Анжелика Бекболиева, ырчы: «ЖОЛДОШУМ ЭКӨӨБҮЗ ЖАКШЫ МАМИЛЕБИЗДИ САКТАП КАЛАБЫЗ»

Анжелика учурдун эң көп талкууга алынган ырчысы. Анын жеке жашоосун сөз кылышат, сындашат, кызыгышат, ар бир жүктөгөн сүрөтүнө жакшы да, жаман да комментарий жазышат. Ар бир баскан кадамын коомчулукка жарыялап турган Анжелика менен бүгүн биз көпчүлүктүн бүйүрүн кызыткан суроолорго ырчы жаңы ырына клип тартып жаткан жерден жолугуп, жооп алдык.

– Кандайсың, Анжелика? Бул жаз сага кандай белектерди камдаптыр?
– Саламатсыздарбы, жакшыбыз, буюрса. Кечээ эле кичинекей кыздардын курамынан өзүм түзгөн «Kids stars» тобунун алкачкы клибин тартканбыз. Топто кызым Айыма да ырдайт. Бүгүн өзүмдүн сүйүү тууралуу ырыма клип тартып жатам. Билбейм, негедир сүйүү темасында ырдагым келбей жаткан. Бирок бул ырдын клибинин сценарийи кызыктуу болгондуктан жумушту аягына чыгарыш керек болду.

– Жаңы эле клип тартып жаткан жигиттердин бири «Жаз келгенде жүрөккө сүйүү келет эле, сеники эмне, тоңуп калдыбы?» деп образга кире албай жатканыңды тамашалап өттү. Сүйүүдөн көңүлүң калдыбы?
– Билбейм, сезимдер тууралуу китебим алыскы жакта баракталбай жабылып жаткандай эле. Учурда мага эргүү бере турган китептерди окуп жатам. Мына, 29 жашка чыкканы турам. Ушундай бир курак болот окшойт. Азыр мен «сүйүү – бул жаштар үчүн» дегендей эле ой жүгүртө баштадым. Сүйүү да жаш куракка бөлүнөт, сыягы. Азырынча мага бул сезим тааныш эмес. Азыр бир эле сүйүүнү билем, ал – кыздарыма жана жакындарыма болгон сүйүү.

– Жеке жашооң талкууга алынып, сен тууралуу түрдүү кептер айтылып келет. Көңүл кирдеткен сөздөрдү кантип көтөрөсүң?
– Аябай көп талкууга алынып жатканымды эми сезип жатам. Ооба, азыр менин жеке жашоомдогу суроолор, андагы өзгөрүүлөр адамдарды тынч койбой жатат. Себеби баары көз алдына сонун картинаны элестетип алышкан. Анан ошол сүрөттүн өңү өчүп же жаан тийип бузулуп баратса айрымдары ошону каалашат, кээ бирлери каалабай жатышат, айтор, баары ошону талкуулап калышат. Ушундай сыноо менин жашоомдо болушу керек эле деп ойлойм. Ар бир адамдын турмушунда аны сынай турган мезгил болот эмеспи. Бирок бул мезгил менде көптөн бери эле уланып келе жатат. Ошентсе да биз аны амандыгыбыз, сабырдуулугубуз менен жеңүүнү билишибиз керек. Балким, өзүм ушуну каалагандырмын, анткени атактуулукка бара жатып баарына даяр болуш керек экен. Медалдын эки тарабы бар дегендей, бир тарабы сени канчалык кастарлап турса, экинчи тарап ошончолук жүрөгүңдү оорутуп, сындырганга аракет кылат.

– Ошол сен тууралуу бүтпөгөн талкуулардын аягы үй-бүлөңдүн урашына таасирин тийгизди деп ойлойсуңбу?
– Бул эми кырсык сыяктуу нерсе да, кайсы бурулуштан кырсык болуп кетери белгисиз. Өткөн нерсеге өкүнгүм келбейт. Биздин үй-бүлөнүн баштапкы жашоосунда андай ушак-кептер жок деле болчу. Менин жеке жашоомду эч ким талкуулачу эмес. Себеби эч нерсе ачыкка чыга элек эле. Качан үй-бүлө ичиндеги маселе, көйгөйлөр сыртка чыкканда эл кызыгып талкуулап, андан ары өздөрү жомокторду токуп көркөмдөп башташты. Коомчулук «Анжелика ажырашууга арыз жазыптыр» дегенде дүң этти. Өзүм да туура эмес кадам жасап алдым. Туура эмес убакта эски сүрөттү жүктөй калам деп, аны «Анжелика бирөө менен эс алып жүрөт» деп айтып чыгышты. Кандай жагдай болбосун жолдошум экөөбүз кыздарыбыз үчүн жакшы мамилебизди сактап калабыз. Анткени ушунча жыл чогуу жашап, экөөбүз бир туугандай эле болуп калдык. Азыр деле чалышып, кеңешип турабыз. Ал эми ажырашуунун себебин жалгыз ал билет жана мен билем, ошол жетиштүү.

– Сенден «жарашып эле жашап кетчи» деп сурангандар көп болууда, алардын суранычын эске алып жатасың да?
– Ооба, мен деле толтура ажырашуу жолунда жүргөн түгөйлөрдү жараштырып жүргөм. Алардын кээ бири азыркыга чейин жашап жатса, айрымдары болбой эле эки айрым жолго түшүштү. Учурда мага ушундай сөздөр көп айтылып жатканы чын. Бирок ажырашуу бул кагаздагы эле сөз, никеси бар же никеси жок деген. Менимче, адамдар чыныгы никеде жашаса ошол маанилүү. Мен эч качан качандыр бир күнү ажырашам, анан ал нерсе талкууга алынат деп ойлогон эмесмин. Бул жашоодо элдин сөзүнөн коркпой башкалардын ою менен эмес өзүм каалагандай жашайм. «Эл эмне дейт?» деп жашай турган болсом мага кыйыныраак болуп калат.

– Инстаграмда «Анжелика антифанат» деген баракча ачылып, сен жөнүндө түрдүү терс пикир жаратуучу маалыматтарды таратып жатат, мындай аккаунттар менен күрөшүп жатасыңбы?
– Жогорудагы сиз атаган баракчада мен тууралуу жалаң ыплас сөздөр жазылып жатты. Бул баракча башында башка аталышта болчу, бирок кийин аталышын өзгөрттү. Кээ бир тастыкталбаган маалыматтарды жазганда «айта берсин» деп көңүл бөлгөн эмесмин, бирок акыркы күндөрү кыздарыма, ата-энеме асылганына чыдай албадым. Мен жөнүндө эмне десе мейли, бирок жакындарым ыйлап жатса, кыйналып, алардын калп сөздөрүнөн жабыр тартып жатса карап тура албадым. Укук коргоо органдарына кайрылып, баракчанын ээсин таап берүүнү сурандым. Алар табылды. Ал баракчанын артында башка улуттагы беш мырза аныкталды. Мени караласын деп акчасы көп адам буюртма бергенин сезип турам. Кыздарым Инстаграмга кирип аларды окуй элек, окуулары менен алек. Кыздарым чоңойгондо өздөрү туура түшүнүп алышат деп ойлойм.
Менин ордумда башка бирөө болсо өз өмүрүнө кол салышы мүмкүн эле. Мени каралагандар менин жок болуп кетишимди каалашат. Мен аларга андай ырахат тартуулай албайм. Ушул баракчада таратылган маалыматтарды менин тааныштарым окуп алып азыр кээ бири мага мамилесин кадимкидей өзгөртүп ишенбегендей түр көрсөтүп жатышса, айрымдары аябай жакын болуп кетишти.

– Сага Баян Есентаеваны Бишкекке алып келүүгө көмөк көрсөткөн ишкер Марат Назарбековдун жубайы Айжан деген айым «Анжелика антифанат» баракчасын андан көрүп жатканыңды, мындан улам ал тергөөчүлөргө сурак бергенин жазып чыкты. Ал айымдын сени каралаган баракчага кандай тиешеси бар?
– Мен ал айым, анын жолдошу жана үй-бүлөсү жөнүндө такыр сөз кылгым келбейт. Алар өздөрүнүн үй-бүлөлүк чечилбеген маселелерин мени аралаштырбай чечип алышса жакшы болот эле. Менин үй-бүлөмдүн ичиндеги карталар ачылып, сүрөттөр баяндалып турат. Ал эми анын үй-бүлөсүндөгү күнгөй-тескейлерди, ал айымдын чыныгы жүзү кандай экенин эч ким териштирген жок да. Мен ал айымды көргөн эмесмин, сүйлөшкөн да эмесмин. 790 миңден ашуун окурманыма көрүнүп турган Инстаграмда номерим бар, ошого чалып мени менен сүйлөшкүсү келсе мен даярмын. Анан ары жакта отуруп алып мени элге жаман көрсөтөм дегени туура эмес. Ал айым мени кышында «жолдошум ушул ырчыга демөөрчү» деп айыптаган, ошол сөзү үчүн сотко бердим. Мага далилдеп берсин, качан, кантип мага жолдошу демөөрчү болгонун. Мен бирөөнүн акчасына муктаж эмесмин, мен керек болсо эң байдын байымын, эң кедейдин кедейимин! Мен акча тапканды, акча төлөгөндү жакшы көрөм. Намысыма тийген сөздөрү үчүн жооп берсин!

– Инстаграмды, социалдык тармактагы баракчаларды өчүрүп, жөн эле иштесе болбойбу деген ой болду беле?
– Жок, андай ой келген эмес. Мен белгилүү, атактуу адамдардын тренингдерине көп барам. Ошолор менен баарлашып калганда «сен кантип атактуулукка жеттиң, 2-3 адам жаман сүйлөп койсо эле токтотпошуң керек» деген сөздөрүн айтышкан. Чын эле жаман сөз келет, кетет, бирок жакшылыгың эч качан унутулбайт. Канча өмүрүм калса, ошончо жакшылык кылгым келет. Мен атактуулугумду туура багытта пайдаланып жатам деп ойлойм. Инстаграмда эң көп катталуучулар менде болгондуктан ал жакка туура, позитивдүү нерсени жүктөгөнгө аракет кылам. Канчалык сына турган абалда болсом да, мен жылмайып жатам, алар да жылмайышын каалайм. Көбү менин сүрөтүмдү көрүп тамактанат, кала берсе канчалык жаман көрсө да менин баракчама кирип карап өтөт (күлүп).

– Маегиңе чоң рахмат!

Лунара Бекиева
star@super.kg

 Кыстарылган видео