СЕКСУАЛДЫК КЫЙМЫЛДАР, АЛАРДЫН МААНИЛЕРИ

Маңдайыңызда сизге жаккан адам турат. Мындай учурда өзүңүз да байкабай, сезимиңизди кыймыл-аракетиңиз менен билдирип коюшуңуз мүмкүн. Эмесе, сексуалдык кыймылдар жана алардын маанилерин чечмелеп сунабыз.

АЙЫМДАР
Чач. Аялдардын эң биринчи куралы – чач. Колу менен чачын артка серпип, колуна чачын ороп же кармалап калуу көп эле айымдардын адаты. Бул кыймыл менен ал сизге жагуунун амалын кылып жаткандагысы. Бул белги кааласа да, каалабаса да эркектин сексуалдык каалоосун күчөтөт. Ал эми айым башын чулгуп, чачын серпип койсо, демек, сиз менен убактысын өткөрүүгө даяр экенин билсеңиз болот.
Сыйпалоо. Айым суусундук ичип жаткан бокалынын же чай ичип жаткан чынысынын кырын сөөмөйү менен сылап, сизди таптакыр карабай, терең ойго батышы мүмкүн. Муну сиздин сексуалдык кудуретиңизден шектенип жатканы деп түшүнсөңүз болот.
Көздөр. Эгерде айым сизди кыйгач тиктеп, анан көзүн тартып кетип кайра тигилсе, сизге кызыгуусу артып жатканы. Мындай көз карашты байкасаңыз, айымдын жанына барып, жакындан тааныша берсеңиз болот. Ал эми каректер коюуланып жана чоңоюп, сизден көзүн албай тиктесе, сизге болгон сексуалдык каалоосу күчтүү. Романтикалык кечелерде үлбүрөгөн шамды коюп коюшканы да бекеринен эмес. Бул көздүн карегин чоңойтуп, сексуалдуу кылып көрсөтөт.
Билектер. Эгерде билектеринин көркөмдүүлүгүн сизге көрсөтүп, билеригин же саатын улам оңдой берсе, анда айым өзүнүн сексуалдуулугун көрсөткүсү келгени.
Эриндер. Эң сексуалдуу кыймыл эриндердин жарым ачылып турганы. Мындай белги эркектердин делебесин козгоп, магниттей тартат. Ал эми алдыңкы эринин жалап же тиштөөнү адатка айланткан айымдар өзүнүн сексуалдык каалоосун жашыргысы келгендер. Колун чөнтөгүнө салып басканды жактырган айымдарды каалоосун күч менен баскысы келгендер деп түшүнсө болот.
Буттар. Айым сизге карап отурат дейли. Бутун бекем кайчылаштырып алса, демек, сизге болгон кызыгуусун күч менен жашырып жатканы. Айрым учурларда айымдар катуу дүүлүгүп чыкканда ушундай абалда отурушат.

ЭРКЕКТЕР
Каштар. Эгерде кирип келген мырза сизди көпкө тиктеп, анан кашын өйдө көтөрүп койсо, сиз ага жагасыз. Ошондой эле мындай кыймылды сиз менен кантип жакындашуунун айласын таба албай жатканы деп кабыл алсаңыз болот.
Мурун. Эркектер жаккан айымын көргөндө толкунданып кетишет. Муну билгизбөө үчүн мурундарын жанып же болбосо таноолору эрксиз дердеңдей түшөт.
Буттар. Айымга сексуалдык жактан тартылган эркектер отурганда эки бутун адаттагыдан бир аз ачып коюшат. Бул кыймыл туруп сүйлөшүүдө да, отуруп сүйлөшүүдө да өзгөрбөйт. Демек, төшөк оюнун каалап жатканын ушул кыймылдан билсеңиз болот.
Кармалоо. Сиз менен сүйлөшүп жатып галстугун оңдоп же костюмунун топчуларын кармалап жатканын байкадыңызбы? Анда сиз ага катуу жагасыз. Ал эми костюмун ийинине илип алса, демек, сизге карата эч кандай кызыгуусу жок деп билсеңиз болот.
Көз караш. Сизди көзү менен чечиндирип жатат. Айымдардан айырмаланып, эркектер жаккан айымын бир карап, анан көзүн тартып кетпейт. Буттун бармагынан тартып чачтын учуна чейин рахаттана тигилсе, анда сизди төшөктөгү өнөктөшү катары элестетип койду.

БИРИНЧИ ЖОЛУ...
Биринчи жолу жолугушууга барганда эле өнөктөшүңүздүн кыймыл-аракетинен көп нерсени билип алсаңыз болот.

• Эркек сизди биринчи жолу коомай кучактаса, сизге мамилеси олуттуу.
• Эркектин денеси сиздин көкүрөгүңүзгө акырын тийсе, сизден ысык мамилени күтүп жатат.
• Эгерде чыканактан өйдө кармаса, сиз менен узакка бирге болууну каалайт. Алаканыңызга манжаларын тийгизсе, турган жерден эңсөөсүн кандыргысы келет. Ал эми белиңизге колун коюп суроолуу караса, сиздин каалооңузду билгиси келгени.
• Биринчи эле жолукканда көзү менен чечиндирип баштады. Бул анын өтө сексуалдуулугунан же кыз жандуулугунан кабар берет.
• Айым эркектин моюнуна колун артып, эки буту менен ага жабышып алса, бул түнү сиздин кандай сунушуңуз болсо да баш тартпайт.

ЭРКЕКТЕРДИ БУЮМ МЕНЕН САЛЫШТЫРСАК...

• Эркектер кирпик боёгучка окшош. Көзүңдөн буурчактап жаш кетсе эле ошол замат көздөн кайым болуп кетишет.
• Салфеткага окшош. Тамак столго келери менен алдыңда кайдан-жайдан пайда болушат.
• Эркектер банктагы эсепке окшош. Эсепте акча жок болсо, кызыкчылык туудурбайт.
• Сасык тумоого окшош. Денени катуу ысытат. Айрым учурда түнү менен уктатпайт. Анын кайсы күнү, кайсы тараптан, канча күнгө келгенин билбейсиң. Экөөнү тең жука кийинип жүрүп илештирип аласың.

Кызык экен

АР ЭЛДИН ЭРОТИКАЛЫК СЫРЛАРЫ

• Изилдөөлөргө таянсак, дүйнөдөгү эң сексуалдуу калк француздар экен. Бул калктын ар бир жараны бир жылда орто эсеп менен 152 жолу төшөк кумарына батышат. Алардын мындай темпераментке ээ болуусуна ашканасынын ролу зор. Анткени бел кубатты күчөтө турган азыктар менен тамактанышат (буурчак, пияз, жер-жемиштер).
• Ал эми Таиланд өзүнүн эротикалык массаждары менен даңкталган.
• Немистердин эркектеринин 41 пайызы фетишисттер. Алар аялдардын ич кийимдерин жыйноодон рахат алышат. Ал эми бардыгына уруксат берилген өлкө катары Голландия эсептелет. Анткени бул өлкөдө жыпжылаңач сейилдеп жүрсөң да өөн учурабайт.
• Италия менен Аргентинанын калкы романтиканы жакшы көргөндөр. Аялдарын гүл менен тосуп, серенада ырдагандар да ушулар.
• Жаңы Зеландияда стриптизди искусствонун бир түрү катары эсептешет.
• Өз ден соолугуна мыкты кам көргөн калк Япониянын жарандары. Бул өлкөнүн жарандарынын көпчүлүгү презерватив менен гана интимдик байланышка барышат.

Эротикалык окуя

МАШИНА ҮСТҮНДӨГҮ МАХАБАТ

Бул окуя мындан бир нече жыл мурун болгон эле. Биз анда жаңы үйлөнүп, күйөөм экөөбүздүн ысыгыбыз тарай элек убак. Тилекке каршы, биз үйлөнгөндөн кийин эле ар нерсени шылтоолоп, күйөөмдүн туугандары үйгө келе бере турган адат таап алышты.
Кайненем кызын догдурга көрсөтөм деп келип калды. Андан соң күйөөмдүн иниси келинчеги менен келди. Мындай көрүнүш көп күндөр бою созулгандыктан, күйөөм экөөбүз төшөк оюнун ойдогудай ойной албай айлабыз кетти. Же тигилер бир түшүнүп койсочу! Баары бүткөнсүп, таякеси жүк машина менен келип калыптыр. Иштери бүтпөй калганын, эртеси машинасына керектүү жабдыктарды алып, айылга кайтарын айтты.
Түн кирип, элдин баары уйкуга киргенде күйөөм мага тийише баштады. Тигилердин дем алганы угулуп жатса, кантип баштайбыз?
Акырын туруп, таякебиздин жүк ташыган машинасынын үстүнө чыктык. Аптыгып, чыдамыбыз кетип, бири-бирибиздин кийимдерибизди чечип жибердик. Араң эле чыдап жүргөн экенбиз. Менин үнүм, күйөөмдүн энтиккени кошул-ташыл болуп эле жатып калдык. Таякенин өтпөй калган жашылчалары алдыбызга өтүп жатканын да элес алган жокпуз. Менин бир өзгөчөлүгүм, күйөөмдүн үстүндө “ат чапмайынча” рахаттын туу чокусуна чыга алчу эмесмин.
– Үстүңө чыгам,- дедим.
– Мейлиң,- деди күйөөм.
Ошентип, машинанын үстүндө болуп көрбөгөндөй рахаттуу түндү башыбыздан өткөрдүк. Ишибизди бүткөрүп келип, жатып калдык. Эртеси таякебиз болуп чай ичип отурсак, кайненем ага минтип калды.
– Кандай эс алдың? Үйгө эле жат десе болбой «машинага эле жатам» деп кетип калдың. Эс ала алдыңбы?
– Эс алгандай болдум. Бирок түндүн бир оокумунда эле машинамдын үстүндө шумдук окуялар башталды. Түшүмбү же өңүмбү, билбейм, кимдир бирөө «ат чаап» эле бүтпөй жатты. Кыйкырык-сүрөөн да укмуш. Айтор, билбейм,- деп мени карап күлүп жатпайбы. Уялганымдан чыга качтым.
Көрсө үй тар болуп, таяке тамак жегенден кийин машинасына барып жатып алган экен. Биз аны билбей эле машинанын үстүндө «ат чаба» берген турбайбызбы! Азыр ошол окуяны эстесем эле ууртумдан жылмайып алам.

Гуля

Астра Айдарова
erotika@super.kg