ЖЫЛДЫЗ ТӨЛГӨ (13-марттан 19-мартка чейин)

Астролог Жанар Кадыралиев сунуш кылат.

МАРТ КАЙСЫ ЖЫЛДЫЗГА МАРТТЫГЫН КӨРСӨТӨТ?

Букачарлар 13-марттан 8-апрелге чейин болуп көрбөгөндөй активдүү болуп чыга келишет. Бир жумушту бүтүрүп экинчисине, экинчиден үчүнчүгө өтүп, андан ары башка жумуштарга да бой таштап иштейсиз. Оңою менен чарчабайсыз. Мурда үйдөн такыр чыкпаган салмактуу, жалкоо адам болсоңуз да, бул мезгилде сиз үйдө отурбай каласыз. Бардык демилгени өзүңүз көтөрөсүз. Бул мезгил көптөн бери топтолгон көйгөйлөрдү тез арада чечүү үчүң эң ыңгайлуу. Андыктан алга! Бирок шашмалыгыңыз да бул учурда күчөп тургандыктан жолдо абайлап жүрүңүз. Электр шаймандары менен иштөөдө, курал алып жүрүүдө, жарылуучу жана күйүүчү заттар менен кылдаттык менен иштөө талап кылынат.



КОЙ (21.03-20.04)
Аптанын баш ченинде акча маселеси жана жумушуңузга байланыштуу ийгиликтер күтөт. Кесиптештер менен жакшы тил табышасыз. Башка шаардагы өнөктөштөр, туугандар менен сүйлөшүүлөр жакшы жүрөт. Жолго чыгуу күтүлөт. Жума күндөн тартып текшерүү иштери болушу ыктымал, алыскы жактан жагымсыз кабар келиши мүмкүн.


БУКАЧАР (21.04-20.05)
Жуманын биринчи жарымын үй-бүлөлүүлөр убактысын балдары менен көңүлдүү өткөрүшөт. Эгер бойдок болсоңуз, романтикалык маанайда же жөн гана жагымдуу эс алууну баштан кечиресиз. Колуңузга акча тийиши күтүлөт. Аптанын акырында күтүлбөгөн чыгымга дуушар болушуңуз ыктымал.


ЭГИЗДЕР (21.05-21.06)
Шаршемби күндүн аяк ченине чейин оорукана, жабык типтеги ишканаларга байланыштуу иштер ийгиликтүү аяктайт. Көп нерсени ачыкка чыгарбаганыңыз оң. Үй, кыймылсыз мүлк, жер тилкелери боюнча маселелер болсо бейшембиге чейин бүтүрүңүз. Бейшембинин кечки маалынан тартып сак болуңуз, чырлашуу же юридикалык көйгөйлөр келип чыгышы мүмкүн.


БӨЙӨН (22.06-22.07)
Аптанын биринчи жарымында достор, бир туугандар жана кошуналар менен иш алып барасыз. Ошентсеңиз баары жакшы чечилет. Жумушта жүрөк өйүгөн маселеңиз болсо, жетекчиңизге тартынбай кайрылыңыз. Чечип берүү ыктымалдуулугу бир кыйла жогору. Ден соолугуңузду караңыз. Бирөө акча сураса, бербегениңиз туура, кайтаруусу кыйын болот.

АРСТАН (23.07-23.08)
Жуманын биринчи жарымында койгон максаттарыңызга жетесиз. Акча маселелери жакшы чечилет. Алыскы шаарларда жашаган балдарыңыз, туугандарыңыз же өнөктөштөр менен жолугушуулар болот. Эс алуулар орун алат. Бейшембиден тартып балдарыңызды бейчеки бастырбаңыз. Ден соолугун абайлаңыз. Бойдок арстандар эс алуу учурунда жагымсыз жагдайларга туш болушу мүмкүн.


БИЙКЕЧ (24.08-23.09)
Бейшемби күнгө чейин башка шаарларда жашаган адамдар менен жагымдуу сүйлөшүүлөр жүрөт. Акча жана мурас, бөтөн буюмдарга байланыштуу нерселер сиздин пайдаңызга чечилет. Үй чарбасынын ыңгайлуулугун карайсыз. Аптанын акырында кыймылсыз мүлк, жер тилкелери же жеке буюмдар боюнча түшүнбөстүк келип чыгышы мүмкүн.


ТАРАЗА (24.09-23.10)
Бул жуманын орто ченине чейин жашыруун аракеттер аркылуу акча, мурас, бөтөн буюмдарга байланыштуу иштерди сиз өз пайдаңызга чечесиз. Туугандар менен сүйлөшүүлөр көп болот. Айрым бир кагаз иштери, юридикалык документтер оң чечилет. Бейшемби күндөн тартып жол жүрүүдө абайлаңыз. Туугандарыңыз жөнүндө көбүрөөк жакшы нерселерди ойлогонго аракет кылыңыз.


ЧАЯН (24.10-22.11)
Достор, өнөктөштөр жана чакан ишканалар менен активдүү иш алып баруунун негизинде жуманын биринчи жарымында ийгиликтерге жетишесиз. Акча маселелери жакшы чечилет. Бирок жума күндөн баштап тескерисинче, акча маселелери биринчи орунга чыгат. Чыгашалар көп болушу ыктымал. Колго көтөргөн жана үй буюмдарыңызга да сак болуңуз.


ЖААЧЫ (23.11-21.12)
Шаршемби күндүн акырына чейин жумуш жана карьера маселелери жакшы чечилет. Жетекчиге кайрылыңыз, жыйынтыгы жаман болбойт. Балдарыңыз менен жагымдуу убакыт өткөрөсүз. Бойдок болсоңуз, эс алуу, сүйгөнүңүз менен сейилдөө күтүлөт. Аптанын акырына жакын айрым адамдар сиздин кадыр-баркыңызга көлөкө түшүрүүгө аракет кылуусу мүмкүн. Тоскоолдук жаратуу ыктымалдуулугу жогору. Андыктан этият болуңуз.


ТЕКЕЧЕР (22.12-20.01)
Аптанын башында сизди жагымдуу эс алуу күтөт. Өз алдыңызча иштөөнүн негизинде үй-бүлөдөгү көп маселелерди ийгиликтүү чечесиз. Сиз жуманын аяк ченинде жашыруун душмандардын курмандыгына айланышыңыз ыктымал. Жабык типтеги ишканаларда, ооруканаларда жагымсыз жагдайларга дуушар болушуңуз мүмкүн. Абайлаңыз.


СУУ КУЯР (21.01-19.02)
Достор, чакан ишканалар, туугандар менен аптанын биринчи жарымында көбүрөөк байланыш жасоого аракет кылыңыз. Так ушул тармактар азыркы учурда сиз үчүн жакшы жыйынтык алып келиши ыктымал. Документ иштери ийгиликтүү бүтөт. Аптанын аяк ченинде айрым ишканалардын, достордун чыккынчылыгына дуушар болушуңуз мүмкүн. Сиздин мурда көрсөткөн жакшылыгыңызды заматта унутуп коюусу күтүлөт.


БАЛЫК (20.02-20.03)
Карьера маселесин чечүү, жетекчиге кайрылуу үчүн аптанын биринчи жарымы сизге эң ыңгайлуу. Айлык маянаңыздын көбөйүшү же колуңузга акча тийүүнүн да ыктымалдуулугу жогору. Жуманын акырында айрым кесиптештериңиз бут тосконго өтүшү мүмкүн. Жетекчиңиз менен жакында эле жакшы чечкен маселени тескери айландырып жиберүүнүн ыктымалдуулугу бир топ жогору. Алдын ала абайлаңыз.