АЛА-БУКАДА ӨЗБЕК ЧЕК АРАЧЫСЫ КЫРГЫЗ ЖАРАНЫНА ОК АТТЫ

27-январда Ала-Бука районуна караштуу Көк-Серек айыл өкмөтүнүн Ажек аймагында 1979-жылы туулган Асан Үсөнбаевди Өзбекстандын чек арачылары атып, Өзбекстанга алып кирип кетишкени маалым болду. Кыргыздын Чек ара кызматы «Үсөнбаев чек арага жакын жерде мал карап жүрүп, Өзбекстандын аймагына өтүп кеткен» деп билдирүү таратты. «Окуя түндө болгондуктан өзбек чек арачылары жарандын кайсы өлкөнүн жараны экенин аныктай албаган. Аны кармоого аракет кылганда жаран Кыргыз өлкөсү тарапка качкан. Эскертүү иретинде асманга ок атылганда токтобогону үчүн ага карай ок атууга мажбур болушкан. Жаракат алган жаран Өзбекстандын Наманган облусунун Чуст райондук ооруканасына жеткирилген»,- деп билдирди чек ара кызматы.
Кыргыз жараны 4 күндөн кийин 31-январда кайтарылды. Аны Оштогу «Достук» өткөрүү пунктунан туугандары, жергиликтүү бийлик өкүлдөрү жана Кыргыз чек арачылары тосуп алышты. Учурда жаракат алган жаран Бишкек шаарында ооруканада, абалы канааттандырарлык деп айтылды.
Ажек аймагынын тургундары окуя болгон жер дайыма эле Кыргыз жери болуп келгендигин, окуя чек ара тилкесинен бир топ ичкериде орун алгандыгын айтып, жергиликтүү бийликтин «өзбек жерине өтүп кеткени үчүн атышкан» деп маалымат таратканына нааразычылык билдиришүүдө.

Бектур Токтоноев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 796, 2-8-февраль 2018-жыл