БИР БҮРКҮМ. РАИМ МИЛЛИОНДУН ОРДУНА РАЖАБАЛИЕВ КЕЛДИ...

Учурда Орусиядагы "кара тизмеде" Кыргыз өлкөсүнүн 92 миң жараны бар. 3 жыл мурун бул көрсөткүч 180 миңге жеткен. Бул тууралуу Мамлекеттик миграция кызматынын төрагасы Медетбек Айдаралиев билдирди.
Нарын облусуна алынып келген 40ка чукул памирлик кыргыздарга Кыргыз жеринин шартына көнүшүп жашоосу үчүн өкмөт тарабынан 948 миң сом бөлүндү.
Мурдагы айыл чарба, тамак-аш жана мелиорация министри Турдуназир Бекбоев президенттик аппараттын мамлекеттик жана аймактык башкаруу жана кадрдык иш бөлүмүнүн башчысы болуп дайындалды.
Жыл башынан бери өлкө аймагына 40ка жакын фельдшердик-акушердик пункт салынган.
Президент Сооронбай Жээнбеков өзүнүн премьер-министр учурундагы жардамчысы Эрнис Толтоевди кайрадан жардамчылык кызматка дайындады.
Жыл башында Боинг учагы кулаган Дача-Суу аймагына кырсыкка арналган эстелик тургузулууда.
Буга чейин бир нече жогорку кызматтагы адамдарга кеңешчи болуп иштеп келген Муратбек Шайымкуловду президент өзүнө кеңешчи кылып дайындады.
Президенттик шайлоодо республикада жана чет өлкөлөрдө 2375 шайлоо тилкеси ачылып, жалпысынан 1 миллион 702 миң 940 жаран катышты. Аталган маалыматты БШКнын төрайымы Нуржан Шайлдабекова билдирди.
Мамлекеттик бажы кызматынын башчысынын орун басары кызматына Нурлан Ражабалиев дайындалды. Буга чейин аталган кызматты Райымбек Матраимов ээлеп келген.
2018-жылы мамлекеттик бюджеттеги киреше жалпысынан 140 миллиард 882 миллион 232 миң сомду түзөт. Ал эми чыгаша 161 миллиард 149 миллион сомго чукулдайт.
Өлкө боюнча ВИЧ илдетине чалдыккандардын эң көп бөлүгү, тагыраагы, 36,7 пайызы Ош облусунда жашайт. Ал эми эң аз катталгандар Баткен, Талас, Ысык-Көл жана Нарын облусунда.

Бектур Токтоноев
politika@supеr.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 787, 1-7-декабрь, 2017-ж.