НУРЛАН НАСИП: "ЧЫГАРМАЧЫЛ МЫРЗАЛАРДЫН КӨБҮ БЕТИНЕ ТОНАЛКА СҮЙКӨШӨТ"

Интернет өнүгүп түрдүү социалдык тармактар тамыр жайган сайын хейтерлер пайда болуп баштады. Бул көрүнүш кыргыз ырчыларынын арасында да активдешип, жок эле дегенде ар бир ырчынын сүрөтүнүн алдына 5-6 жагымсыз комментарий жазып кетишет. Бүгүн ырчы Нурлан Насип ошол «душмандарынын» суроолоруна жооп бермекчи.

Хейтер сөзү англисче «hate» сөзүнөн алынып, «жек көрүү» деп которулат. Хейтерлер – бул кайсы бир адамдын чыгармачылыгын жактырбай, жаман сөздөр менен негативдүү комментарийлерди жазган адам. Аларды сынчылар менен алмаштырууга болбойт. Сынчылар жакпаган нерсесин аргументтүү, далилдөө түрдө сындашат. Ал эми хейтерлер табитине туура келбеген нерсени далилсиз эле айыптап, жамандай беришет, бирок өз оюнун тууралыгын далилдей алышпайт.

Lolli8317: – Нурлан, чыныңды айтчы, бетиңе тоналка сүйкөйсүң, ээ?
– Күнүмдүк жашоодо тоналка такыр колдонбойм. Бирок чоң концерттерде, телеберүүлөргө чакырса, клип тартканда грим кылууга туура келет. Анткени бул нерсени мен эле кылбайм, бардык эле чыгармачыл мырзалар бетине тоналка сүйкөшөт.

Asekov.samat: – Кыздар өтүп кете бербесин деп тишиңерди жасаттыңарбы?
– Жок, андай эмес, тишимди жасатканымдын себеби ортолору ачылып, аралыктары чоңураак болуп кеткен. Ошону оңдотсомбу деп колум тийбей жүргөн. Мурунку тишимди жактырган да күйөрмандарым бар. Бирок жаңы жасаткан тишимди мурункудан да катуу сүйүп каласыздар (күлүп).

Mumu00: – Нурлан, киного тартылбай жөн эле ырдай берчи сураныч, актёрдук чеберчилик нөл экен сенде.
– Чоң рахмат (күлүп). Чынында мен актёр эмесмин, ырчымын. Анан актёрдук чеберчилигимди далилдөө үчүн киного тартылган жокмун. Режиссёрлор менден «жашоодо кандай болсоң, ошондой аткарып бер» деп суранышкан. Мен жашоодо кандай сүйлөсөм, кандай күлсөм ошондой эле кинодо аткардым.

Baktygulabk: – Билдирүү жазганда толук орусча же толук кыргызча жазбайсыңбы, ай, уят!
– Азыр заман ушундай болуп жатпайбы. Бизде же кыргыз эмес, же орус эмес адамдар көп. Мен ошол адамдарга жараша жазам. Инстаграм баракчамдагы көпчүлүк орусча жазылган билдирүүлөрдү администратор-жардамчыларым жазып калат. Бирок өзүм кыргызча жазганга аракет кылам.

Benazir08: – Ырларыңды угам, ширин ырдайсың, бирок күлгөнүң эч жакпайт да...
– Эми күлкүмдү мен атайын жасап күлбөйм да (күлүп). Жараткан кандай үн берсе ошондой ырдайм, ошондой күлөм. Жасалмасы жок чын жүрөктөн күлгөн жакшы эмеспи

Nurzadaasano: – Асел экөөңүздөр "пара" эмес экенсиздер...
– Хм, билбейм... Ар кимдин көз карашы ар кандай да.

12345lky: – Башың эле калыптыр го, семирсең боло...
– Ооба, чынында арыкмын, эми семирейин деп жатам. Жогоруда айткандай, баралыма келгенде толот болушум керек. Анткени менин атам жаш кезинде арык киши болгон мага окшоп.

Sakinalsu: – Тоту куштай болбой үйлөнсөң тезирээк үйлөнбөйсүңбү Аселге...
– Ар бир нерсенин өзүнүн убакыт-сааты бар. Кудай буюрган күнү үйлөнөм.

Kubinis: – Вай, эне-ең, Москвада иштеп биз бир күндө 1000 рубль араң тапсак, бул братан бир күндө эле коротуп коёт го...
– Анткени мен күндүзү көп жумуш кылам. Студияларга, концерттерге барам. Такси кызматын пайдалансам андан көп кетмек, өзүмдүн унаама бензин куюп айдаганым жакшы го. Бул эми эң аз алганда ошончо коройт, кээде андан көп деле короп кетет.

Elaman_omursakov_official: – Тиштин баарын бузупсуң, брат, мурункусу эле зыңк эле...
– Сиздин көзүңүз көнбөй жатса керек. Эң негизгиси менин келбетимди, тиштеримди карабай, ырларымды гана уксаңыз жакшы болмок. Анткени бирөөгө сын таккан оңой.

Соңку сөз: – Биздин ар бир илген сүрөтүбүздү, эмгегибизди көңүл сыртында калтырбай чымчылап отурган хейтерлерге айтарым, сынчы болуш оңой, эмгек кылуу кыйын. Көпчүлүк жаман сөз жазган комментарийчилер бекерчи, үйдө бош отургандар болуш керек. Анткени иштеген адамдын мындай иштерге убактысы жок болот. Ошентсе да бардык угармандарымды, анан хейтерлерди дагы жакшы көрөм. Менин эмгегиме күбө боло бериңиздер. Сиздер үчүн ырдайм!

Лунара Бекиева
star@super.kg