Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

СҮЙҮҮ СОНАТАСЫ

№387 2-9 апрель, 2010-ж.


(Башы өткөн сандарыбызда)

– Менден эч нерсе жашырбай айтып бере аласыңбы? Суранам сенден, ошентесиңби?!
Иман шуу үшкүрүп жиберди да, буулуга үн катты.
– Анын сага эмне кереги бар эле?
– Иман!
Гүлнар жалооруп жиберди.
– Макул, жаным, айтып берейин. Бирок чыдап уга алар бекенсиң?
– Мен капа болбойм, сөзүңдү бөлбөй угам.
Иман башын ойлуу чайкады да, сөзүн баштады.
– Мен бул окуя жөнүндө эч качан эстебейм деп убада берген элем. Айла канча, Кудай эстетип, өткөн күндөргө кылчактатып койду. Өзүмдү-өзүм алдаганым менен, көңүлүмдүн түпкүрүндө баары бир алардан алыстай албай келдим. Эми эмнесин жашырайын, Гүлнар. Сен бала деп ак эткенден так эткен сайын бир да жолу жүзүн көрбөгөн уулум көз алдыма тартыла берчү. Сен бала деген сайын ошол баламды эстеп, жетимиш эки тамырым сыздап кетер эле. Сен байкуш аны кайдан билмексиң?!
Бул окуя көп жыл мурун болгон. Мен анда институттун акыркы курсунда болчумун. Айша экөөбүз... Өх, ушул кезге чейин экөөбүздүн ортобуздагы ыйык мамиленин алдында, анын мага болгон махабатынын алдында күнөөлүү болуп келем. Айша өзгөчө жаралган жан болчу. Анын жан дүйнөсүнүн тазалыгына, баёолугуна суктанып бүтө алчу эмесмин. Акылы тунук, адамгерчилиги бийик, эрки күчтүү андай аялды экинчи кезиктирген жокмун. Бир күнөөсүз жан эле да... Айшанын атасы чоң болуп иштечү. Албетте, жалгыз кызын кайдагы бир кыл кыяк кармап жүргөн селсаякка бериши мүмкүн эмес эле. Ага карабай Айша экөөбүз кездешип жүрдүк.
Күндүз кайтарууда болсо да, түнкүсүн баарын уктатып коюп, биздин бакка чуркап келчү. Келчү да, менин обондорумду тыңшап отура берчү. Анан ал «музыка сенин жүрөгүңдө жашайт, Иман. Сени музыкасыз, музыканы сенсиз элестете албайм...» деп айтып калчу. Музыканы жан дили менен түшүнүп, ага берилип кетер эле, байкушум. Ошол учурда мен келечегимди андан башка адам менен элестете алчу эмесмин. Бирок тагдыр ар дайым эле биз каалагандай боло бербейт тура. Ана үйлөнөбүз, мына үйлөнөбүз деп Айшанын гана окуусунун бүтүшүн күтүп жүргөн элек. Ошентип жүргөн күндөрдүн биринде тагдырым таптакыр эле тескери бурулуп, башка агымга түшүп кетти. Анткени сени кезиктирип калдым. Эсиңдеби, биз жолуккан күн?
– Эсимде. Ал күндү өмүр бою унут­пасмын. Бирок сен улант, уланта бер.
Иман оор күрсүнүп алып сөзүн улады.
– Ошол күнү жамгыр көнөктөп төгүп турган. Консерваториядан чыга калып эле жолдун ары жагына чыгып, шашып жөнөй берген элем. Бактын түбүндө корголоп турган кызды капысынан көзүм чала калды. Жамгыр жаашын күтпөгөнбү, айтор, жеңил кийимчен, кол чатыры да жок экен. Чачтарынан тамчылар агып, чыт көйнөгү денесине чапташып, келишкен бой-турпаты көркүн ого бетер ачып койгон. Жаандан кантип коргонорун билбей, колундагы сумкасы менен башын далдалайт. Дарактын алдында бүрүшкөн кыз мага ушунчалык назик, алсыз көрүндү. Эмнегедир ошол алсыз денени коргоп, ушул сулуулукту сактап калгым келип кетти. Эрксизден анын жанына барып үн каттым.
– Келиңиз, менин кол чатырым бар.
Кыз жалт карады.
О-о, тереңде мөлтүрөгөн каректерге ошол замат арбала түштүм. Капкара каректерге чөгүп бараткандай сездим өзүмдү. Сыпаа жылмайган кыз акырын, бирок ишенимдүү кадам таштады.
– Рахмат.
Мына ошол жамгыр алдында тапкан бакытым өзүң болчусуң, Гүл­нарым!
– Ооба, эгерде ошондо жамгыр алдында корголой калбасам, сени менен таптакыр кезикпей калмак экенмин да.
– Ошол күндөн тартып сенсиз жашай албай калдым. Канчалык аракет кылсам да, жамгыр алдында ийилген кыздын элеси, анын мөлтүрөгөн тунук кареги эстен кетпейт. Сенин карааныңды алыстан көрүп, бир эле күн көрбөй калсам сени издеп, шаар аралап тентип кетчү болдум. Айшанын сүйүүсү, мамилеси сенин мөлтүр каректериңдин алдында түккө турбай калды. Айшаны жакшы көрчүмүн, чексиз сыйлачумун, бирок... Сени сүйгөндөй сүйө албай койдум. Бул сезим менен күрөшө албай жеңилип бердим. Ал кезде анын бир айлык боюнда бар экенин билчүмүн. Анын боюнда бар экенин, жалгыз каларын билип туруп, адамгерчиликти да, эркти да сүйүүм үчүн курмандыкка чалдым. Ал байкуш мени аягына чейин күттү.
Бир күнү капысынан кезигип калдык. Мен ага жолуккум келбей, күнөөсүз күнөөлүү болуп качып жүргөн элем. Практиканын учуру болсо керек эле, жолдон өтүп баратып клиникадан чууруп чыгып бараткан ак халатчан кыздарды көрүп калдым. Алар Айшанын курсташтары экенин дароо эле тааныдым. Көңүлдүү сүйлөшүп келаткан кыздардын эң артында башын жерге салып жалгыз келаткан Айшаны көрүп, жүрөгүм зыр дей түштү. Бир нерседен корунгандай сумкасын эки колу менен мыкчый кармап, көздөрү аянычтуу жалдырайт. Боорум ооруп кетти. Чуркап барып көкүлүнөн сылап, көңүлүн көтөргүм келди. Бирок кандайдыр бир күч бутумду тушап койгонсуп, турган ордумда кала бердим. Бетим чыдабай бурулуп кете турган болгонумда Айшанын курдашы Айзада мени көрө койду да, кыйкырып жиберди.
– Айша, карасаң!
Айша жалт карады да, мени көздөй эки кадам шилтеп, кайра токтой калды. Көздөрүнүн чарасына жаш толуп баратты. Эрдимди кесе тиштеген мен аргасыздан шарт бурулуп жөнөдүм. Айшанын жаш толгон көздөрү артымдан узата карап турганын сезип, далым чымырап, бутум үзүлгүчө качып кетким келди. Ошол учурда менден жексур, менден ташбоор адам жок болчу. Башым эңги-деңги болуп, бак-дарактар, асман, жол, бардыгы теңселип, көзүмө эч нерсе көрүнбөй баратты. Ошол күнү шаарда таң аткыча жалгыз басып жүрдүм. Бирок өмүрдөгү эң чоң бакытым өзүң болдуң. Аттиң, бакыт чөйчөгү эч качан толук болбойт тура.
Кудай бирин берсе, бирин алып коёт тура. Бизге бир наристе берип койсо, кандай бактылуу болот элек...
Иман муңканып барып токтоду. Ал көкү­рөгүнө жабыша кулак түргөн Гүл­наранын чачынан жумшак искеп койду. Гүлнара башын шак көтөрүп, Иманды чыдамсызык менен суроолуу карады.
– Анан, ошол боюнча көрүш­пөй калдыңарбы?
– Көрүштүк. Арадан бир-эки ай өткөндөн кийин бизди чет мамлекетке гастролго жөнөтмөй болуп калышты.
– Ооба, гастролго кетет деп шашылып, үйлөнүү тоюбузда ак көйнөк кийбей калбадым беле.
– Эсиңде турбайбы, сага ак көй­нөк издеп дүкөндөрдү кыдырып жүргөнбүз. Такыр таппай коюп, айлам кеткенде сатуучуга кайрылдым.
– Эже, үйлөнүү тойго колуктунун кийимин кайдан тапсак болот?
Сатуучу аял баш-аягыма бир көз жүгүртүп алып:
– Өзүңдүн үйлөнүү тоюңабы?- деди.
– Ооба,- деп мен ыңгайсыз күл­дүм.
Ошол учурда артымдан бир нерсе сынып, тарс деп жерге түшкөндөй болду. Чочуп кеткен мен артыма кылчайып, мени тиктеп турган Айшаны көрдүм. Колундагы сатып алган нерсе быркыранып жерде жатты. Сатуучу колун жаңсагылап бир нерсе деп жатканы кулагыма кирбей, аны карап эле катып калдым. Ичи чоңоюп, ай-күнүнө жетип калган кези экен. Өңү бозоруп, бир пас мени тиктеп турду да, эрдин кесе тиштеп, үн катпай бурулуп кете берди. Артынан узата караган мен быркыранган айнектерди карап кала бердим. Ошол көз караш мени муунтуп баратты. Айшанын ошол көз карашы азыркыга чейин көз алдымдан кетпейт. Ушуга чейин «а-а, байкуш, сен деле бир көр пенде белең?..» дегенсиген сүрдүү көздөр өмүр бою кубалап келди. Өмүрүмдөгү эң оор мүнөттөр ошол болсо керек. Ошондо эмне деп ойлоду экен, кургурум? Ушуга чейин таң калам, эмнеге эч жерге арызданбай, эч кимге эч нерсе дебей, баардыгын унчукпай көтөрүп койду? Атасынын байланыштары менен ишиме кедерги кылып, карьерама бут тосуп койгонго деле акысы бар эле да. Ал антпеди.

Нуржамал Жийдебаева

(Уландысы кийинки саныбызда)



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(2)
05.04.2010. 13:28 
Тайпасы:
Кыймылы жок
Комментарийлердин саны:
43
Катталган:
04-11-2009
Соӊку аракети:
02-10-2013 22:20
Жынысы:
Белгисиз
0
Анан....
06.04.2010. 18:27 
Тайпасы:
Кыймылы жок
Комментарийлердин саны:
24
Катталган:
20-02-2010
Соӊку аракети:
30-06-2016 22:50
Жынысы:
Белгисиз
Калаасы:
korea
0
банан
1
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21471;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: