БИР БҮРКҮМ. 2018-жылдан тарта биометрикалык паспорттун баасы 320 сом болот...

Жогорку Сот «СЕНТЯБРЬ» ТЕЛЕКАНАЛЫН жабуу боюнча Бишкектин Биринчи Май райондук сотунун чечимин күчүндө калтырды.
Учурда керектөөчүлөрдүн ЭЛЕКТР ЭНЕРГИЯСЫНА болгон карызы 1 миллиард 668,5 миллион сомду түзөт. Бул 2017-жылдын январына салыштырмалуу 11,3 пайызга аз. Аталган маалыматты Улуттук энергохолдингдин башчысы Айбек Калиев билдирди.
Кыргыз-Кытай ЧЕК АРАСЫНДАГЫ «Торугарт», «Эркеч-Там» көзөмөл-өткөрүү бекеттери Кытай тараптын демилгеси менен Жаңы жыл майрамына карата 30-декабрдан 2-январга чейин жабылат.
Кытай-Кыргыз-Өзбекстан багыты боюнча курулуучу ТЕМИР ЖОЛДУН акыркы картасы 2018-жылдын апрель айында такталып бүтөт.
Бишкектин Биринчи Май райондук ички иштер бөлүмүнүн кызматкери асынып каза болгон кыздын ЖАНСЫЗ ДЕНЕСИН видеого тартып, WhatsApp аркылуу таратканы үчүн кызматтан бошотулду.
АКШ жана Бүткүл дүйнөлүк саламаттыкты сактоо уюму Кыргыз өлкөсүнө САСЫК ТУМООГО каршы жардам иретинде 105 миң дозалык вакцина тапшырды.
Орусиянын Мамлекеттик Думасынын "Адилеттүү Орусия" фракциясы өлкөгө кирген ар бир МИГРАНТ үчүн 5 доллардан 15 долларга чейин салык алууну сунуштады.
2017-жылдын 11 айында Экономикалык кылмыштарга КАРШЫ КҮРӨШҮҮ мамлекеттик кызматы 3 миллиард сомго чапчыган 1395 экономикалык укук бузууларды аныктаган.
Чүйдө 23-декабрда 13 ЖАШТАГЫ КЫЗ ТӨРӨДҮ. Анын организми төрөткө даяр болбогондуктан, операция жолу менен көз жарган. Азырынча ымыркайдын атасы ким экендиги айтыла элек.
2018-жылдын 1-январынан тарта БИОМЕТРИКАЛЫК ПАСПОРТТУН баасы 320 сомду түзөт. Бул эски үлгүдөгү ID картанын баасынан 110 сомго арзан.
Жалал-Абад облусундагы ОРТО-ТОКОЙ суу сактагычындагы көзөмөлдү Кыргыз өлкөсүнө өткөрүү боюнча макулдашууну Жогорку Кеңештин депутаттары 3-окууда колдоду.
Жогорку Кеңештин депутаттары өлкөдөгү бардык МЕКТЕПТЕРДИ 2018-жылдын 1-сентябрынан тарта 5 күндүк окуу тартибине өткөрүүнү сунушташууда.

Бектур Токтоноев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 791, 28-декабрь-5-январь 2018-ж.