ТОЙ ДАСТОРКОНУНА САЛАТТАР

Күз той мезгили. Албетте, тойдун дасторконун салаттарсыз элестетүү мүмкүн эмес. Колдо бар азыктардан жасалган жөнөкөй салатты кооздоп берүү дасторкондун көркүн гана эмес, табитти да ачат.

«МАГНАТ» САЛАТЫ

КЕРЕКТЕЛҮҮЧҮ АЗЫКТАР:
Уйдун эти – 500 грамм
Сабиз – 2 даана
Картошка – 2 даана
Пияз – 1 баш
Туздалган бадыраң – 3 даана
Майонез – 4 аш кашык
Татымына жараша туз

• Уйдун эти менен картошканы сууга бышырып, төрт чарчы формасында туурайбыз.
• Сабизди аарчып, төрт чарчы формасында туурап, майга кууруп алабыз.
• Пияз менен туздалган бадыраң да төрт чарчы формасында тууралат.
• Азыктардын баарын чоң идишке салып, майонезди кошуп аралаштырабыз.
• Даяр болгон салатты куймакка ороп, көк чөптөр менен кооздоп дасторконго коюуга болот.

ТҮСТҮҮ КУЙМАК

КЕРЕКТЕЛҮҮЧҮ АЗЫКТАР:
Ун – 1 стакан
Жумуртка – 1 даана
Айран – 1 стакан
Өсүмдүк майы – 1 аш кашык
Ашканада колдонулуучу боёк – 1 тамчы
Көбүрткүч – 0,5 чай кашык
Туз – 1 чымчым

ДАЯРДОО ЖОЛУ:

• Чуңкур идишке жумуртканы чагып, көбүрткүчтү, бир чымчым тузду кошуп аябай чалабыз.
• Эми буга айран менен өсүмдүк майын куюп аралаштырып, ун менен боёкту кошуп жакшылап аралаштырабыз.
• Табанын бетин майлап, камырдан аздан куюп куймакты бышырып алабыз.

«КЕЛИН» САЛАТЫ

КЕРЕКТЕЛҮҮЧҮ АЗЫКТАР:
Айран – 4 аш кашык
Майонез – 4 аш кашык
Ышталган тоок эти – 150 грамм
Жумуртка – 2 даана
Козу карын – 150 грамм
Сыр – 100 грамм
Картошка – 3 даана
Пияз – 1 баш
Өсүмдүк майы – 2 аш кашык
Татымына жараша туз

ДАЯРДОО ЫКМАСЫ:

• Жумуртка менен картошканы сууга бышырып, сүргүчтөн өткөрөбүз.
• Жууп-тазаланган козу карынды ичке туурап, майга кууруйбуз.
• Тоок эти менен пиязды төрт чарчы формасында майда туурайбыз.
• Майонезге айранды кошуп аралаштырып, соус даярдайбыз.
• Тарелканын так ортосуна сүргүчтөн өткөрүлгөн картошканы тегерек формада салып, үстүнө соустан куябыз.
• Картошканын үстүнө тоок эти менен пиязды салып, дагы бир аз соус куябыз.
• Эми куурулган козу карынды салып, сүргүчтөн өткөрүлгөн жумуртканы себелеп, салаттын четин төрт чарчы формада тууралган сыр менен, ал эми үстүн петрушка менен кооздойбуз.

СЫР СЕБЕТИ

Сыр себетин даярдоо үчүн анын катуу түрү керектелет. Сырды сүргүчтөн өткөрүп, ысып турган табага тегиз кылып себелейбиз.
Сыр эриген кезде дароо депкир менен акырын алып, көмкөрүлүп турган стаканга же чыныга жаап, муздаганда чыгарабыз.




«ТИРОЛЬ» САЛАТЫ

КЕРЕКТЕЛҮҮЧҮ АЗЫКТАР:
Уйдун тили – 1 даана
Туздалган козу карын – 100 грамм
Туздалган бадыраң – 2 даана
Сыр – 100 грамм
Сарымсак – 2 тишче
Майонез – 2 аш кашык

ДАЯРДОО ЫКМАСЫ:

• Уйдун тилин кайнатып бышырып алабыз.
• Козу карынды, бадыраңды, сырды жана уйдун тилин таякча түрүндө, ал эми сарымсакты майда туурайбыз.
• Азыктардын баарын чоң идишке салып, майонезди кошуп аралаштырабыз.
• Даяр болгон салатты лаваштан же сырдан жасалган себетке салып дасторконго узатсаңыз болот.

«ШОП» САЛАТЫ

КЕРЕКТЕЛҮҮЧҮ АЗЫКТАР:
Салат жалбырагы – 1 тутам
Помидор – 2 даана
Бадыраң – 2 даана
Болгар калемпири – 1 даана
Пияз – 1 баш
Брынза – 200 грамм
Зайтун мөмөсү – 10 даана
Зайтун майы – 2 аш кашык
Татымына жараша туз

ДАЯРДОО ЫКМАСЫ:

• Салат жалбырагын жууп, кол менен үзүп туурап, тарелкага салабыз да, үстүнө 1 аш кашык майды чуурута куюп, бир аз туз себелейбиз.
• Жашылчалардын баарын тазалап, жууп, төрт чарчы формасында, пиязды майда туурайбыз.
• Салат жалбырагынын үстүнө тууралган болгар калемпирин, пиязды, бадыраңды, андан соң помидорду, зайтун мөмөсүн салабыз. Бир аз туздан себелеп, калган майды куябыз.
• Аягында салаттын үстүнө сүргүчтөн өткөрүлгөн брынзаны себелейбиз. Салат даяр!

Салаттарды тең ортосунан кесилген болгар калемпирине салып коюу дасторконго көрк кошот.

Дамира Арстанова
kenesh@super.kg