БИР БҮРКҮМ. БАШ ПРОКУРОР ИНДИРА ЖОЛДУБАЕВА АПРЕЛДЕ ПАРЛАМЕНТТЕ ОТЧЁТ БЕРЕТ...

Кыргыз өлкөсүнүн Кувейттеги элчиси болуп САМАРГҮЛ АДАМКУЛОВА дайындалды. Буга чейин ал Индия, Бангладеш жана Непалда элчилик кызматты аркалап келген.
2017-жылы КЫРГЫЗ ӨЛКӨСҮ МЕНЕН ТҮРКИЯНЫН ортосундагы товар алмашуу 2016-жылга салыштырмалуу 26,7 пайызга, тагыраагы 356 миллион долларга өскөн.
Жалал-Абад облусунда ЖЕР КӨЧКҮ басып калуу коркунучундагы 1190 үй-бүлөнүн 160ы коопсуз аймакка көчүрүлдү.
Башкы прокурор ИНДИРА ЖОЛДУБАЕВА апрель айында Жогорку Кеңеште жылдык отчётун берет. Бул тууралуу парламент спикери Дастанбек Жумабеков билдирди.
КООПСУЗДУК КЕҢЕШИНИН катчысынын орун басары Марат Төрөбеков кызматынан бошотулду.
Япония Кыргыз мамлекетине ТЕРРОРИЗМГЕ КАРШЫ күрөшүү жана эне-баланын ден соолугун чыңдоо үчүн 6 миллион 200 миң доллар бөлдү.
Президенттик аппараттын тышкы саясат бөлүмүнүн башчысы болуп ДАНИЯР СЫДЫКОВ дайындалды. Ал буга чейин Кыргыз өлкөсүнүн Өзбекстандагы элчиси болуп иштеп келген.
Кыргыз Республикасына сырттан акыркы 25 жылда АЙЫЛ ЧАРБАСЫН өнүктүрүү үчүн 1 миллиард 127 миллион доллар алынган. Бул тууралуу Каржы министрлигинен билдиришти.
Кыргыз өлкөсүндө 1500дөн ашуун жаран НАРКОЛОГИЯ борборунун тизмесинде турат.
2017-жылы ДОКТОРДУК жана КАНДИДАТТЫК диссертация жактагандардын саны 274 адамга жеткен. Анын 49у доктордук, 225и кандидаттык иштерин коргогон. Бул көрсөткүч 2016-жылга салыштырмалуу эки эсеге аз.
3-мартта Бишкектин "АЛА-ТОО" АЯНТЫНА мамлекеттик тууну кайтарган ардактуу кароол кайрадан тургузулду. Кароол тарых музейин оңдоп-түзөө иштерине байланыштуу 2016-жылдын май айында алынган болчу.
Бишкектин Жылуулук электр борборун (ЖЭБ) оңдоп-түзөөдө ири суммадагы акча уурдоого шектелип "Электр станциялары" ишканасынын жетекчисинин мурдагы орун басары БЕРДИБЕК БОРКОЕВ жана аталган мекеменин техникалык директору АЛМАЗ ЖУСУПБЕКОВ кармалды.

Бектур Токтоноев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 801, 9-март -15-март, 2018-ж.