Мирбек Атабеков, Кыргыз Республикасынын Эмгек сиңирген артисти: «ЖАКЫНДА 2-НАРИСТЕЛҮҮ БОЛОБУЗ. КЫЗДУУ БОЛСОМ ДЕП КЫЯЛДАНЫП ЖАТАМ»

Бул сапар гезиттин жүзү жана түз эфирдин коногу кыргыздын алтын үнү Мирбек Атабеков болду. Түз эфирге чейинки фотосессия учурунда «кечигип калбайбызбы» деп улам саатын караган ырчы күйөрмандары менен жолугушууга «Супер-Инфо» гезитинин кеңсесине шашып келди.


– Коңшу өлкөнүн Кайрат Нуртас, Шахзода сыяктуу ырчылары Орто Азия жылдызына айланышты. Бизден эмнеге андай ырчылар чыкпайт? Сизде алардыкындай эле мүмкүнчүлүк, талант бар го. Орто Азияны багындырууга аракет кылбайсызбы?
– Биздики деле Кудайга шүгүр. Жакынкы өлкөлөрдө жакшы эле өзүбүздүн ордубуз бар. Элине 100 пайыз таанымал болбосок да, бизди тааныгандар, ал жакка чакыргандар бар. Бул жаатта медиа чоң роль ойнойт экен. Ошол ырчыларды жергиликтүү маалымдоо каражаттары көргөзсө, жазса анан эл тааныйт да. Экинчиден, интернет аркылуу да популярдуу болууга мүмкүн. Үчүнчүдөн, тандалган репертуар, ырдоо стили, кийингени элдин табитине жагышы керек. Коңшу өлкөнүн ырчылары биздин ырларды ырдап популярдуу болуп жүрүшөт деп айтсам жаңылышпайм.

– Сизди "ар бир сөзгө маани берген, катаны көп кечире бербеген адам" дешет, чын эле ошондойсузбу?
– Мусулман баласы үч күндүн ичинде кечириши керек деп айтылат. Анан кыргыздын «сабырдын түбү сары алтын» деген жакшы сөзү бар. Ушул сөзгө маани берип, жашоодо колдонгонго аракет кылып келе жатабыз.

– Продюсер Канат Култаев менен канча жыл иштештиңиз?
– Биз 11 жылдай чогуу иштешиптирбиз. Бул да өзүнчө бир рекорд. Кудайга шүгүр, азыр деле ошондой мамиледебиз. Учурда менин жардамчыларым – Канат Култаев, Сүйүн Токсобаев жана үй-бүлөм.

– «Style Mix» тобунун ырчыларына өкүл ата экенсиз, батир алып берет дешти эле, алып бердиңерби?
– Мындай сөз эч жерде айтылган эмес. Бирок жакшы идея экен. Муну деле ишке ашырса болот. Кудай буюрса, байыйбыз, мүмкүнчүлүктөр болот. Батир алып беребизби, мечит салабызбы, мектеп, оорукана курабызбы же ичине жабдыктарды алабызбы, анын баары алдыда.

– Жубайыңыз менен бактылуу жашап жатканыңыздын сыры эмнеде?
– Бактылуу жашоонун сыры – бардык нерсе ченеми менен болуш керек. Өтө эле жакшы көрүп жиберсең да болбойт. Кээде уулумду жакшы көрүп, кечке эле жыттай берсем, ал менден качат. Кээде жумуштун көптүгүнөн колум бошобой, уулума көңүл бура албай калсам, тескерисинче, мага ыктай баштайт.

– Жаңы үйлөнгөндө келинчегиңиздин камыр жайып жаткан видеосун жүктөдүңүз эле, азыр деле камыр жаябы?
– Келинчегим азыр деле камыр жаят. Камырды кандай жаят апамдан сураш керек. Анткени апам камыр жаюунун устаты. Сүйгөнүң жасаган тамактын баары эле даамдуу, таттуу көрүнө берет. Көбүнчө электр мешине жасаган тамактары абдан жагат.

– Уулуңуз Адам кечээ экиге чыкты, туулган күнүн кандай белгиледиңер? Эмне белек бердиңиз? Үйдө кандай атасыз?
– Үй-бүлөмдө менден башкасынын баары туулган күн өткөргөндү жактырышат. Уулум бирге чыкканда туулган күнүн белгилегенбиз. Бул жылы өткөрөлү дешкенде мен тыйып койдум. Анткени аны өткөргөнгө да убакыт керек. Бала үчүн белек ата-эненин дени сак жүрүүсү деп ойлойм. Эркек бала баары бир энеге жакын болот экен. Учурда жубайым экөөбүз экинчи наристебизди күтүп жатабыз. Ким болору белгисиз. Бирок кыздуу болгум келип жатат. Кыздар атага аябай жакын болорун байкап жүрөм.

– Өзүңүз кимге жакын элеңиз?
– Атамдын көзү өтүп кеткенден кийин чоң энем менен чоң атамдын колунда өстүм. Кийин бой жеткенде апамдын колуна келдим. Апам байкем менен карындашыма катуу сүйлөп койчу. Чогуу жашап көнгөн эмеспиз да, мага катуу айтсам көңүлү ооруп калабы дегендей мамиле кылчу.

– Мен сиздин он жылдан берки күйөрманыңызмын. Жети атаңызды айтып бериңизчи.
– Жети атамды билем, бирок баласын атасы, чоң атасын небере кылып ордуларын алмаштырып салышым мүмкүн. Мирбек, Бообек, Атабек, Булан, Күлө, Бижан, Байжан.

– Үч уулум бар, оозуна түкүрүп койсоңуз кандай болот? Илгертен бизде ушундай ишеним бар го, жок дегенде сизди 80 пайыз тартса мыкты инсандардан болот эле...
– Аба аркылуу түкүрдүм дебейинби, тамаша. Мындай нерселерге көп көңүл бурбаш керек го дейм. Түкүрүктүн таасири ошончолук тиет дегенге ишенбейм. Жаш кезде балдарын алып келгендер болгон. «Түкүр» дейт деп түкүргөн күндөр да болгон. Кийин ойлонуп калат экенсиң. Тазалыкты сакташ керек, көп оорулар шилекей аркылуу жугат эмеспи. Ошондуктан кой дедим.

– Кайын журтка барганда жылдыз күйөө баласызбы же жөнөкөйбү? Кайсы бир жумушту аткара албай калып бет кызарган учур болду беле?
– Ырчы, элдин адамы деп башкача мамиле жасашат, ал байкалып турат. Башка бажаларыма караганда аяшат. «Мени аябай эле отун жарган сыяктуу кара жумуштардан бербейсиздерби?» десем деле жеңил жумуштарды берип коюшат. «Жок, сен конокторду «биякка киргиле, ичкиле, жегиле» деп тур» дей беришет. Бет кызарган учурлар болот, ал жүзүңдөн билинбейт, бирок ичиңден сезесиң.

– Уулуңуз Адамдын аты өзгөчө го, ким койду эле?
– Бизге чейин деле мындай аттар бар экен. Жакында эле Кочкор жергесине барып, бирөөлөр менен сүйлөшүп калдык. Бирөөсү «менин атым Адам, атамдын аты Мирбек» деди. Өтө жагымдуу болду. Уулума ысымды чоң апасы, жубайым үчөөбүз кеңешип койдук.

– Саламатсызбы? Мээрим эже мага абдан жагат. Аялзаты төрөгөндөн кийин толот эмеспи. Жубайыңызды арыкта деп айтасызбы?
– Мен эркелетип, «семирип кетсең дагы сүйүп жүрө берем» деп калам. Жубай болчу адамды тандаардын алдында келбетин карап сүйбөйбүз да. Жан дүйнөсүнө, жашоодогу принциптерине, ата-энеге, адамдарга жасаган мамилесине карадык, анан жылдызыбыз келишти.

– Уулуңуз Адам ырчы болом десе каршы болбойсузбу?
– Балдарымдын бири ырчы болсо, акыл-насааттарымды айтат элем деп кыялданам. Негизи өздөрүнүн тандоосуна коём.

– Бир тууган байкеңиз азыр каякта, эмне менен алек?
– Байкем милиция кызматкери, учурда «Манас» аэропортунда иштейт.

– 2006-жыл беле, алгачкы концертиңизге баргам. Ошондо эл азыраак келген. Апаңыз «кол чаппайсыңарбы, менин балам» деп залда отургандарга кайрылганы эсимде.
– Ал менин ыраматылык чоң апам. Анда жаңы чыгып, эл тааный элек болчу. Улуттук каналда тартылган съёмканы айтып жатасыз. Башкалар ырдап жатса, отургандар кыйкырып, кол чабышса «уялбайсыңарбы, өзүңөрдү кармагыла, кыргыз деген мындай болгон эмес» деп тыйган экен. Мен чыкканда баары тынч отуруп калышса «кол чаппайсыңарбы» деп толкунданып, элди колдоого үндөптүр. Чоң апам менин эң биринчи күйөрманым эле. Ал кезде бир концерт берип эле ырчылыгымды токтотом, андан кийин кесибимди алмаштырам деп ойлогом. Андан кийин отуз жашка чейин ырдайын дедим. Отуздан кийин деле ырдагың келет экен. Кийин ырчылыкта чек жок экенин байкадым, сахнага байланып калыптырмын.

– Эркектер үйлөнүп, балалуу болгондон кийин толуп кетишет го, сизге канча салмак кошулду?
– Үйлөнгөнгө чейин деле 65 килограмм болчумун. Азыр деле ошол салмактамын. Бул генден анан туура тамактанбагандан болсо керек. Кээде тамак жегенди унутуп калып деле жүрө берем.

Сүйүн Кулматова
Адилет Бектуров
star@super.kg

 Кыстарылган видео