САЯСАТ ЖАНА КООМ ЖАҢЫЛЫКТАРЫ

УБАКТЫЛУУ ӨКМӨТТҮН ДЕКРЕТИ

14-апрелде Курманбек Бакиев Жалал-Абаддагы Тейит айылында укук коргоочулар А.Абдрасулова жана Т.Исмаилованы кабыл алды. Жолугушуу учурунда Курманбек Бакиев Убактылуу өкмөт жетекчилери менен сүйлөшүүгө даяр экенин билдирген.

Төлөйкан Исмаилова Курманбек Бакиевдин “кетиш оңой, кетип калганга да мүмкүнчүлүгүм бар. Бирок мен кетпейм. Анткени Кыргызстандын бүгүнкү абалын түшүнүп турам. Эртеңки абалын да ойлош керек. Укуктук процедуралар сакталыш керек. Сакталбаса бийликтин алмашуусу легитимдүү болбой калат” деген кебин жарыя кылды. Курманбек Бакиев өзүнүн коопсуздугун камсыз кылууну Убактылуу өкмөткө биринчи шарт катары койду. Ошондой эле ал президентке караштуу мүлктөрдү рейдерлик жол менен тартып алууну токтотууну суранган. Ал эми бир туугандары жөнүндө “алардын өзүнчө статусу бар, мыйзам чегинде жооп беришсин” деген оюн билдирген. “Эң негизгиси, ал сүйлөшүүлөргө даяр”,- деп билдирди Төлөйкан Исмаилова.
Ал эми Азиза Абдрасулова: “Курманбек Бакиев кандуу окуяларда күнөөсү бар экенин моюнуна алды”,- деп айтты. Алардын айтымында, К.Бакиев Убактылуу өкмөт менен сүйлөшүүгө даяр экенин айтып, Роза Отунбаеванын Жалал-Абадга келүүсүн суранган. Отунбаеванын коопсуздугун Бакиев өзү камсыздап берүүгө даяр экенин билдирген.
Бул тууралуу Роза Отунбаева “сүйлөшүүлөр баштала элек. К.Бакиев өзүнө гана эмес, туугандарына жана жакындарына да кепилдик сурап жатат. Бакиевдин жакындарына кантип кепилдик беребиз?! Жакындарынан Жаныш Бакиев, экс-Коргоо министри Бакыт Калыев да бар, аларды кантип жоопкерчиликтен бошотуп коёбуз?..” деген оюн билдирди.

Кыргызстандын маданият жана чыгармачыл союздарынын өкүлдөрү Кыргызстандын Убактылуу өкмөтүнүн төрайымы Роза Отунбаева­га кайрылуу жолдошту.
Анда кандай гана өлкө, улут болбосун анын жашоосунда маданият зор ролду ойноору белгилүү экенин баса белгилешкен. Ошондуктан агенттикке айланган маданият тармагына кайрадан министрлик статусун берип, жетекчилигине да кесибин мыкты билген маданият ишмери деп баалашып, Садык Шер-Нияздын талапкерлигин сунушташкан.

Бишкек шаардык ички иштер башкармалыгынын маалыматына караганда, Н.Мотуевге Кылмыш-жаза кодексинин 174-беренеси боюнча кылмыш иши козголду. Анткени 25-мартта Нурлан Мотуев “Учур” гезити менин ар-намысыма шек келтирди” деп гезиттин төрт компьютерин талкалап салган. 7-апрелден бери Нарында жүргөн Нурлан мырза болсо “мен Курманбек Бакиевдин кадры эмесмин. Азыр эл менен бирге Нарындамын” деп үн катты.

Бул тууралуу Орусиянын ММКлары маалымат таратты. Анда Орусиянын өкмөт башчысы Владимир Путин Кыргызстандын ички ишине Орусия бийлигинин кийлигишпей турганын, бирок мындай оор кырдаалда гуманитардык жана акчалай жардам көрсөтүлөрүн билдирген. Ошондой эле маалыматта Орусиядан Кыргызстанга 20 миллион доллар грант, 30 миллион доллар жеңилдетилген кредит берилери айтылат. Ал эми вице-премьер Игорь Сечин жакын арада Кыргызстанга 25 миң тонна күйүүчү май, 1,5 миң тонна үрөн жөнөтүлөрүн кошумчалаган.

Кыргызстандын Убактылуу өкмөтү кабыл алган 12-декрети менен Конституциялык сотту таркатты. Бул тууралуу коомчулукка Азимбек Бекназаров билдирди. Ал: “Консот 1993-жылы түзүлгөн. Бирок ушунча жыл аралыгында ишенимди актабай, Акаевдин жана Бакиевдин бийлигин бекемдөөгө көмөк болуп келди”,- дейт өз сөзүндө. Жаңы Конституциялык сот кайрадан түзүлөбү же жокпу азырынча белгисиз.

Убактылуу өкмөт тарабынан таркатылган парламенттин “Ак жол” фракциясынын айрым депутаттары президентке импичмент жарыялоого макулдугун беришкен. Алар Курманбек Бакиевге импичмент жарыялоо максатында атайын кол топтошууда. 14-апрелге карата кол топтогондордун саны 21ге жеткен. Алар: А.Салымбеков, Г.Куликова, Б.Наргозуев, Ж.Жакыпов, Н.Молдобаев, Ж.Каниметов, А.Байбураева, Ж.Рахимдинова, Р.Абдраимова, А.Иманалиева, А.Кенжебаева, Ш.Садыбакасова, А.Юсуров, П.Тулендибаев, Э.Арсалиев, Б.Абдырасаков, М.Исанова, Д.Кыдыров, М.Кунакунов, Б.Нуржанов, Г.Базаркулова.

МОЛДОМУСА КОНГАНТИЕВ КЫРГЫЗСТАНДА

Мурдагы Ички иштер министри Молдомуса Конгантиев: “Мен чет өлкөгө качып кеткен жокмун, Кыргызстандамын”,- деп ММКларга кайрылуу жолдоду. Ал ММКлар аркылуу “Конгантиев өлкөдөн чыгып кетти” деген такталбаган маалыматтардын таралып жатканына тынчсызданып жатканын да билдирет. “Мен эч жакка кеткен жокмун. Таластагы болуп өткөн окуядан мен гана эмес, башка көптөгөн адамдар жабыркады. Азыр ден соолугума байланыштуу соттун алдына келип жооп бере албайм. Бирок мендеги маалыматтарды акыйкаттык үчүн берүүгө даярмын”,- дейт Конгантиев кайрылуусунда.

Убактылуу өкмөттүн башчысы – Роза Отунбаева.
Өкмөт башчысынын биринчи орун басары – Алмазбек Атамбаев.
Өкмөт башчысынын орун басары, Каржы министри – Темир Сариев.
Өкмөт башчысынын орун басары – Өмүрбек Текебаев.
Коргоо министри – Исмаил Исаков.
Ички иштер министри – Болот Шерниязов.
Мамлекеттик улуттук коопсуздук кызматынын төрагасы – Кеңешбек Дүйшөбаев.
Убактылуу өкмөттүн мүчөсү – Эмилбек Каптагаев
Убактылуу өкмөттүн социалдык тармак, коомчулук менен байланыш жана ММК боюнча координатору – Элмира Ибраимова.
Сот жана прокуратура иштери боюнча координатор – Азимбек Бекназаров.
Саламаттыкты сактоо министринин милдетин аткаруучу – Дамира Ниязалиева.
Энергетика министринин милдетин аткаруучу – Осмонбек Артыкбаев.
Баш прокурордун милдетин аткаруучу – Байтемир Ибраев.
Убактылуу өкмөттүн төрайымынын Борбордук аткаруу комитетинин аппарат башчысы – Эдил Байсалов.
Маданият министринин милдетин аткаруучу – Рыскелди Момбеков.
Каржы полициясынын төрагасынын милдетин аткаруучу – Эркин Бөлөкбаев.
Бажы кызматынын төрагасынын милдетин аткаруучу – Кубан Кулматов.
Кадрдык кызматтын төрагасынын милдетин аткаруучу – Чолпонкул Арабаев.
Мамлекеттик каттоо кызматынын төрагасынын милдетин аткаруучу – Алмамбет Шыкмаматов.
КРнын Аскердик прокурорунун милдетин аткаруучу – Айбек Турганбаев.
Жаза өтөө кызматынын төрагасынын милдетин аткаруучу – Таалайбек Нуралиев.
Салык кызматынын төрагасынын милдетин аткаруучу – Адылбек Касымалиев.
Жогорку Соттун төрагасынын милдетин аткаруучу – Кубанычбек Момбеков.
Социалдык фонддун төрагасынын милдетин аткаруучу – Мукан Абулгазиев.
Мамлекеттик материалдык резерв фондунун төрагасынын милдетин аткаруучу – Темиркан Береналиев.
Медициналык камсыздоо фондунун төрагасынын милдетин аткаруучу – Болот Элебесов.
Бишкек шаарынын мэринин милдетин аткаруучу – Иса Өмүркулов.
Ысык-Көл облусунун губернаторунун милдетин аткаруучу – Мирбек Асанакунов.
Чүй облусунун губернаторунун милдетин аткаруучу – Сагынбек Абдрахманов.
Жалал-Абад облусунун губернаторунун милдетин аткаруучу – Бектур Асанов.
Талас облусунун губернаторунун милдетин аткаруучу – Койсун Курманалиев.
Айыл чарба министринин милдетин аткаруучу – Кубат Касейинов.
Адилет министринин милдетин аткаруучу – Аида Салиянова.
Эсеп палатасынын төрагасынын милдетин аткаруучу – Бакытбек Аширов.
Билим берүү министринин орун басары – Ирина Карамушкина.
Коргоо министринин орун басары – Кубанычбек Орозбаев.
Дене тарбия жана спорт мамлекеттик агенттигинин директорунун милдетин аткаруучу – Алмазбек Касенов.
Өзгөчө кырдаалдар министринин милдетин аткаруучу – Дүйшөнкул Чотонов
Энергетика министринин орун басарынын милдетин аткаруучу – Эркин Абдыкалыков.
Саламаттыкты сактоо министринин орун басарынын милдетин аткаруучу – Оморбай Нарбеков.
Айлана-чөйрөнү коргоо жана токой чарбасы боюнча мамлекеттик агенттиктин директору – Топчубек Тургуналиев.
КРнын Аскердик сотунун төрагасынын милдетин аткаруучу – Ашимбек уулу Нурлан.
Балыкчы шаардык сотунун төрагасынын милдетин аткаруучу – Замирбек Базарбеков.
“Дастан” ААКсынын Башкаруу кеңешинин төрагасынын милдетин аткаруучу – Сергей Даниленко.
Тышкы иштер министринин милдетин аткаруучу – Руслан Казакбаев.

P.S. Өкмөттүн курамы жакынкы күндөрү дагы толукталмакчы.

Айбек Кочкоров
politika@super.kg