БИР БҮРКҮМ

• Жогорку Кеңеште 23-ноябрь күнү ИСЛАНБЕК САРСЕЙИТОВ жана АЛМАЗБЕК ЭРГЕШОВ депутаттык антын беришти. Аларга Чолпон Султанбекованын вице-премьер-министр, ал эми Таалайкүл Исакунованын эмгек жана социалдык өнүктүрүү министри кызматына шайланганына байланыштуу орун бошогон. Экөө тең "Кыргызстан" фракциясынан.
  
  
• Учурда КӨМҮРДҮН 1 тоннасы кендин өзүндө 1300 сом, өлкөнүн түндүк аймагында 4 миң сомго чейин, түштүк аймагында 5 миң сомго чейин сатылып жатат. Бул тууралуу 22-ноябрдагы өкмөттүн жыйынында Монополияга каршы жөнгө салуу агенттигинин директору Болсунбек Казаков менен "Кыргыз көмүр" ишканасынын башчысы Мырза Жаманбаев билдиришти.
  
  
• ДОСАЛЫ ЭСЕНАЛИЕВ интеллектуалдык менчик жана инновациялар мамлекеттик кызматынын төрагасы болуп дайындалды. Буга чейин Абдыллабек уулу Манас төраганын милдетин аткарып турган.
  
  
• ИИМдин маалыматына караганда, Кыргыз мамлекети эгемендүүлүктү алгандан кийин МЕЧИТТЕРДИН саны 70 эсе көбөйгөн. Советтер Союзу учурунда 39 гана мечит болсо, азыр 2743 мечит бар.
  
  
• 2017-жылдын апрелинде 1994-жылкы ПАСПОРТТОРДУН мөөнөтү бүтүп, "жараксыз" деп табылат. Ошондуктан жаңы паспортко алмаштыруу зарыл. Мындай маалыматты Мамлекеттик каттоо кызматы билдирди.
  
  
• Кыргызстандагы эркектердин 45 пайызы ЧЫЛЫМ чегет, чылым чеккен аялдардын саны да жыл сайын өсүүдө. Мындай маалыматты медицина илимдеринин доктору, пульмонолог Талант Сооронбеков билдирди. Расмий маалыматтарга караганда, өлкөдө өпкөнүн өнөкөт оорусуна кабылган 200 миң адам бар, бирок алардын 50 миңинин гана оорусу жөнүндө кабары бар.
  
  
• Өспүрүмдөрдүн арасындагы СУИЦИДДИН саны кыскарган жок. 2014-жылы 106, 2015-жылы 104, 2016-жылдын 8 айынын ичинде 79 өспүрүм өз өмүрүнө кол салды. Мындай маалыматты акыйкатчы Кубат Оторбаев билдирди.
  
  
• КЫРГЫЗГИДРОМЕТТИН берген маалыматына таянсак, өлкө ичинде декабрь айында абанын температурасы орточо болуп, жаан-чачындын нормадан көп жаашы күтүлөт.
  
  
• Өлкөдө ар бир бешинчи кыз АЛА КАЧУУ жолу менен турмушка чыгат. Бул көрсөткүч боюнча эң алдыда 60 пайыздык көрсөткүч менен Талас облусу турат. Мындай жыйынтык "Коомдун кабыл алуусундагы гендер" изилдөөсүнөн улам келип чыккан.
  
  
• Президент Алмазбек Атамбаев жашы жете электерге каршы кылмыш жасагандарды мөөнөтүнөн мурда бошотууга ТЫЮУ САЛГАН мыйзам долбооруна кол койду. Аталган мыйзамды Жогорку Кеңеш 20-октябрда жактырган болчу.
  
  
• Улуттук статистика комитетинин билдиришинче, 2015-жыл боюнча өлкөдөгү ӨЛҮМГӨ алып баруучу оорулардын баш сабында жүрөк-кан тамыр (77 пайыз) оорулары турат.
  
• Жогорку Кеңештин экс-спикери АХМАТБЕК КЕЛДИБЕКОВГО салынган 10 миллион сомдук айып пул мамлекеттин эсебине төлөндү. Мындай маалыматты 18-ноябрда Жогорку соттун сот департаменти билдирди.

Бектур Токтоноев
politika@super.kg