Алмазбек Атамбаев: “АВТОРИТАРДЫК РЕЖИМ ЭЧ КАЧАН ТҮПТӨЛБӨГӨНДӨЙ КЫЛАБЫЗ”

Оппозиция лидерлери парламенттин таратылгандыгын жана мамлекеттик функциялардын баарын жаңы түзүлгөн Убактылуу өкмөт аркалай тургандыгын жарыялашты. Мамлекетте болуп жаткан кырдаал жана жаңы бийликтин алдыга койгон пландары тууралуу Убактылуу өкмөттүн вице-премьери Алмазбек Атамбаев “Эркиндик” радиосуна төмөнкүчө маалымдайт.

– Учурда Бишкек шаарындагы кырдаалды ким көзөмөлгө алып жатат?
– Мамлекеттеги кырдаалды толугу менен жаңы түзүлгөн өкмөт колуна алды.
– Сиз кырдаалды өкмөт көзөмөлгө алгандыгын ишенимдүү айтып жатасызбы? Көчөлөрдө талап-тоноочулар тынчтаныштыбы?
– Учурда шаар ичи тынч, бирок кооптонуулар бар. Бакиевдин бандиттери провокация кылышы мүмкүн деп күтүп жатабыз. Себеби шаарга куралданган адамдарын коё беришиптир.
– Алар ким аркылуу шаарга коё берилишкен?
– Митингге чыккан эл Ак үйдүн жанында тынч митингге чогулуп, “Бакиев кетсин!” деген ураандарды айтып жатышкан. Анан элге каршы ок атылды. Снайперлер тарабынан 70тен ашуун адам өлтүрүлдү. Өзүңүздөр ойлоп көрүңүздөрчү, куралсыз адамдарга ок атууга буйрук берген, ал буйрукту ишке ашырган адамдардын колунан азыр оңдуу иш келеби?
– “Бул өлүмдөрдүн артында Курманбек Бакиев өзү турат” деп айтууга сизде ишенимдүү далил барбы?
– Бизде Курманбек Бакиев отурган Ак үйдүн чатырынан снайперлер ок аткандыгы тууралуу далилдер бар. Силер кандай ойлойсуңар, аткыла деп аларга ким буйрук бериши мүмкүн?
– Расмий түрдө азырынча Кыргызстандын президенти же эми экс-президент дейбизби, Курманбек Бакиев “Москва жаңырыгы” радиосуна берген маегинде өз ыктыяры менен бийликти өткөрүп бербесин билдириптир. Чын эле ушундай болсо, оппозициянын иш-аракети кандай болот?
– Андан эч ким “бийликти расмий түрдө өткөзүп бер” деп суранбайт. Кыргыз эли аны канкор деп эсептеп, сот алдында тиешелүү жазасын алсын деп талап кылып жатат. Бүгүн каза тапкандардын миңдеген туугандары келишти. Алар Бакиевдин соттолушун талап кылышууда.
– Сиздин оюңузча, кан төгүү менен бийликтин башка колдорго өтүшүн легитимдүү процесс деп айтууга болобу?
– Албетте, мындан ары деле чыдап, унчукпай жашай берүүгө болот болчу. Анда учурдагы режимдин чыныгы жүзүн жашырбай ачык айткандарды өлтүрүп, жоготууну уланта беришмек. Мына, мисалы, журналист Геннадий Павлюк киши колдуу болду. Ондогон адамдар абакка камалды.
Ар бир эл өз тагдырын өзү тандап алат. Бирок кыргыздар илгертеден эркиндикти сүйгөн, өзүн сыйлаган эл. Эгер бул режим кулатылбай, бийлигин жүргүзө берсе, учурдагыдан да көп адам өлтүрүлмөк деп ойлойм.
– Эркиндикти сүйгөн кыргыз эли мындан беш жыл мурун дал бүгүнкүдөй эле жол менен бийликке Курманбек Бакиевди алып келген эле. Эл жаңылдыбы?
– Элди каратып туруп алдап коюшту. Жеңишти элден уурдап алышты деп айтар элем. Эгерде Курманбек Бакиевдин беш жыл мурун эл алдында берген убадасын эске салсак, үй-бүлөлүк башкарууну жоймок. Бирок баарын теңирден тескери кылды. Ал басма сөзгө, телеге эркиндик алып келмек. Ал сөзүнүн да өтөсүнөн чыкпады. Коррупцияны жоём деген. Бирок коррупцияга белчесинен баткан режим түздү. Биз эми Кыргызстанда авторитардык режимди түзүүгө мүмкүнчүлүк болбой тургандай кылабыз.
– Убактылуу өкмөт буга кепилдик бере алабы?
– Баш мыйзамды өзгөртмөйүнчө парламенттик же президенттик шайлоо өткөрбөйбүз. Биз парламенттик республика түзүү чечимине келдик. Мындай өлкөдө бир адам бардык бийликти өз колуна топтоп, каалаганын жасай албайт. Бүткүл өлкө бир үй-бүлө үчүн иштеп да калбайт.