ЖЫЛДЫЗДАРДАН ВАЛЕНТИНКА. АТАКТУУЛАР ЖАН ШЕРИКТЕРИНЕ АРЗУУ КАТЫН ЖОЛДОШОТ...

"МЕНИ БАКТЫЛУУ КЫЛГАНЫҢ ҮЧҮН РАХМАТ"

Катты ырчы Съездбек Искеналиев жубайы Жаркынайга жолдойт. Экөөнүн баш кошконуна 10 жыл болду. 3 баланын ата-энеси.
– Бул жашоодо адамдын жасаган эмгегин билип, ага ыраазычылык айтуу жакшы сапат деп түшүнөм. Мен дагы андай сапаттын ээси болгум келет. Себеби Кудай кошкон жарым, сага билдирчү ыраазычылыгым көп. Быйыл биздин баш кошконубузга 10 жыл болду. Сен мен тилегендей жарымсың, ар бир жасаган ишимди колдогонуң, айткан кеңештериң, чарчап келсем дайыма жаркылдап тосуп алганың эч нерсеге теңелгис бакыт тартууларын билишиңди каалайм. Качан болбосун үйүбүз таза, балдарыбыздын курсагы ток, кийимдери таза мунун баары сенин эмгегиң. Мага ысык чайыңды, даамдуу тамагыңды жаркылдап сунуп турасың. Бир туугандарымдын жүрөгүнөн орун тапкан Жаркынайым. Эгерде ооруп калсам көзүмдүн кареги менен кошо тегеренип жүрөсүң, менин камкор жаным. Чыгармачылыгымдын эң биринчи күйөрманы, сынчысы өзүңсүң. Мен дагы сени менен акылдашып иш кылгандан ырахаттанам. Апам көзү тирүү кезинде эч кимге угузбай “мен тилегендей келинчегиң бар, бактың өзүңө кут болсун, көз тийбесин” деп ыраазычылыгын айтып калар эле. Андай сөздү апамдан уккан мен ого бетер кудуңдап сүйүнгөнүмчү. Сен менин жароокер, жаркылдаган, жан дүйнөсү сулуу жарымсың. Үйүмдүн куту, балдарымдын апасы, бир туугандарымдын жакшы көргөн келини Жаркынай, Жаратканга мага сени жубай кылып бергени үчүн чексиз ыраазымын. Күнү да, түнү да Жаркынайым менен тең арып, тең карып, балдарыбызга жакшы тарбия берип, алардын жакшылыгына чогуу күбө болуп жүрө берели деп тиленем. Мени бактылуу кылууга умтулганың үчүн, бакыт тартуулаганың үчүн ыраазымын, жан шеригим.

"СЕНИН ЖАНЫҢДА АЛСЫЗ АЯЛЗАТЫ БОЛУУДАН КОРКПОЙМ"

Катты ырчы айым Неля жолдошу Урмат Усеновго арнайт. Алардын турмуш кургандарына быйыл 10 жыл болот. 2 баланын ата-энеси.
– Кымбатым менин, экөөбүздүн чогуу түтүн булатып жатканыбызга жакында 10 жыл болот. Бул биз үчүн аз убакыт. Бирок бул убакыт аралыгында мен сага болгон сүйүүмдү, жалаң гана аруу сезимдеримди сактап келем. Жашоомдогу эң бактылуу жана өкүнүчтүү көз ирмемдерде дайыма жанымда болгонуң үчүн, мага арткан ишеничиң, чексиз колдооң үчүн рахмат айткым келет. Сен менин жан дүйнөмсүң, жасаган ар бир жакшылыгыңа ыраазымын. Сенин акылмандыгың, эптүүлүгүң, абалдан чыгуу үчүн жасаган туура аракеттериң, чыдамкайлуулугуң, бир сырдуу мүнөзүң мен үчүн баа жеткис кымбат. Сендей адам бул дүйнөдө башка жаралбагандай туюлат. Мага, балдарыбызга тартуулаган бактылуу мүнөттөр үчүн сага рахмат айтам. Сенин токтоо жана чыдамкай мүнөзүң бизди кандай гана кыйынчылык болбосун сууруп чыгат. Сенин жаныңда алсыз аялзаты болуудан коркпойм, себеби мени дайыма коргоп аларыңды билем. Сенин ыйманың башкаларга үлгү болчудай. Алла экөөбүзгө эки дүйнө бир болууну буюрсун деп тиленем. Балдарыбызга жана жакындарыбызга үлгү болушубузду каалайм. Сени сүйөм жана сенин сүйүүңө арзууну каалайм.

"СЕНДЕЙ ЖАНГА ТУШ КЫЛГАН ТАГДЫРЫМА ЫРААЗЫМЫН"

Катты Айчүрөк Иманалиева жолдошу Таалайга жолдойт. Экөөнүн турмуш кургандарына быйыл 22 жыл болот. 3 баланын ата-энеси.
– Таалай, чогуу турмуш куруп жаткан 22 жыл ичинде кандай гана кубанычка толгон күндөрдү башыбыздан өткөрдүк. Жараткан тартуулаган кыйынчылыктарга дагы чогуу кез келдик. Сенин ар дайым менин жанымда болгонуң, башыма сыноо түшүп, жан дүйнөм түйшөлүп турган мүнөттөрдө жылуу сөзүң менен мага дем-күч бергениң, ар бир ийгилигиме чын дилиңден кубанганың, мунун баары менин айтып бүткүс бакытым. Аялзаты жанында ишенимдүү жөлөгү болгондо гана эртеңки күнүнө ишенимдүү карайт. Экөөбүз үй-бүлө кургандан тартып ушул убакытка чейин менин жашоого болгон ишенимим бир да жолу майтарылган жок. Анткени жанымда мени сүйгөн, сыйлаган, колдогон жан шеригим болдуң. Сен күйүмдүү жолдош, мыкты атасың. Уул-кыздарыңа мээрим төккөнүң, жасаган камкордугуң мага бүткүл дүйнөнүн жылуулугун тартуулагансыйт. Мен өзүмдү сенден табам, сендей жан шерикке туш кылган тагдырыма ыраазымын. Ар бир аялзаты ушундай бакытка балкып жашап өтүүсүн каалайм.

"НАРГИЗА, БААРЫБЫЗДЫН "ЖАНУЛЯБЫЗСЫҢ"

Катты режиссёр Сүйүн Откеев жубайы Наргизага арнайт. Алардын турмуш кургандарына 10 жыл болду. 3 кыздын ата-энеси.
– Мен сени башкалардай ар кандай ат менен атай албайм, буга башынан көнгөн эмесмин, билесиң. Романтик деген ат мага жарашпайт, экөөбүз алгачкы жолу жолугушкан күн эсиңдеби? Атайын сага деп арнап алган гүлүмдү өзүңө тартуулагандан уялып мени жеткирип келген таксист байкеге карматып койгонумду айткан элем. Анысы аз келгенсип сейилдеп жүрүп сага пицца алып бермей болгом, жыйынтыгында анын 80 пайызын өзүм жеп койгонумду дагы унутпасаң керек. Албетте, сен мунун баарын эсиңден чыгарган эмессиң. Эми сен билбеген бир нерсени жазайын. Баш кошордон мурун сени менен СМС аркылуу жазышып жүргөндө 5 мүнөт жооп кайтарбай калсаң, мени сүйбөй калды бекен деп жүрөгүм кабынан чыгып кетчүдөй кабатырлана берчү элем. Бирок ал кезде ичимде мындай чоң сезим жашап жатканын, албетте, өзүңө айткан эмес болчумун. Анда Германияда жүргөн кезим, айына сенин үнүңдү угуу үчүн телефонума 1500 еврого бирдик салып немистерди далай байыттым. Андан бери канча жыл өттү, баш коштук, ортобузда 3 айдай болгон кыздарыбыз төрөлдү. Алардын баары үчүн, жашоомдогу күнүмдүк шаң-күлкү үчүн, мээримиң үчүн сага ыраазымын. Өзүң билгендей телефонума сени Жанулям деп сактап алгам. Айлин кызыбыз сен чалганда “Ата, жануляң чалып жатат” дегендей, сен баарыбыздын жанулябызсың. Бул сөздөрдү, балким, көзүңө карап отуруп айтпаган чыгармын. Аны мен сага “Супер-Инфо” аркылуу айтып жатам. Балдарыбыздын жана менин бактыма аман бол, жанулям.

Нуркыз Курманбек кызы
star@super.kg