БИР БҮРКҮМ

Ушул жылга карата өлкө боюнча 250 адам тамактан УУЛАНЫП, 143 адам ботулизм оорусунан жабыркаган. Мындай маалыматты Саламаттыкты сактоо министрлиги таратты.
Өлкө башчысы АЛМАЗБЕК АТАМБАЕВДИН кеңешчиси Бусурманкул Табалдиев кызматтан бошотулду.
Өзгөндө балдарын канжалатып МУШТАШТЫРГАН эки ата сот тарабынан 2 жылга шарттуу түрдө кесилди. Мындай чечимди Өзгөн райондук соту чыгарды.
Саламаттыкты сактоо министрлигинин дары-дармек жана медициналык техника менен камсыздоо департаментинин директору Рустам Курмановду тармактык комитетте депутаттар жумуштан алууну сунушташты. Буга дары-дармектерди пайдалануудан улам адамдардын каза болушу жана ПАРАКОРЛУК СЕБЕП БОЛДУ.
БУУнун өнүктүрүү программасынын иликтөөсүнө караганда Кыргызстандагы АЯЛДАРДЫН 30,6 пайызы орто жана жогорку билимге ээ. Ал эми ЭРКЕКТЕР арасында бул көрсөткүч 22,3 пайызды түзөт.
Бишкек шаардык мамлекеттик санитардык-эпидемиологиялык көзөмөл борборунун директору Артур Буюкляновдун айтымында, шаарда САСЫК ТУМООГО кабылгандардын саны былтыркыга салыштырмалуу 15 пайызга өскөн. Буга байланыштуу Бишкек шаарында Үй-бүлөлүк дарыгерлер борбору 6 күндүк иштөө тартибине өттү.
Дин иштери боюнча мамлекеттик комиссиянын директору ОРОЗБЕК МОЛДАЛИЕВДИ президент кызматтан бошотту.
БУУнун өнүктүрүү программасынын 2014-жылкы иликтөөсү боюнча, өлкөдө балдардын 37,9 пайызы ЖАКЫРЧЫЛЫКТА, ал эми 1,7 пайызы өтө жакырчылыкта жашашат.
Кыргыз мамлекетинде коомдук-саясий багытта өзгөчөлөнгөн эмгеги үчүн жана мамлекетти чыңдоого кошкон зор салымы үчүн берилүүчү "КУРМАНЖАН ДАТКА" ордени негизделди.
Башкы прокуратура МАКСИМ БАКИЕВДИН санаалашы Алексей Елисеевдин адвокаттык лицензиясын узартуу фактысына байланыштуу иш козгоп, териштирүүнү УКМКга тапшырды.
Чылымдан өспүрүмдөрдү алыстатуу максатында депутаттар ТАМЕКИ баасын көтөрүүнү өкмөткө сунушташты. Маалыматта эң арзан чылымды 40-45 сомдон жогору сатуу көрсөтүлгөн. Ошондой эле кафе, ресторан сыяктуу жерлерде тамеки чегүүгө чек коюлушу мүмкүн.
Кыргыз Республикасынын президентине караштуу Мамлекеттик тил боюнча улуттук комиссиянын төрагасы ЭГЕМБЕРДИ ЭРМАТОВ кызматтан алынды.
Жогорку Кеңеш 2017-жылдын БЮДЖЕТИН 23,3 миллиард сом жетишпестиги менен бекитип берди. Тактап айтканда, келерки жылдын чыгашасы 150,1 миллиард сом болсо, киреше 126,8 миллиард сомго болжолдонгон.
Мамлекеттик миграция кызматынын билдиришинче, учурда Кыргызстанда эмгектенип жаткан чет өлкөлүктөрдүн саны боюнча КЫТАЙ 1-орунда. Тактап айтканда, 11 миң кытайлык биздин өлкөдө иштеп жатат.

Бектур Токтоноев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 735, 02-декабрь-08-декабрь, 2016-ж