ДИРЕКТОРДУ ЭСЕПЧИСИ ӨЛТҮРГӨН ДЕП ШЕКТЕЛҮҮДӨ

Ушул жылдын 17-ноябрь күнү Иса Ахунбаев атындагы Каракол медициналык колледжинин директору Анарбүбү Апсалиева өз үйүндө киши колдуу болуп каза тапкан. Анын 23 жолу бычакталган жансыз денесин маркумдун 10-класста окуган кызы көрүп, милиция кызматкерлерине кабарлаган. Директордун өлүмүнө шектүү катары аталган колледждин башкы эсепчиси кармалды.

"КЫЛМЫШКА ШЕКТҮҮ КАТАРЫ МАРКУМДУН КЕСИПТЕШИ КАРМАЛДЫ"

Ысык-Көл ОИИБинин басма сөз кызматкери Сталбек Усубакунов кылмыш тууралуу буларды билдирди:
– 17-ноябрь күнү болжол менен саат 13:10 чамасында Каракол ШИИБинин нөөмөт бөлүмүнө телефон чалуу келип түшкөн. Каракол шаарынын Тыныстанов көчөсүндө жайгашкан көп кабаттуу үйлөрдүн биринде жашаган апасын кимдир бирөө бычактап кеткени тууралуу кызы кабар берген. Окуя болгон жерге ыкчам иликтөө тобу барганда өз үйүнүн ашканасында отурган абалда аял кишинин сөөгү табылган. Алгачкы кароодо маркумдун денесине 23 жолу бычак сайылганы аныкталган.
Маркум Иса Ахунбаев атындагы Каракол медициналык колледжинин директору, 1957-жылы Ак-Суу районунун Зындан айылында төрөлгөн Анарбүбү Апсалиева экени аныкталган. Бул иш боюнча Кылмыш-жаза кодексинин 97-беренеси (адам өлтүрүү) менен кылмыш иши козголуп, тийиштүү соттук, медициналык экспертизалар дайындалган. Далил буюм катары бычак табылды.
Кылмышка шектүү катары маркумдун кесиптеши, аталган колледждин башкы эсепчиси, 39 жаштагы Р.М. аттуу жаран кармалды. Ал өз көрсөтмөсүндө жумуш боюнча бири-бири менен пикир келишпестиктен улам ушундай кадамга баргандыгын айтты. Кылмышка шектүү алгачкы суракта ошол күнү бул райондо болбогонун айтып чыккан. Бирок ыкчам иликтөө тобу анын айткандары чындыкка туура келбей жаткандыгын аныктап, кайра суракка алганда ал окуяны толук айтып берди. Учурда кылмышка шектүү Каракол ШИИБинин убактылуу кармоочу жайына киргизилип, тергөө иштери жүрүп жатат.

"АПАМА АНОНИМДҮҮ КАТТАР, БИЛДИРҮҮЛӨР КӨП КЕЛЕ БАШТАГАН"

Маркумдун кызы Айжанат буларды ыйлап айтып берди:
– Мен мектептен чыгып, үйгө саат бирлерде бардым. Эшик ачык турганынан апам үйдө экен деп кирип эле "апоу" деп кыйкырдым. Бирок эч кандай жооп болгон жок, карасам ашкананын жарыгы күйүп туруптур. Бут кийимимди чечип жатып эңкейип карасам апамдын үйгө кийген тапичкеси көрүндү. Апам чай ичип жаткан турбайбы деп эле кире калсам, столдо апам башкача отурган экен. Чочуп кетип "апа" десем деле үн чыкпайт, жанына келип жакшылап карасам кийимдери кан экен. Апамды түздөп жаткырайын деп, колтугунун астынан көйнөгүнүн бир нече жери тешилип калганын көрдүм. Эмне болуп кеткенин түшүнбөй эле телефонумду издедим. Көзүм караңгылап, корко баштадым. Телефондон жакын тууганыбыз болгон Айсулуу эжеме чалдым. "Апам ойгонбой жатат, үйдүн эшиги ачык экен, апамдын кийими кан болуп калыптыр" дедим. Анан бардык жакындарга, милицияга, "Тез жардамга" чалып билдирдим. Ошону менен ызы-чуу түшүп калдык.
Апамды бычактаган деп шектелип кармалган эжени жакшы таанычубуз. Ал апамдын туулган күнүндө, Жаңы жылда үйгө келип эле жүрчү. Жакында эле мындай бир иш болгон, ал эже эсепчи болуп иштегендиктен акчага байланыштуу маселе жараткан экен. Аны апам билип калыптыр. Ошондо апам "мени уятка калтырдың, сени экинчи көргүм келбейт" деп ага аябай капа болуп жүргөн. Анысы үчүн эже апамдан тынбай кечирим сурап жүрчү, аны мен да көргөм. Апамдын мүнөзү катуу, бетке айткан, ошол эле учурда ак көңүл болчу. Аны баары билет. Ал таза иштеп, өз эмгеги менен ушул даражага жеткен эле. Акыркы күндөрү апама коркуткан анонимдүү каттар, телефонуна билдирүүлөр көп келе баштаган. "Апа, бир нерсе кылалычы" десем, "жок, кызым, алардын ким экенин жакшы билем, Кудай баарын таразалайт" деп койчу.
Апамдын өлүмүнүн артында көп кишилер турат, жалгыз эле эсепчи эже эмес, дагы көп адамдар бар, ушуну уюштурган. Болгону аны жакшылап изилдеш керек. Апам 8 бир тууган болчу, алардан 4 бир тууган эле калган. Азыр эжелеримдин үйүндө жашап жатам.

"ДИРЕКТОРУБУЗДУН ӨЛГӨНҮ БИР ТЕҢ, БАШКЫ ЭСЕПЧИБИЗДИ ӨЛТҮРДҮ ДЕП ЖАТЫШКАНЫ БИР ТЕҢ БОЛУП ЖАТАТ"

Каракол медициналык колледжинин окуу-тарбия иштери боюнча директордун орун басары Гүлмира Майлиевага байланышсак, ал буларга токтолду:
– Анарбүбү Апсалиеванын колледжге директор болгонуна 10 жыл болгон. Жакында эле Кытайдын Пекин шаарына 15 күндүк окууга барып келип, жакшынакай эле иштеп жүргөн. Ишине абдан так, жоопкерчиликтүү мамиле жасап, тартипти катуу кармачу. 17-ноябрь күнү сабагын өтүп, үйүнө түшкү тамактанууга барганда ушул иш болуп кетип жатпайбы. Биз саат 2де студенттердин майрамында жолукмакпыз. Мага бирден он мүнөт өткөндө кызы ыйлап телефон чалып, "Гүлмира апа, апам жыгылып калыптыр, эшик ачык экен" деди. Биз мугалимдер болуп барсак милиция кызматкерлери, "Тез жардам" келип калыптыр. Буга чейин ал коркутуулар же башка бирөөлөр менен урушканын айткан эмес. Ал эми жумушта ар кандай пикир келишпестиктер болуп турчу, бирок ал жумуш боюнча да.
Азыркы учурда биз айлабызды таппай жатабыз. Директорубуздун өлгөнү бир тең, башкы эсепчибизди өлтүрдү деп жатышканы бир тең болуп жатат. Буга чейин эсепчибиз биз менен кошо ыйлап, Анарбүбү эженин акыркы сапарга узатуусуна да барган. Ал ошол күнү түш чендерде директордун үйү тараптан келе жатканын мугалимдерибиз көрүшүптүр, бирок алар маани деле беришкен эмес экен. Ошол көргөн мугалимдердин биринин түшүнө Анарбүбү эже кире бергендиктен, ал эсепчини ошол жактан көргөнүн милиция кызматкерлерине айтканда аны кармашты.

Айсалкын Качкынбекова
koom@super.kg