БИР БҮРКҮМ

2016-жылы өлкө аймагында МАС АБАЛДАГЫ айдоочулардын айынан 436 жол кырсыгы катталып, 65 адам көз жумган. Аталган маалыматты ички иштер министри Улан Исраилов тастыктады.
2017-жылдын алгачкы 3 ай ичинде борбор калаада ЭХИНОКОККОЗ жана АЛЬВЕОКОККОЗ оорусу боюнча 117 учур катталып, былтыркы жылга салыштырмалуу 47,5 пайызга өскөн. Бул боюнча Бишкектин Санитардык-эпидемиологиялык көзөмөл борборунан кабарлашты.
Билим берүү жана илим министрлиги жаңы окуу жылынан тартып 5-класстын окуучуларына күн сайын 1 сааттан АНГЛИС ТИЛИН кошумча окутууну баштайт.
Кыргыз өлкөсүнүн жарандары КАЗАКСТАНДА 30 күнгө чейин каттоосуз жүрүүгө укук алышты. Аталган документке президент Алмазбек Атамбаев кол койду.
Мектепти АРТЫКЧЫЛЫК АТТЕСТАТЫ менен бүтүргөн окуучулар мындан кийин мамлекеттик экзамендерден бошотулбайт жана жалпы республикалык тестирлөөдө кошумча 20 балл берилбейт. Бул боюнча Улуттук тест борборунан маалымдашты.
Бишкек шаарына 130 миң ЖООГАЗЫН отургузулду. Андан сырткары 20 башка түрдөгү гүлдөр тигилген.
Өлкөдө учурда Улуу Ата Мекендик согуштун 647 АРДАГЕРИ бар. Бул боюнча Эмгек жана социалдык өнүктүрүү министрлигинен билдиришти.
Ош, Жалал-Абад облустарында дарыя суусунун деңгээлинин көтөрүлгөнүнө байланыштуу КООПТУУ АБАЛ жаралууда. ӨКМнын гидрометеорология агенттигинин билдиришинче, 21-22-апрель күндөрү өлкө боюнча туруксуз аба ырайы күтүлөт.
2013-жылдан 2016-жылга чейин чет өлкөнүн жарандары Кыргыз мамлекетинен 75 баланы АСЫРАП АЛЫШКАН.
АЗАМАТ ҮСӨНОВ Кыргыз өлкөсүнүн Кытайдагы элчиси болуп дайындалды. Буга чейин ал тышкы иштер министринин орун басары болуп эмгектенген. Үсөнов Бишкек шаарынын мэри Албек Ибраимовдун күйөө баласы экени айтылууда.
Ысык-Көл облусундагы бардык ПАНСИОНАТТАР 1-июнга чейин паспорттоштурулуп бүтүшү керек. Аталган маалыматты облус жетекчиси Узарбек Жылкыбаев билдирди.
Бишкектеги «ДЫЙКАН» БАЗАРЫ 21-апрелден баштап жабылат. Буга ал жердеги коопсуздук шарттарынын жоктугу себеп болгон. Базарда иштеген соодагерлер «Сары-Өзөн» жана «Дордой моторс» базарларына көчүрүлүп, 3 айлык ижара акысынан бошотулат.
2017-жылы республика боюнча 280 чакырым ЖОЛ салынат. Былтыр бул көрсөткүч 124 чакырымды чапчыган. Маалыматты транспорт жана жолдор министри Жамшитбек Калилов билдирди.

Бектур Токтоноев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 755, 21-27-апрель, 2017-ж.