аркылуу «Дастан» корпорациясынын акциясынын 44,08877 пайызын жана «ТопИнвест» ЖАКсы аркылуу 6,36817 пайызын сатып алып стратегиялык ишкананын 50,5 пайыздык акциясына ээ болуп, «Дастан» ТУК» ААКсынын кожоюну болот. «Дастан» уникалдуу, дүйнөдө аналогу жок торпедаларды жасап чыгаруучу аскер заводдорунун бири. Ошентип Максим Бакиев заводго кожоюн болгон соң досу жана эң ишенген адамы Алексей Ширшовду директорлор кеңешинин төрагасы кылып дайындайт. «Дастанды» орустарга сатардан мурун заводго түздөн-түз тиешеси жок кээ бир ишканаларды өздөрүнө алып койгусу келет. Аламүдүн районунун Кой-Таш айылында 2,7 гектар жерге салынып бүтө элек ден соолукту чыңдоочу комплекс ошолордун бири эле. Максим Бакиевдин бул ою 2008-жылдын 24-декабрында ийгиликтүү ишке ашып, аталган комплекс Д.Гладышев жетектеген «АртСтройДизайн» ЖЧКсына 26 миллион 404 миң 700 сомго сатылат. «АртСтройДизайн» ишканасы Максим Бакиевдин фирмасы болгон. Бул фактыны Максим Бакиевди соттогон сот далилдеген. Келишим боюнча, сатылган комплекстин акчасы 2010-жылдын мартына чейин төлөнүп берилиши керек болгон. Бирок ошол мезгилде өлкөдө түзүлгөн революциялык кырдаалдын натыйжасында келишимде көрсөтүлгөн каражат төлөнбөй калат.

«КЫРГЫЗАВТОМАШТАН» БАРГАН ЖЕТЕКЧИЛЕР, КАЙРАДАН САТЫЛГАН ЖЕР

2010-жылы 7-апрелде болгон элдик революция Максим Бакиев жана анын досторунун ой-максаттарынын быт-чытын чыгарат. Убактылуу өкмөттүн мүчөлөрү декреттин негизинде Максим Бакиевдин мүлктөрүн, анын ичинде «Дастан» трансулуттук корпорациясынын 50,5 пайыздык акциясын улутташтырат. Ошентип мамлекет трансулуттук корпорациянын 98,46 пайыздык акциясынын ээси болуп калат. Убактылуу өкмөттүн кайрылуусу менен Бишкек райондор аралык сотунун 2010-жылдын 20-майдагы чечиминин негизинде Кой-Таш айылында 2,7 гектар жерге курулуп жаткан ден соолукту чыңдоочу комплекс дагы кайрадан «Дастанга», демек, мамлекеттин менчигине кайтарылат.
Убактылуу өкмөт «Дастанды» мамлекетке кайтарган соң ошол кездеги Убактылуу өкмөттүн төрайымынын орун басары жана кийинчерээк премьер-министр катары Алмазбек Атамбаев толугу менен трансулуттук корпорацияны көзөмөлдөп, ишкананын жетекчилигине өзүнүн менчик «Кыргызавтомаш» заводунда иштеп жүргөн жакын адамдарын дайындай баштайт. Мисалы, Атамбаевдин кол алдында көп жылдар бою иштеп, анын заводдогу иштерин такай аткарып жүргөн Албек Ибраимов «Дастан» ачык акционердик коомунун директору болуп дайындалат. Ибраимов кезегинде «Кыргызавтомашта» түрдүү кызматтарда иштөө менен аягында «Автомаш Эко» ЖЧКсында директор кызматын аркалаган. Ал эми башкармалыктын дагы бир мүчөсү, коммерциялык иштер боюнча директору болуп Асылбек Найзабеков дайындалат. Найзабеков да «Кыргызавтомашта» ар кандай кызматтарда иштеп, аягында «Автомаш-энерго» ЖЧКсында башкы директор болуп иштеген, Атамбаевдин жакын адамдарынын бири болгон. Ал эми «Дастандын» директорлор кеңешин «Автомаш-Радиатор» ЖЧКсында башкы директор болуп иштеген Юрий Васильев башкарып калат. Ошентип Атамбаев бул ишкананы премьер-министр катары гана көзөмөлдөбөстөн, өзүнүн кол алдында иштеген адамдарын жетекчиликке коюп, толугу менен түз көзөмөлдөйт. Албек Ибраимов кызматка келген соң Максим Бакиевдин тушунда жасалган иштер кайталана баштайт. Ал «Дастанга» кайтарылган Кой-Таш айылында жайгашкан ден соолукту чыңдоочу комплексти 2012-жылдын 11-апрелинде Анарбек Укуев деген жаранга 22 миллион 537 миң 900 сомго сатат. Ал эми Укуев 2015-жылдын 8-майында аталган комплексти Албек Ибраимовдун аялы Айнура Ибраимовага 24 миллион сомго сатат. Айнура Ибраимова 2015-жылдын 12-майында Алмазбек Атамбаевге 33 миллион сомго сатат.

АЛБЕК ИБРАИМОВ ЖАНА АНАРБЕК УКУЕВ ЖАКЫН ДОСТОРДОНБУ?

Эң кызыгы эми башталат... Жогоруда аты аталган Анарбек Укуев бул чынжырга кокусунан кошулуп калган адам эмес. Ал Албек Ибраимов менен жакшы тааныш. Албек Ибраимов «Дастанга» келерден мурун «Бишкек эркин экономикалык зонасын» башкарып турган. Укуев ал жерде курулуш иштери менен алектенген. Анарбаек Укуев 24.kg агенттигине Албек Ибраимов менен жакын тааныш экендигин айткан. Ошондой эле Ибраимов дагы Укуев менен көп жылдардан берки тааныш экендигин жашырбай айтып келет. Демек, бул достор дагы кадимки Максим Бакиевдин схемасын пайдаланышкан деп түшүнсө болот. Дал ошондогудай эле 2,7 гектарда жайгашкан ден соолукту чыңдоочу комплекс колдон-колго өтүп отуруп, Албек Ибраимовдун мурдагы жана азыркы шефине келип токтогон. Коомчулук бул схеманы жакшы аңдап, түшүнүп калды. Ошентип бул иш-чарада Максим Бакиевдин схемасына окшоп 1-2 адам аркылуу өткөрүлүп, жер тилке президент Алмазбек Атамбаевге багышталган тура деп жыйынтык чыгарууга болот.

«КҮНӨСТҮҮ ЖЭЭК» ПАНСИОНАТЫ ДА КОЙ-ТАШТАГЫ КОМПЛЕКСТЕЙ ЧЫНЫГЫ ЭЭСИН ТАПМАК БЕЛЕ?

Максим Бакиев жана анын достору Кой-Таштагы ден соолукту чыңдоочу комплексти эле эмес, «Дастанга» тиешелүү Ысык-Көлдүн боюнда жайгашкан «Күнөстүү жээк» («Солнечный берег») пансионатын дагы сатып алышат. «Дастан» ишканасы пансионатты 2008-жылдын 26-декабрында ошол эле Д.Гладышев жетектеген «Билдинг Констракшн Групп» ЖЧКсына сатат. Революция болуп, 2010-жылдын 23-июнунда соттун чечими менен «Күнөстүү жээк» пансионатынын акциялары «Дастан» корпорациясына, демек, мамлекетке кайтарылат. Кийинчерээк, пансионат 2013-жылдын 18-февралында Абдыразаков Эркинбек Талипович деген жаранга сатылат. Ал кезде Албек Ибраимов кызматтан көтөрүлүп, президенттин аппаратынын жетекчисинин орун басары кызматында иштеп жаткан. Бирок «Дастандын» директорлор кеңешин дале Юрий Васильев жетектеп турган. Абдыразаков дал Укуев сыяктуу эле арадан убакыт өткөрүп, 2016-жылдын 26-апрелинде аталган пансионатты Бекташева Токтокан Тайлаковна деген жаранга сатат. Эң кызыгы, ал адам Жогорку Кеңештеги КСДП фракциясынын экс-лидери, азыр парламенттин спикери Чыныбай Акуновичке кудагый экен. Ал эми пансионатты Бекташеванын келини, Ч.Турсунбековдун балдызы Гүлдана аттуу айым башкарып келе жатканы айтылууда.Прессада учурунда Максим Бакиев ээлеп алган менчиктерге эми Атамбаевдин жакындары кантип ээлик кылып жаткандыгы жөнүндө чуу чыккандан кийин 2016-жылдын 22-сентябрында аталган пансионат Бекташева Токтокан Тайлаковнадан Буларов Мазур Мелисович аттуу жаранга өттү. Эгерде «Ата Мекен» партиясы Максим Бакиевдин мүлкү Алмазбек Атамбаевге өтүп кеткендиги жөнүндө фактыны коомчулукка жарыялап, шектүү иштин бетин ачпаса, «Күнөстүү жээк» пансионаты дагы Кой-Таштагы комплекс сыяктуу чыныгы ээсин тапмак беле?
«Күнөстүү жээк» пансионатына байланышкан дагы бир маанилүү жагдайга токтолуп кетүү керек. «Дастан» корпорациясы 2010-2013-жылдар аралыгында аталган пансионатка 20 миллион сомдон ашык инвестиция салып, аягында пансионатты жарыбаган акчага саткан. Тактап айтканда, Эркинбек Абдыразаков аталган пансионатты болгону 47 миллион сомго сатып алган. Иш жүзүндө пансионат болгону 27 миллион сомго гана сатылып отурат. Кыргыз Республикасынын Эсептөө палатасынын текшерүүлөрүнүн натыйжасында «Дастан» аталган сатуу-сатып алуу иш-чарасынан 128,4 миллион сомдук жоготууга дуушар болгон. Пансионаттын жайгашкан жери эле 9 гектарды түзөт. Өнүккөн инфраструктурасы бар. Ушулардын баары болгону 47 миллионго бааланып, 128 миллион сомго арзан сатылып кеткен. Пансионаттын өз баасы 175,4 миллион сом экендигин Эсептөө палатасы аныктаган. Элмира Ибраимова Эсептөө палатасынын төрайымдыгынан дал ушул "Дастан" корпорациясын текшерүүлөрдөн улам алынды деген кептер Ак үйдө көшөгө артындагы талкууларда айтылып жүрөт (ред. учурда Эсептөө палатасын буга чейин президенттин жардамчысы, Президенттик аппарат башчысынын биринчи орун басары болуп иштеп келген Улук Марипов жетектөөдө). Ошентип Атамбаевдин жан-жөкөрлөрү пансионатты реалдуу баасынан эселеп арзан баада саткан. Абдыразаков бул сатуу-сатып алуу схемасында Анарбек Укуевдин ролун аткарганын түшүнүү кыйын эмес.

Президент Алмазбек Атамбаев 2016-жылдын 31-августунда Бишкектеги «Ала-Тоо» аянтында Кыргыз Республикасынын Эгемендүүлүгүнүн 25 жылдыгын белгилеп жатканда «мародёрлор табылат!» деп убада берген. Азыр Бакиевдердин менчигин алган адамдарды кыргызда «мародёр» деп билишет. Элдин ушул аныктамасынан алып караганда кимдер мародёр болуп чыгып жатат?..







К.Жунушбаев


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  7 
Талкуу жабык.
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21193;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: