6-7-8-АПРЕЛЬ... ХРОНИКА

Мезгил үнү

Жашоо-турмуштун улам оордоп баратканына чыдабаган эл Кыргызстандын жакынкы тарыхында экинчи ирет элдик ыңкылап жасады. Тынч митингге чогулгандар алгач бийликти алмаштырышып, элдик бийлик орнотуп тынышты. Бирок жеңиш курмандыксыз болгон жок. 7-апрель Кыргызстандын тарыхында кандуу шаршемби катары калды.

6-АПРЕЛЬ

11:44 Таласта милиция кызматкерлери “Ата Мекен” партиясынын лидерлеринин бири Болот Шерниязовду “мамлекеттик ыңкылап жасоого аракет кылды” деген негизде камакка алышты.
12:11 Таласта 3 миңге жакын адам облустук администрацияга бастырып барып, губернаторду барымтага алып, Болот Шерниязовду камактан чыгарышты.
13:12 Нарында аксакалдар чогулушуп, губернатор Алмазбек Акматалиевди “эл тарапка өт” деп үндөй башташты.
14:03 Талас шаарына чогулган митингчилер облустук администрацияга кирип барышты.
14:58 Таласта чогулган эл облустук Ички иштер башкармалыгына кирүүгө аракет жасашты.
16:13 Таласта митингге чогулган эл Курманбек Бакиевдин сүрөтүн өрттөштү.
16:52 Элдик курултай комитети Таластагы окуялардан улам укук коргоо органдарына кайрылуу жасап, элге каршы курал колдонбоого чакырды.
18:01 Таласка 5 учак менен атайын даярдыктан өткөн аскерлер жеткирилди.
19:58 Премьер-министр Данияр Үсөнов маалымат жыйынын өткөрүп, Таласта абал тынч экенин айтты.
20:30 Таласта Болот Шерниязовду Улуттук Коопсуздук кызматынын адамдары кармап кетишти. Облустук администрация күч структурасынын колуна өттү.
21:30 Ош шаарында милиция кызматкерлери оппозициячы Дүйшөн Чотоновду кармап кетишкени маалым болду.
21:53 Бишкекте “Ата Мекен” партиясынын лидери Өмүрбек Текебаевди күч органдары үйүнөн кармап кетишкени тууралуу кабар тарады.
22:09 Бишкекте Алмазбек Атамбаевди кармоого аракет жасалды.
22:13 Жаалданган эл кайрадан облустук администрациянын имаратын басып алды. Күч органдары Талас ИИБинин имаратына жашынышты.
22:28 Бишкекте Эмил Каптагаев менен Турат Мадылбеков камакка алынды.
23:00 Ошто Анвар Артыков камакка алынды.

7-АПРЕЛЬ

01:15 Бишкекте милиция кызматкерлери Алмазбек Атамбаевди кармап кетишти.
01:32 Депутат Иса Өмүркулов камакка алынды.
07:05 Орусиядан келген Темир Сариевди милиция кызматкерлери “Манас” аба майданынан кармап кетишти.
09:13 Экс вице-премьер-министр Элмира Ибраимова камакка алынды.
09:44 Нарында райондук акимчиликтин алдына атчандар чогулушту.
09:50 Абдыганы Эркебаев камакка алынды.
09:53 Милиция кызматкерлери Бишкектеги оппозиция өкүлдөрүнүн үйлөрүн тинтүүгө алып жатканы тууралуу кабар тарады.
10:11 Алайда Исмаил Исаковду коргоо комитетинин мүчөлөрү камакка алынышты.
10:35 Сокулук районунун акимчилигинин алдында “Темир Сариевди бошоткула” деп 1000ге жакын адам чогулду.
11:00 Таласта чогулган эл оппозициячыларды бошотуу талабын коюшту.
11:00 Өкмөт башчысы ДаниярҮсөнов парламентте депутаттарга өлкөдөгү абал боюнча маалымат берди.
11:08 Бишкекте БЭКтин штабы жайгашкан “Форум” ишканасынын имаратынын жанында чогулган митингчилер менен милиция кызматкерлеринин ортосунда кагылышуу болду.
11:10 Таласта облустук администрациянын имаратына эл кирип барды.
12:16 Нарында элдик губернатор шайланды.
12:32 Сокулукта эл Ош-Бишкек жолун бууду.
13:00 6-апрель түнү Таласта көтөрүлгөн элди басмакчы болуп барган ИИМдин башчысы Молдомуса Конгантиевди митингчилер кармап алышты. Сабоолордон соң ал элге кайрылуу жасап, милиция эл менен экенин айтты.
13:10 Бишкекте Ак үйгө атайын даярдыктагы аскерлер киргизилди.
13:30 Токмокто эл Чүй райондук акимчилигине кирип барды.
13:47 Ак үйгө кирүүгө биринчи чабуул жасалды.
14:00 Аксыда элдик аким болуп Кадыркул Өмүрбеков дайындалды.
14:10 Таласта облустук ИИБ элдин колуна өттү.
14:15 Алайда кармалган адамдар бошотулушту. Бийлик элдин колуна өттү.
14:25 Ак үйдүн алдындагы атышуулардан 5 адам жаракат алды.
14:30 Камакка алынган Темир Сариев: “Элге каршы күч колдонбогула”,- деп абактан Курманбек Бакиевге кайрылды.
15:30 Таласта эл биринчи вице-премьер-министр Акылбек Жапаров менен Молдомуса Конгантиевди катуу сабап салышты.
16:00 Токтогулда элдик бийлик орноду.
16:10 УТРК митингчилердин көзөмөлүнө өттү.
18:32 Бишкектеги №4-ооруканада Ак үйдүн алдынан жаракат алган эки адам каза болду.
18:53 Камактагы оппозиция лидерлери бошотулушту.
19:18 Эл ЖКнын имаратына кирип барды.
19:30 “Молдомуса Конгантиев өлдү” деген кабар тарады.
19:50 Ак үйдүн алдындагы атышуулардан ондогон адамдар каза тапканы белгилүү болду.є
20:00 Бийлик оппозиция өкүлдөрү менен сүйлөштү.
21:00 Курманбек Бакиев үй-бүлөсү менен “Манас” аба майданы аркылуу Бишкектен чыгып кеткендиги айтылды.
21:30 Элдик курултайдын Борбордук ­аткаруу комитети Кыргызстандагы абалды көзөмөлдөө жоопкерчилигин алгандыгын жарыялады.
22:00 Элдик курултайдын Борбордук аткаруу комитетинин курамы такталды. Ага 14 оппозициячы мүчө, ал эми төрайымы болуп Роза Отунбаева дайындалды.
23:30 Генерал Исмаил Исаков абактан бошотулду.
23:57 Данияр Үсөнов өкмөт башчылык кызматынан кеткендиги жөнүндө арызын жазып берди.

8-АПРЕЛЬ

00.20 Ак үй тараптан ок атуулар токтоду.
00:32 Чогулган эл Ак үйгө кирип барды.
01:00 Бишкекте талап-тоноолор башталды. Мындай аракеттер таң атканга чейин уланды.
07:30 Курманбек Бакиевдин Ош шаарындагы резиденцияда экендиги маалым болду.
08:00 Орусия менен Казакстан “Курманбек Бакиевди кабыл албайбыз” дешкендиги тууралуу маалымат тарады.
09:00 Курманбек Бакиев Жалал-Абадга баргандыгы айтылды.
10:30 Жалал-Абадда Курманбек Бакиевди колдогондор митинг өткөрүштү.
11:00 Ошто элдик губернатор болуп Кушбак Тезекбаев шайланды.
11:30 Баткенде элдик губернатор шайланды.
12:00 Оппозиция өкүлдөрүнөн турган убактылуу өкмөт түзүлдү.
12:30 Ак үйдүн алдында эл кайра чогулуп, Жаныш Бакиев менен Данияр Үсөновдун чыгышын талап кылышты.
12:40 “Азия Универсал Банкы”, “Ысык-Көл”, “Кыргыз кредит”, “Манас”, “Акыл” банктарынын ишмердүүлүгү Улуттук банктын көзөмөлүнө өттү.
13:52 Саламаттыкты сактоо министрлигинен алынган маалыматтар боюнча каза болгондордун саны 75ке, ал эми жабыркагандардын эсеби 1000ге жетти.

МЕРТ БОЛГОНДОРДУН ЖАКЫНДАРЫНА
1 МИЛЛИОН СОМДОН БЕРИЛЕТ

Убактылуу өкмөт коогалаңда каза тапкандардын үй-бүлөлөрүнө компенсация иретинде 1 миллион сомдон төлөп берүү чечимин чыгарды. Бул тууралуу Убактылуу өкмөт башчысынын каржы иштери боюнча орун басары Темир Сариев билдирди. Ал: “8-апрелде кечки саат тогузда дагы бир адам каза тапты. Аны менен мерт болгондордун саны 75ке жетти. Бул маркумдардын жакындарына мамлекеттин эсебинен 1 миллион сомдон көмөк берилет. Оор жаракат алып, ооруканада жаткандарга 100 миң сомдон, ал эми жеңил жаракат алгандарга 20-30 миң сомдон берилет”,- деп билдирет.

Айбек Кочкоров
politika@super.kg

№ 388, 10-15-апрель, 2010-ж.