ПАРОДИЯЛАР ПАРАДЫ

Хит ырларга кай бирде пародия жаза калабыз. Максатыбыз – ал ырларды мазактоо эмес, окурмандардын жүзүнө жылмаюу тартуулоо. Бул жолу да жөн отурбастан элге кеңири тараган ырларга пародия жаратып көрдүк.
P.S.: Тамаша саптарга таарынмай жок.

«МЕН ДҮЙНӨНҮ АПАМ МЕНЕН ТААНЫГАМ» (Самара Каримова)
Мен дүйнөнү апам менен таанысам,
Мен апамды көйнөгүнөн тааныгам.
Тирүү болчу көйнөгүнүн гүлдөрү
Баскан сайын бажырайып ачылган.

Мен дүйнөнү апам менен таанысам,
Мен апамды жыты менен тааныгам.
Жыттачу элем магдыратып жытынан,
Чыкпачы эле, чыкпачы эле жаныман.

Мен дүйнөнү апам менен таанысам,
Мен апамды колдорунан тааныгам.
Жылуу болчу, жумшак болчу колдору
Кармашканда бала боюм балкыган.

Мен дүйнөнү апам менен таанысам,
Мен апамды жоолугунан тааныгам.
Тирүү болчу жоолугунун гүлдөрү
Баскан сайын бажырайып ачылган!

«БАЙДЫН УУЛУНУН ЫРЫ» (Пародия)
Мен дүйнөнү апам менен таанысам,
Мен апамды шубасынан тааныгам.
Көркөмдүү эле шубасынын жүндөрү
Көргөндөрдүн далай оозун ачырган.

Мен дүйнөнү апам менен таанысам,
Мен апамды капчыгынан тааныгам.
Кошуналар, абысындар баарысы
Чыкпачы эле, чыкпачы эле жанынан.

Мен дүйнөнү апам менен таанысам,
Мен апамды унаасынан тааныгам.
Жылуу болчу, жумшак болчу салону
Отурганда дене боюң балкыган.

Мен дүйнөнү апам менен таанысам,
Мен апамды сөйкөсүнөн тааныгам.
Бриллиант эле, акак эле таштары
Баскан сайын жарк деп күнгө чагылган.

«СҮЙҮП КАЛДЫМ, КАНТЕЙИН?» (Эрлан Андашев)
Ошол күнү толкунданып отурдум,
Күндөр өттү, жалгыз сени ойлоймун.
Жан дүйнөмө жарык берип бир өзүң,
Ак сүйүүнү жүрөгүмө орноттуң.

Көрдүм сени, көңүлүмө сен жактың,
Сага арнап чын жүрөктөн ыр жаздым,
Көрүшкөндө тик карабай көзүңө
Уялдым, көздөрүңдү алып качтың.

Кайырма:
Сүйүп калдым, кантейин?
Сүйүп калдым, мен кантейин?
Сүйүп калдым, кантейин?
Сүйүп калдым, мен кантейин?

Пайда болуп түшүнүксүз бир сезим,
Сени жактырып калганымды сездим.
Кантем, айтчы, сүйүп калган окшоймун?
Көргүм келип сени гана издеймин.

Менин сүйүүм эмне үчүн кайгылуу?
Неге сүйүүдөн боло албаймын бактылуу?
Сүйүп калдым, бирок жетпешимди билемин,
Деги айтчы, эмнеге бүтпөйт сагынуу?

Түн уйкумду сага арнап уктабай,
Жөнөкөй мүнөзүңө мен суктанып.
Сүйүп туруп каламынбы жете албай?
Кетесиңби жаш жүрөктү ыйлатып?

Эгер сүйсөм кантип айтпайм жашырып,
Жүрөгүмдө ошол сезим жашаса?
Көргүм келип жүрөм сени сагынып,
Бирге бассак кол кармашып жанаша.

«ТОҢУП КАЛДЫМ, КАНТЕЙИН?» (Пародия)
ЖЭБ жарылып тоңуп-үшүп отурдум,
Жарык да өчтү, жалгыз сени ойлоймун.
Үшүбөстөн төркүнүңө барып бир өзүң
Жер үй жакшы, сууктан коргонгун.

Көп көгөрбөй барып көмүрдөн жаккын,
А мен болсо 2 жууркан жамынып калдым.
Көрүшөбүз көп кабат үйлөр жылыса,
Көп сагынба, мешке эртерээк качкын!

Кайырма:
Тоңуп калдым, кантейин?
Тоңуп калдым, мен кантейин?
Тоңуп калдым, кантейин?
Тоңуп калдым, мен кантейин?

Пайда болду түшүнүксүз бир сезим,
386 миллион доллар кайда кетти?..
Калч-калч этип тоңуп калган окшоймун,
Көмүр жаккан айылымды эстедим.

Эске түштү айылдагы үй жыпжылуу,
Бала элек анда кандай бактылуу?!
Эт кайнаган ысык мешке боркулдап,
Ошол күнгө пайда болду сагынуу.

Түн уйкумду бөлүп такыр уктабай,
Ойлоп жатам жер үйлөрдү суктанып.
Заарканам жуурканымды ача албай,
Тоңдурбачы, ызгаар, жүрөк ыйлатып.

Эгер келсе жылуулук эрте,
Эртең эле үйүм кайра жылыса.
Төркүнүнөн келип келинчегим да,
Бирге бассак кол кармашып жанаша.

Асхат Субанбеков
star@super.kg