– Салам, Малика, продюсер менен иштеше баштаптырсың? Ушул тууралуу айтып өтсөң...
– Ушул жылдан баштап буга чейин бир топ ырчыларды таптап чыгарган продюсер Канат Кадыржан менен иштешүүнү баштадым. Азыр Канат байке менин продюсерим, менеджерим. Иштешүүнүн себеби Канат Кадыржан экөөбүздүн чыгармачылыкка болгон көз караш, ой-пикирлерибиз дал келди. Негизи 2 жылдан бери эле чогуу иштешүү тууралуу ойлонуп жүргөнбүз, убакыт-сааты ушул жылга туш келди.
– Учурда клип тартып жүрүптүрсүң?
– Ооба, «Айтчы себебин» деген ырыма клип тартып бүттүк. Клипке белгилүү жаш казак актёру Еркебулан Токтар менен чогуу тартылдым. Еркебулан казактар тарткан «Зор» тасмасында башкы каармандын ролун ойнойт. Аны менен аталган тасманын Бишкекте болгон бет ачарында таанышып калгам. Мага анын кинодо ойногону абдан жакты. Кийин продюсерине байланышып, келишим түздүк. Анын Бишкекке келип кеткен жол акысын, тамак-ашын, жашаган жерин жана гонорарын төлөп бердик. Айтор, сый менен тосуп алып, сый менен узаттык.
Еркебулан мен курактуу эле жигит экен, ошондуктан тил табышуу оңой болду. Экөөбүз жакшы достордон болуп калдык. Клиптин үстүнөн 20 чакты адам иштеди, эмгегибиздин мыкты чыгышына ар бири чоң салым кошуп жатышты. Толкунданып бул клиптин жарыкка чыгарын мен да баары сыяктуу эле чыдамсыздык менен күтүп жатам.