«Жашообуздун эң маанилүү күнү болду. Биздин үй-бүлөбүз дагы бир адамга толукталды. Уулдуу болдук» деп төкмө акын Элмирбек Иманалиев менен ырчы Гүлбү Ороскул кызынын кызы Айзуура кубанычтуу кабары менен бөлүштү. 11-сентябрь күнү жарыкка келген наристенин атасы, алпаруучу Мирзат Муканов: «Сүйүнүчүм коюнума батпай турат. Учурда эне-баланын ден соолугу жакшы. Уулума чоң атасы Мырза деген 6-чоң атасынын ысымын ыйгарды»,- дейт.
Наристе үнү жаңырган майрам ырчы Мерген Тургандын да үй-бүлөсүндө орун алып, ал бизге чоң ата болгонун сүйүнчүлөдү: «Неберем 8-сентябрда төрөлдү. Үйүбүз наристе жыттанып, өзүнчө эле бапырап жатабыз. Неберемдин атын өзүмдүн апамдын атынан Үмүт деп койдум»,- дейт.