АЛМАЗБЕК АТАМБАЕВ: «ТАЛАНТТУУЛАРГА ЖАНА ЖӨНДӨМДҮҮЛӨРГӨ ЖОЛ АЧЫШЫБЫЗ КЕРЕК»

Мамлекет башчы Алмазбек Атамбаев 21-ноябрда «Атанын керээзи» көркөм тасмасын тарткандар жана дизайнер-модельер Аида Робертова менен жолугуп, аларга президенттик сааттарды белек кылды. Жолугушууда президент фильмдин режиссёрлору Бакытбек Мукулду жана Дастан Жапар уулун, ошондой эле башкы каармандын ролун аткарган Ыйманберди Мукулду эл аралык ири сынактарда, анын ичинде Канаданын Монреалында өткөн «А» классындагы кинофестивалдын «Алтын карек» сыйлыгын алган тасманы жаратышы менен куттуктады.
Мамлекет башчы ошондой эле дизайнер-модельер Аида Робертованы Москва шаарында өткөн Надежда Ламанова атындагы кесипкөй дизайнерлердин сынагында Гран-прини жеңип алышы менен куттуктады. Президент жаш, таланттуу дизайнерлер өздөрүнүн чыгармачылык пландарын Кыргыз мамлекетинде жүзөгө ашыруусун, ата мекендик мода индустриясын өнүктүрүүгө көмөктөшүүсүн каалай тургандыгын билдирди. «Биздин байыркы элибиз пассионардуу жана абдан таланттуу. Келечегибиз инсандын ар тараптуу өнүгүшүндө: бизнесте да, маданиятта да, саясатта да таланттууларга жана жөндөмдүүлөргө жол ачышыбыз керек. Мамлекеттин максаты – сиздер сыяктуу чыгармачыл адамдарды колдоо»,- деди Алмазбек Атамбаев.

Бектур Токтоноев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 734, 25-ноябрь-01-декабрь, 2016-ж