ЗАКИРБЕК ДҮЙШӨНБЕК УУЛУ, КОМУЗЧУ: «АЯЛ КИШИ ЭРКЕКТИН КӨҢҮЛ БУРУУСУН КҮТӨРҮН БИЛЕМ. ЖУБАЙЫМА ОШОЛ НЕРСЕНИ БЕРЕ АЛГАН ЖОКМУН»
– Закирбек, саламатсыңбы? Жеке турмушума байланыштуу бурулуш болду деп жатасың, кепти өзүң баштасаң...
- Жакшы, рахмат. Үйдүн ички саясаты сыртка чыкпашы керек эле. Бирок атың эл-журтка таанылып калгандан кийин артыңдан кеп кылып же таптакыр туура эмес маалымат да таратышат экен. Чыгармачыл адамдын жубайы болуш оор окшойт. Жубайым менен ажырашып кеттим. Мен гастроль менен үйдөн көп кетем. Ушул нерсеге жубайым чыдай албай койду. Буга чейин төркүнүнө бир нече жолу кетип калды. Бир жолу алып келдим, эки жолу алып келдим, кайра-кайра барып алып келе беришке намыс да жол бербей калат экен. Акыркы жолкусунда үйдөн жубайым эмес, өзүм чыгып кеттим. Чыгып кеткениме жарым жыл болуп калды. Биз ата-энем менен чогуу жашачубуз. Ошону менен үйгө кайрылып барган жокмун. Ортодо үч балабыз бар, балдарымды талаага таштабайм.
– Ошондо кызганычтын айынан ажырашып кеттиңерби?
- Негизги себеби кызганыч болуп калды окшойт. Ал эле кызганып туруп алды дебейм, менден да кетти. Чыгармачылык – бул менин өмүрүм, жашоом, азыгым, бала кезимден каныма бүткөн ыйык тумарым. Бул өнөрдү таштай албаган соң гастролго да чыгам. Үйгө келгенде үй-бүлөм менен жетелешип кино, концертке эс алууга алып чыга албадым. Аял киши эркектин көңүл буруусун күтөрүн деле түшүнөм, бирок ошол нерсени бере алган жок окшойм. Эмне кылайын болгон мүнөзүм ушундай болсо? Кесибимди да, мүнөзүмдү да өзгөртө албагандыгым менин күнөөм болуп калды. Келинчегим кетип калганда үй-бүлөмдү сактап калайын деп алып келем. Бир жума жакшы жашагансыйбыз, анан кайра эле мурунку таз кейпибизге түшүп калабыз. Ал деле чыгармачыл адам, музыкалык окуу жайда чогуу окуганбыз. Бирок кийин кесибин алмаштырып фармацевт болуп кетти.
– Билишимче, силер классташсыңар, чогуу окуп, көп жыл сүйлөштүңөр. Бири-бириңерди жакшы эле таанып-билдиңер дегендей...
- Ооба, учурунда сезим болгон. Сүйлөшүп жүргөндө деле таарынычтар көп болгон. Балалуу болгондон кийин апам «эки балалуу болсоңор баары жакшы болот» деп бизди жашап кетсин деп кармап турду. Эки балалуу болгондон кийин деле оңолуп кеткен жокпуз. «Үч бала менен каякка бармак элек?» деп экөөбүз тең аракет кылдык, тагдырыбыз бир эмес экен.
– Балдарыңдын улуусу окуп калса керек...
- Менин сарсанаа болгонум эле балдар. Чоң кишилердин кагылышынан балдардын жабыр тартышын каалабайм. Биздин укум-тукумубузда ажырашкандар болгон эмес. Башында мамилебиз болбой, келинчегим кайра-кайра кетип калып жатканда «кантип ажырашам, ажырашат деген эмне шумдук?» деп жаман болгом. Негизи жашоо деген оор экен. Жаш кезде биз аны ойлобойт турбайбызбы. Кайын журттан да жагымсыз кептерди көп уктум. Ошонун баары адамга таасир этет экен. Азыр убакыттын өтүшү менен ажырашкан жалгыз мен эмес экенимди, ажырашкандан кийин деле жашоо бар экенин кабыл алып, көнүп калдым.
– Жарым жыл мурун социалдык тармактардын биринде өздүк баракчаңа сүйүктүүсүн тапты деп белгиледиң эле...
- Ошону ким, эмнеге жасаганын билбей калдым. Интернеттеги өздүк баракчаларымды кээде ачык таштап унутуп кетип калам. Бул окуя келинчегим менен урушуп жүргөндө жазылган нерсе болду. Ал «өзүң эле кылдың» деп менден көрсө, мен андан көрдүм. Келинчегим кызганып, улам уруш чыгара бергенинен интернеттеги бардык баракчаларымды «өзүң көзөмөлдө, ким эмне жазса каалаганыңдай жооп бер» деп тапшыргам. Тааныбаган эле бирөө «кандайсың?» деп жазса деле көңүлүнө жакын ала берет эле.
Жеке жашоом азыр тынч. Сүйүктүүмдү таба элекмин. Кыргыз улуттук консерваторияда студенттерге комуздан сабак берип жатам. Жумушумду жакшы көрөм. Быйыл мугалимдикти аркалап жатканыма эки жыл болду. Андан сырткары жеке чыгармачылыгым менен алекмин. Музыкаларды, чыгармаларды жазып жүрөм.
– Күү чыгарарыңды да билебиз, ошол жаатта кеп салсаң.
- Өзүм чыгарган беш күү бар. Бирөөнү чертип жүрөм. Калгандары быша элек, улам бир жерин оңдоп жүрөм. Фольклордук ансамблдерге өзүнчө, эстрадалык вариантка өзүнчө ылайыктап жазган жана башка аспаптар менен дуэт кылууга ылайыктуу чыгармалар да бар.
– Алдыда жеке концертиңди берүүнү пландаштырган жоксуңбу?
- 2017-жыл Маданият жана тарых жылы эмес беле. Ушул жылы жеке концертимди берсем деп кыялданып жүрдүм эле, бирок жетишпей калдым. Эстрадалык ырды ала турган болсок, алардын аранжировкасын жасоо оңой. Аз убакыттын ичинде жасап койсо болот. Күүнүн аранжировкасын жасоо бир кыйла татаал жана көп убакытты алат. Келе жаткан жылы жазында концерт берейин деп жатам. Ага чейин күүлөрдүн аранжировкалары бүтүп калат, буюрса.
– Чыгармачылыкта жүргөнүңө канча жыл болду?
- Чыгармачылыкка мен бала кезимден эле аралашкам. Алты жашымдан сахнанын күчүн сездим. Ошондон бери арадан 21 жыл өтүптүр. Алты жашымдан эле гастролго, чет өлкөгө көп чыктым. «Саамал» фольклордук тобунун солисти элем. Бир нече жылдан кийин бул топ жоюлуп кетти. Азыр «Хан-Теңири» тобунда солистмин. Таланттуу жаштардан өзүм ансамбль ачсамбы деген ой-максаттарымды бышырып жүрөм. Башка улуттун аспаптарын комуздун формасында жасап, өзгөчөлүк киргизсемби деп аракет кылып жатам.
– Атай Огонбаевдин ролун ойнодуң, актёрдук да чеберчилигиң бар экен да?
- Жай мезгилинде сентябрга чейин Атай Огонбаев тууралуу даректүү тасма тартылды. Атай атабыздын кичине чагын башка бирөө ойноду. Улуу комузчу болгону 49 гана жаш жашаган. Мен анын 10 жылдык өмүрүн чагылдырып 39-49 жашын ойнодум. Документалдуу фильм болгондуктан көп сүйлөгөн жокмун. Грим менен келбетимди окшоштурушту. Бир аз эле текст бар болчу, аны кагаздан карап туруп эле айтып койдум, калганы жалаң күү чертмей болду. Тасма 2-октябрда көрсөтүлдү. Тартуучу топтун ушул эле фильмди эми көркөм тасма катары тартуу идеялары бар.
– Рахмат маегиңе, ой-тилектериң орундалсын.
«Атай Огонбаевдин образын жаратуу мен үчүн чоң сыймык».
«Жубайым экөөбүз жакшы максаттар менен баш коштук эле, тагдырыбыз эки бөлөк экен».
«Сахнада алты жашымдан бери жүрөм».
Комузчу Закирбек Дүйшөнбек уулу казак домбрачысы Ержан Жаменкеев менен болгон таймаштан кийин эл арасында аты таанылган эле.
Сүйүн Кулматова
star@super.kg
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Комментарийлер (33)
Закир жакшы үй-бүлөөнүн уулу,эми тагдыр келишпесе кыйын,эркектен да өткөн бул жерде,бирок үй-бүлөөнү сактап калуу 80% аялдан көз каранды,майда нерселердин баарын териштире бербей,көрмөксөн,укмаксан болуп койсо баары өтүп кетет.
Закир жакшы үй-бүлөөнүн уулу,эми тагдыр келишпесе кыйын,эркектен да өткөн бул жерде,бирок үй-бүлөөнү сактап калуу 80% аялдан көз каранды,майда нерселердин баарын териштире бербей,көрмөксөн,укмаксан болуп койсо баары өтүп кетет.
Жаман аял кетем деп коркутат болуп акыры кетип тыныптыр да,күйөөсү үйүн таштай качканына караганда,жетээр жерине жеткирсе керек аялы.Деги тынч жашайынчы деди да акыры байкуш.Тийип жатканда деле билген да кандай адамга тийгенин,мындан кыйын артистердин деле аялдары жашап жүрүшөт кетпей этпей эле
азыр жашы отуп калган чыгармачыл адамдар,аялдарына рахмат айтып келишет,убагында чыдады,баарын которду деп,аял заты кичине сабырдуу болсок,балдарды ойлоп,аялга эр.эркекке аял табылат.ортодо балдарга кыйын,озу тушунуктуу,токтоо эле бала экен,ишине ийгилик
Уйду таштап чыгып кеттим дегенине караганда кобуроок тыйын таап кокурогуну которуп калгансын го.ошол аялын канча жолу жаканды агартып ысыгына ысып,суугуна тонуп журду экен жанын кыйнап?Анан эле эркектер айрыкча шоу чойронуку суттон ак болуп чыга келесин.кийинки санда келинчегин чындыкты айтса керек жанарага окшоп.
Шопурду ээрим дебе, ырчыны аялым дебе деген чын да озу. Ырчылар ээрда, аял да болуп бере алышпайт. Гастролдоп журушсо жубайына конул бурганы убактысы болмок беле. Аман эле болгулачы .
Бизде иши кылса баарына аял куноолу,когала койдой кылып сабаса да аял куноолу,куйоосу олтуруп коцсо деле аял куноолуу,уй бетин корбой Назира,Гулжайна менен кундоп тундоп гастролдо журсо деле уйундо калган аял куноолуу.
Азыркы учурда эки миллион кыргыз ар кайсы өлкөлөрдө гастрольдо, жылдап үйгө келбей жүргөндөр бар, аларга караганда артисттер бир жылда көп болсо 10 же 20 күн эле үйдө болбойт.
Кызганыч деген ушинтип ажырашууга жеткирет тура. Бир интервюсунда ото коп жыл кыз жигит болуп журдук деген. Бири биринен зеригишип кетсе керек
Эки тараптада куноо бар Закир аялына конул бурбай гастролдон келбесе аялы уй жумушчусундай эле мунун ата-энесин,балдарын карап уйдо олтурса, бироону таап алгандыр деп жашоодон конулу калып кеткендир,аялына келсек ээри жанынан чыкпай конулун бир гана аялына буруп козун карап олтурса анан кетпесе керек эле,эми жыйынтык экоонун келишпестигиген балдары запкы жеп мээримге зар болуп журушот.
менин куйоом алыста болсо да тынбай чалып турат. бассам турсам оюмдасынар деп алдап коет суйунуп калам ишеничим артат.
Аял чыдаш керек,бироо менен жатканын кармабагандан кийин .Эл адамы болгондо кийин куйормандар болот.Кайрат Нуртас керек болсо аялым жок деп жургон го,миллион кыз жазса керек эле.Ошону аялы тушунуп жургонда.
MIRAN, анын аялы ханышадай жашады да 10жыл)) салыштырчу адамды таапсынар)
Ээ азыр ажырабай дайым жанында жүргөндөр аз болсо керек баары эле мигрант болуп иштеп эле жүрөт чет жакта жылдап келе албай ага караганда булар жакыныраак элего сабырдуу болуш менен шүгүр да кылганды үйрнүш керек
"Комузчу Закирбек Дүйшөнбек уулу казак домбрачысы Ержан Жаменкеев менен болгон таймаштан кийин эл арасында аты таанылган эле" дегенге кошулбайт элем, анткени Закирбек бул таймашка чейин эле таанымал болчу.
