Инстаграмдагы сулуулардын тиреши. АНЖЕЛИКА VS АЙЖАН

АНЖЕЛИКА БАРАКЧАСЫНА АЙЖАНДЫН БОЁНБОГОН СҮРӨТҮН ЖҮКТӨП...

18-ноябрь күнү косметика каражаттарын чыгарган компаниялардын бири Бишкекте жаңы дүкөнүн ачты. Дүкөндүн ачылышына орусиялык популярдуу визажист Гоар Аветисян келип, 4 миңдей көрүүчүнүн алдында бишкектик жаш визажисттерге профессионалдык макияж жасоону үйрөтүп мастер-класс өтүп кеткен. Бул өңдүү окуяларды көз жаздымда калтырбаган ырчы айым Анжелика да жогорудагы кечеге барды. Ырчы айым Инстаграмдагы баракчасына Гоар боёп жаткан модель Айжан Асемованын боёнгонго чейинки сүрөтүн жана видеосун жүктөп көпчүлүктүн талкуусун жаратты. Эске салсак, Айжан Асемова Кыргызстан боюнча Инстаграмда эң көп окурманы бар колдонуучу. Анын баракчасына учурда 700 миңден ашуун адам жазылган. Андан кийинки орунда эле 690 миңден ашуун окурманы менен Анжелика келе жатат. Мындай карасаң эки сулуу кыздын бөлүшө албай турган деле эч нерсеси жоктой, бирок «подписчиктер» үчүн күрөш, Инстаграмдагы лидерликти талашуу боюнча ортолорунда тымызын тирешүү бардай.
Айжандын күйөрмандары «моделдин боёнбогон сүрөтүн Анжелика атайын чыгарды, кадимки аялдар арасында болчу көрө албастык» деп айыпташса, айрымдар «Анжелика сулуу», «жок, Айжан сулуу» деп бири-бири менен талашып, уруша башташты. Анжелика Асемованын макияжы жок сүрөтүн атайын чыгардыбы же өзү айткандай, билбестиктенби ким билсин, бирок эки сулуунун күйөрмандарынын ортосуна от жагылып, алардын ортосундагы чыр аптанын окуясына айланып кеткени бышык.

ГОАР АВЕТИСЯН АЙЖАН АСЕМОВАНЫ КОЛДОДУ
Айжан Асемованын Гоар сулуулаганга чейинки сүрөттөрү Инстаграмда хит болуп, анын дарегине түрдүү күлкүлүү мемдер, шылдыңдар менен коштолгон какшык тамашалар жаады. Гоар Аветисян колдонуучулардын таландысында калган сулуу кызды колдоп өзүнүн баракчасына: «Бүгүн мен боёнткон модель кыз Айжанды колдогум келип турат. Анын боёксуз түшкөн сүрөтү үчүн кемсинтип, жараатын ириңдетип жаткан айрымдар мастер-класстагы эң начар сүрөтүн алып интернетке таратышыптыр. Айжан, сен бүт ракурстан алганда сулуусуң. Жөн гана адамдардын сен аркылуу өзүнүн кемчиликтерин жабууга аракеттенип жатканын түшүнүп кой",- деп пост жазды.

Талкууга алынган окуя боюнча Айжандын оюн билдик:
– Ар бир адамдын өзүнүн ою, көз карашы болот. Мен баарына жакканга кызыкдар эмесмин. Ким эмнени ойлосо ойлой берсин. Аларга түшүндүрүү иштерин жүргүзгөнгө милдеттүү эмесмин,- деп, туура эмес ракурстан тымызын тартылып алынган сүрөттөрү анын өзүнө болгон ишенимдүүлүгүнө доо келтире албастыгын айтты.

АНЖЕЛИКА АТАЙЫН КЫЛДЫБЫ?
Дарегине жааган сындардан ырчы Анжелика да кур калган жок. Колдонуучулар аны «Инстаграмдагы башкы атаандашын шылдыңдоо үчүн атайын кылды», «өзүн Айжандан сулуу көрсөткүсү келди», «Анжеликанын Инстаграмдагы баракчасын жаптырабыз» деп да жазып чыгышты. Мындай сындарга ырчы жооп кылды:
– Биз жашоодо ар кандайбыз. Кимдир бирөөбүз сүрөттөгүдөй сулуу эмес, анча арык эмес, боюбуз кыскараак болушубуз мүмкүн. Мен атайын чакырылган конок катары барып баары сыяктуу эле сүрөткө, видеого тартып баракчама жүктөдүм. Гоар боёнткон модель тууралуу ойлонгон да жокмун. Алдын ала моделдин боёнтконго чейинки сүрөттөрүн чыгарганга болбойт деп айтып коюшса болмок. Мен сыяктуу эле моделдин боёнбогон жүзүн ал жакта жүргөн 3 миңдей адам көрдү. Менде суроо: эмне үчүн моделге катардагы кызды эмес, белгилүү адамды коюп коюшту? Эртеден бери дарегиме таш жаадырып жаткандарды түшүнбөй турам. Визажисттин моделди боёнтуп жаткандагы сүрөтүн чыгарганым үчүн күнөөлүүмүнбү? Баарыңар мени калп эле "көрө албастык кылып жатат» дебей, мени өз ордуңарга коюп көргүлө дейт элем.
Көп өтпөй ырчы жогорудагы билдирүүсүн Инстаграм баракчасынан өчүрүп салган.

Лунара Бекиева
star@super.kg