МАЛ АЛЫП КЕЛҮҮ ҮЧҮН КЕТКЕН 2 ЖИГИТ ТОҢУП КАЗА БОЛДУ

Өткөн жумада Нарын облусуна караштуу Ак-Талаа районунда кыштоодон мал алып келгени кеткен 2 жаш жигит тоңуп каза болду. Биринин денеси 8-декабрда табылса, экинчисинин денеси 11-декабрда табылды.

ОКУЯ ТУУРАЛУУ

Маалыматтарга караганда, 7-декабрь күнү түштөн кийин Ак-Талаа районунун борбору Баетов айылынын тургуну 1994-жылы туулган Адамата Камчы уулу менен Байгөнчөк айылынын тургуну 1993-жылы туулган Эламан Бактыбаев Кара-Таш кыштоосуна мал алып келүү үчүн кетишкен. Аларды Адаматанын атасы автоунаасы менен жарым жолго чейин алып барып, унаа суудан өтө албай калганда экөөнү таштап, өзү келе берген. Тилекке каршы, алар бара турган жерине жетпей суукта калып, тоңуп каза болушкан. 8-декабрь күнү Кара-Таш кыштоосунан айылга түшүп келе жаткан малчылар Мелис ашуусунан жолдун боюнда тоңуп жаткан Адамата Камчы уулунун денесин көрүп, бул тууралуу райондук ички иштер бөлүмүнө билдиришкен. Ал эми Эламан Бактыбаевдин денеси 11-декабрда табылган.

“КАЗА БОЛГОНДОР УУРУЛУК КЫЛМЫШЫНА ШЕКТЕЛИП ЖАТКАН”

Бул боюнча соттук-медициналык экспертиза дайындалып, иликтөө иштери жүрүп жатат. Ишти карап жаткан Ак-Талаа РИИБинин тергөөчүсү Гүлбарчын Болотова төмөнкүлөрдү айтып берди:
– 8-декабрда бизге кыштоодон түшүп келе жаткан малчылар Уу-Өтөк чөлкөмүндөгү кыядан тоңуп каза болгон адамдын денесин көргөндүгүн айтып келишкен. Биз малчылар айткан жерге баруу үчүн унаа менен, кар жаап жол жабылып калгандыктан андан ары 4 саат жөө жүрүп барып денени таап, алып келгенбиз.
Каза болгон Баетов айылынын тургуну Адамата Камчы уулу болуп чыкты. Ал кыштоого жалгыз эмес, Байгөнчөк айылынын тургуну Эламан Бактыбаев менен кеткени белгилүү болду. Бир малчы аларга кой бермек болуп, экөө Кара-Таш кыштоосуна ошол койлорду алып келүү үчүн кетишкен экен. Эламан Бактыбаев 8-декабрь түнү агасына телефон чалып, “үшүп жатам, шайым жок” деп айткан экен. Бирок агасы “эмне үчүн түндө чаласың?” деп урушуп салыптыр.
Тирүү же өлүү экендиги белгисиз болгон Эламан Бактыбаевди издөө үчүн 10-декабрда ӨКМ, РИИБ кызматкерлеринен жана Бактыбаевдин туугандарынан турган топ түзүлүп, жалпысы 6 киши ат менен чыгып издөө иштерин жүргүзүшкөн. 11-декабрда гана анын денеси Күйгөн-Өтөк чөлкөмүнөн табылып, райондун борборуна алынып келинди. 10-декабрда Адамата Камчы уулу, 14-декабрда Эламан Бактыбаев жерге берилди.
Каза болгон экөө тең ушул жылдын ноябрь айында уурулукка шектелип кармалышкан эле. 19-ноябрда алардын үстүнөн Кылмыш-жаза кодексинин “уурулук” беренеси боюнча кылмыш иши козголуп, тергөө иштери жүрүп жаткан. Экөө жеке кепилдик менен эркиндикке чыгарылган болчу.

6 кишиден турган топ ат менен издөө иштерин жүргүзүшкөн.


Маркум Эламан Бактыбаевдин денесинин үстүнө кар жаап койгон.


Нурбек Абдыкадыров
koom@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (21)
arzuuu
2016-12-21 11:50:44
Уурулук болсо ишти эптеп жабайын деп мал алганы кетишкенго. Айтор жаннатын берсин. Кайдыгерлик болуптур озу. Атасы анан урушуп койгон ьайкеси куноолу. Ушуп атам десе курушуп койгон кандай неме аа?
+5
Aiza9797
2016-12-21 12:38:54
Жаткан жеринер жайлуу болсун((
+7
ainura220888
2016-12-21 14:01:09
Чын эле атайын эле алып барып таштап салгандай сезилет экен.
+3
Ayka0696
2016-12-21 15:07:40
Аянычтуу
+1
strelok
2016-12-21 16:04:43
Ото аянычтуу
+1
AIZAD
2016-12-21 16:32:41
Агасы ХХХ го!!!
0
admin_superstan
2016-12-21 16:58:38
AIZAD, этика нормаларын сактаңыз.
+1
Kairat.96
2016-12-21 17:42:44
Жаткан жерлери жайлуу болсун окунучтуу да
+1
aiturgasha
2016-12-21 21:34:53
Байкущтардын тонуп олгонун элестетип жаман болуп кеттим. Кичине ушусом эле титиреп болбой калам мен.
+2
Bubu88
2016-12-21 23:51:52
Малы башында калсын кой берем алып кет деп чакырган киши дагы машинасы мн жарым жолго алып барып таштап келе берген атасы дагы ХХХ адамдар экен эми ошо коюн кучактап отура берсин балдарга бооруң ооруйт байкуштар хотя телефон чалганда издеп барышпайбы кыйраткансып урушуп өчүрүп койбой
+5
admin_superstan
2016-12-22 11:47:47
Bubu88, кимдир-бирөөнүн кадыр-баркына шек келтирген билдирүүгө тыюу салынган. Эскертүү!
0
Kamchybekova.Ch
2016-12-22 02:20:42
Аянычтуу.
0
Gulzat86
2016-12-22 02:35:53
Ээ ушу мал деп малдын артынан журо бергендерге танмын да'Мээрими деле жаныбарларга окшошпу дейин десен мал деле балам деп турат'Ай Ким билет азыркынын атасына баласына дагы тансын''
+4
Bubu88
2016-12-24 05:39:39
Gulzat86,айрыкча кыргыздар ХХХ десе беттери мн түшөт
0
chabandes
2016-12-24 20:04:09
Жаткан жери жайлуу болсун
0
mirbek99
2016-12-25 00:50:19
Бутунда өтүк эмес красофкиби карасаңар
0
tabyshmak
2016-12-26 15:41:12
Кыйналып жан бергени айдан ачык. Кудайдын берген дарты менен ооруп, кайтыш болсо, анда "ооруду эле да" деп озунду сооротуп, ыза басты болосун. Мындай алты саны аман, дени-карды соо адамдын сууктан тонуп, олуп калганы бир топ куйут болот да. Атайын талаага алып барып таштаган го чамасы... Болбосо акыл-эси соо балдар ушуп жатканда кайра кайтмак. Ошол кайтууга жетишпей калышканбы... ким билсин... Себеби, ушук дароо башталбайт да. Акырындык менен муздатат да...
0
aydarken
2016-12-27 04:08:37
Жайлары жаннаттан болсун.
0
№ 737, 16-декабрь- 22-декабрь, 2016-ж
БАШКЫ БЕТ
СОҢКУ КАБАР
СУПЕР-ИНФО
SUPER.KG ВИДЕО
МЕДИА-ПОРТАЛ
Кинозал
ЖЫЛНААМА