БИР БҮРКҮМ

31-октябрда "Манас" аэропортуна БОМБА коюлган" деген кабар тарап, мындай жалган маалыматты билдирген Бишкектин тургуну Илья Еремеев кармалды. Ал мындай кадамга Москвага кетип жаткан аялын алып калуу максатында барганын айткан.
Жогорку Кеңешке КСДП фракциясынан Нурмухаммед Баяхунов депутат болуп келди. 28-октябрда МЭЭРБЕК МИСКЕНБАЕВ мандатын тапшырган болчу.
Москвадагы басмаканадан чыккан ӨРТТӨН каза болгон кыз-келиндердин үй-бүлөлөрүнө Орусия тараптан 300 миң сомдук акчалай компенсация төлөнүп берилди. Бул тууралуу Мамлекеттик миграция кызматы билдирди.
4-ноябрга чейин Кыргыз өлкөсүндө жүргөн ЧЕТ ӨЛКӨЛҮКТӨР Калкты жана жарандык абалды каттоо департаментинен каттоодон өтүүсү зарыл. Мыйзам бузган чет элдик жаран 10 миң сомго айыпка тартылат.
"АТА МЕКЕН" жана "ЗАМАНДАШ" партиялары 11-декабрда өтүүчү Бишкек шаардык кеңешинин шайлоосуна катышуудан баш тартышты.
10 жашар баланы 1 жылга чукул зордуктап жүргөн сузактык ИМАМ сот тарабынан күнөөлүү деп табылып, 7 жылга эркинен ажыратылды.
ЖОЛ КЫРСЫКТАРЫНДА кайтыш болгондордун 50 пайызында 1-мүнөттөрдө, 30 пайызында 1-саатта, 20 пайызында бир аптада өлүм катталат. Айдоочуларга тез жардам көрсөтүүнү үйрөтүү керек, унаада аптечка болушу шарт. Бул тууралуу Саламаттыкты сактоо министрлиги билдирди.
Өкмөттүн маалыматы боюнча, 28-октябрга карата эң арзан КӨМҮР Чүй облусунда, эң кымбат Баткен облусунда сатылды.
Бишкек шаарында ШАНХАЙ КЫЗМАТТАШТЫК УЮМУНА мүчө мамлекеттердин өкмөт башчыларынын кеңешинин 15-мааракелик саммити өтүп, 12 документке кол коюлду.
Бишкек шаарында 7-ноябрь күнү Kitepfest аталышындагы АДАБИЙ ФЕСТИВАЛЬ өтмөкчү. Иш-чаранын максаты – китеп окуу маданиятын жогорулатуу жана жаштар арасында адабияттарды даңазалоо болуп саналат. Иш-чара Жаштар жумалыгынын алкагында Кыргызстан боюнча өткөрүлмөкчү.
3-ноябрда ЖКнын жыйынында депутат ДАНИЯР АТТОКУРОВ Кыргызстандагы 50 метрге чейин жеткен өрт өчүрүүчү унааны оңдоо үчүн 1 миллион сом каражат керек болорун айтып чыкты. Анын билдиришинче, учурда 15-16-кабаттагы үйдөн өрттү өчүрүү үчүн унаа жок.
Ички иштер министрлигинин маалыматына караганда, 3-ноябрда Баткен облусуна караштуу Кулунду айыл өкмөтүндө 2 күн мурун жоголуп кеткен 2 ЖАШАР БАЛА табылды. Ал айылдан 10 чакырым алыстыктагы тоодо жерде жаткан абалда табылган. Учурда бала жакындарына өткөрүлүп берилди.

Бектур Токтоноев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 731, 04-ноябрь-10-ноябрь, 2016-ж