АНЖЕЛИКА КАЙРАДАН ТАЛКУУ ЧОРДОНУНДА. Интернетте ырчыны «күйөөм менен көңүлдөш» деп жазган Айжан аттуу айым пайда болду

Учурда Дубайда теле долбоорунун жыйынтыгын чыгарып жүргөн ырчы, алып баруучу Анжелика Бекболиевага байланыштуу интернет айдыңында кайрадан талкууга түшкөн маалыматтар пайда болду. Инстаграм социалдык түйүнүндө "бул ырчы бир үй-бүлөнү бузду, ал адам менен жаңы жылдык каникул учурунда Балиге эс алууга кетти, ырчы ал киши сатып берген үйдө жашап жатат" деп жазган аккаунттар пайда болуп, ырчыны сөккөн жана ага болушкан тарап кызуу айтышып, урушуп жатышкан кез.

ТАЛКУУГА ЖЕМ ТАШТАГАН AIJANA_I
Анжелика майрам алдындагы иштерин бүтүрүп, эми жаңы жылда кыска эс алууга чыкканын айтып, Инстаграмдагы баракчасына Балиде, андан соң Малайзияда, бир нече күндөн кийин Дубайда жүргөн сүрөттөрүн илип жатты. Ал сүрөттөр сонуркоо, суктануу, ырчынын иш менен эс алууну айкалыштырып жүргөнүнө баа берүү менен гана токтоп калган жок.
Инстаграм тармагында miku1185 деген аталышта баракча пайда болуп, Анжеликанын бир киши менен түшкөн сүрөтүн жарыялады. Ошол сүрөткө "Марат деген адам Анжелика менен Жаңы жылда Балиде эс алганы кетти, алар алгач Алматыга барып, Баян Алагузова (Есентаева), анын жолдошу Турсенгали Алагузов төртөө чогуу эс алышты" деп жазып чыкты. "Бул учурда ырчынын жолдошу Урмат Бекболиев үйүндө бала карап отурат" деп да кошумчалап, "ырчынын көңүлдөшү" деп белгилеген Марат аттуу мырзанын үй-бүлөсү бар экенин айтып, атүгүл алардын сүрөттөрүн да жарыялады.
miku1185 деген аккаунттан тараган маалыматтардын артынан эле аты аталып жаткан мырзанын жубайымын деп aijana_i аккаунту аркылуу Айжан аттуу айымдан билдирүүлөр тарай баштады. Ал кимдир бирөөлөр балдары менен түшкөн сүрөтүн чыгарып, ырчы менен жолдошу Марат мырзанын мамилесин жарыялап жиберишкенин жазып, үй-бүлөсү тууралуу маалымат коомчулукка тарап кеткен соң эми жашыруунун мааниси жоктугун, артка жол жок экенин жазып чыкты. Бул айым өзүнүн билдирүүлөрүндө жолдошун Марат Назарбеков деп атап, аны "ырчынын көңүлдөшү жана демөөрчүсү" деп жарыялай баштады. Өткөн жылы жай айларында ырчы Европанын бир нече өлкөсүнө саякаттап барып келген. Айжан аттуу айым «ошол сапарды менин күйөөм каржылаган» деп, «экөө Балиге да чогуу эс алганы кетишти» деп жаза баштады.
Ал ырчы айымдын жолдошу Урмат Бекболиев менен жолукканын баяндап, көп маалыматтарды жарыялады. Андан көп узабай, ошол эле аккаунттан «Урмат мени сотко берем деп коркутуп аудио билдирүү жөнөттү» деп, экөөнүн жазышуусун сүрөткө тартып тиркеди. Андан көп өтпөй ырчы айымдын Ысык-Көлгө бара жаткан видеосун жүктөп, «Мерседес-Бенц Гелендваген унаасы Маратка таандык, ырчы бул видеодо ошол унаада баратат» деп жазды.
Интернет жашообузга активдүү кириши менен бул өңдүү ыңгайсыздыктарды, коркунучтарды да кошо алып келди. Телефондун же монитордун ары жагында кайсы адам ким деп катталып, эмне маалымат таратарын билүү, бул маалыматтын кайсынысы чындык, кайсынысы жөн гана каралоо экендигин билүү кыйын. Кай бирөөлөр убактылуу баракча ачып, ал аркылуу көрө албаган адамдарын жамандашы жөнөкөй гана иш. Aijana_i аккаунту бир нече жыл мурун ачылган, 3 балалуу аялдын кадимки күнүмдүк турмушу, жаңылыктары жарыяланып турган баракча экен. Ал баракчаны кайсы бир максат үчүн убактылуу ачылган деп айтууга кыйын болчу. Деген менен бул жарыялар башталгандан 2-3 күндөн кийин аталган аккаунт орду-түбү менен Инстаграмдан жоголуп кетти.

ТАЛКУУГА ТҮШКӨН МЫРЗА КИМ?
Сөз болуп жаткан Марат Назарбеков учурда 36 жашта экендиги, 2012-жылдын 1-февралында Кыргыз Республикасынын Өкмөтүнө караштуу Интеллектуалдык менчик жана инновациялар мамлекеттик кызматынын жетекчиси болуп дайындалып, 2015-жылдын ноябрь айына чейин иштегендиги белгилүү. Акыркы учурда Бишкек шаарындагы «Vefa» соода борборунун кожоюндарынын бири катары бул мырзанын үй-бүлөсүнүн аты аталып жүрөт. Интернетте ырчы Анжелика Бекболиеваны бул адам менен байланыштырган жалгыз гана сүрөт таратылууда. Ырчынын айтымында, ал сүрөт мындан 5 жыл илгери "Кыргызпатентте" гонорар тапшыруу учурунда тартылган.
Өткөн жылы Анжелика казак шоу-бизнесинде атактуу продюсер Баян Максат кызы менен катышып, курбу боло баштады. Баян айым акыркы учурда көп кыйынчылыкты башынан өткөрдү. Мурунку жолдошунун ур-токмогуна кабылып, өлүм оозунан кайтты. Кийинчерээк продюсер айым арзыганына турмушка чыкты жана өзүнүн өмүр-таржымалы, күйөөсү менен ажырашуусу жана сүйүүсүнө кантип жеткендиги тууралуу китеп жазды. Эсиңиздерде болсо, Анжелика Бекболиеванын чакыруусу менен Баян Максат кызынын өмүр баяны тууралуу китебинин бет ачары Бишкектеги «Vefa» соода түйүнүндө өткөн. Жогорудагы маалыматтар айтылбаса, бул ишке, балким, эч ким деле маани бермек эместир. Китептин бет ачарынын Бишкектеги башка соода түйүндөрүндө эмес, дал ушул жерде өткөнү ырчы жөнүндөгү талкууларды ого бетер күчөттү. Биз айтылып, жазылып жаткан кептердин чын-жалганын айтып, чекит коё турган адамга – ырчыга байланышып, кенен маек курдук.

Сүйүн Кулматова
star@super.kg