Жанета Баялиева, Кыргыз Республикасынын Эмгек сиңирген артисти: «МАГА БЕРИЛГЕН СЫНООНУ ТАГДЫР ДЕП КАБЫЛ АЛДЫМ»

Жанета Бобкова фамилиясын Баялиева деп өзгөрткөнүн көпчүлүк эле байкаса керек. «Мен жаңы жашоону баштадым. Балдарымдын кең келечеги үчүн болгон аракетимди жумшайм» деген ырчы айым учурда балдарын жалгыз тарбиялап жатканын айтат. Ырчы буга чейин айтылбай жүргөн сырларын, жеке жашоосундагы тагдыр бурулушун ачыктады.

– Жанета айым, саламатсызбы? Сиз менен көп жылдан бери кабарлаша элекпиз. Ал аралыкта жашооңузда кандай өзгөрүүлөр болду?
– Туура айтасың, бир топ жыл өтүп кетиптир. Мен чыгармачылык менен алекмин. Чет өлкөлүк фестивалдарга чакыруу менен барып турам. Былтыр КМШ өлкөлөрүнүн арасында Түркмөнстанда өткөрүлгөн фестивалга баргам. Ал жактан менин ырдаганымды жактырышып, Азербайжандын Гянджа шаарына фестивалга чакырышты. Ал фестивалга 15 мамлекеттин алдыңкы ырчылары чакырылдык. Азербайжан Эл артисти Полад Бүлбүл оглы грамота тапшырып өзүмчө сыймыктанып калдым. Андан сырткары былтыр Кайрат Примбердиев экөөбүз Орусиянын федералдык жыйынынын федерация кеңешинин төрайымы Валентина Матвиенко кол койгон күбөлүккө татыдык. Ал күбөлүк маданият жана искусствонун өнүгүүсүнө кошкон салымыбыз үчүн берилди. Убакыттын өткөнүн кара, билинбей эле сахнада жүргөнүмө 20 жылдан ашыптыр.
Ооба, ортодо «Супер-Инфо» гезити менен таарынычтар болгон. Бирок анын баары артта калды. Баарыбыз бир чөйрөдө жүргөндүктөн, өткөн-кеткен нерселерди унутуп койгонубуз оң деп ойлойм. Мына эми, буюрса, жаңы дем менен чыгармачылыкка кириштим.

– Туура чечим. Сиз «Даңк» орденин да алыптырсыз. Учурда мамлекеттик сыйлыктардын баркы кетти деп көп сындашат. Сиздин пикириңиз кандай?
– Азыр кесиптештер менен жолугуп сүйлөшүп калганда да бул тема козголот. Ортодо сыйлыкка жетпеген канча таланттар жүрөт. Бирок аларга эл мурун эле наамды берип койгон. Албетте, менин оюмча деле сыйлыктардын баркы кетип бараткандай.

– 20 жылдан ашык сахнада жүрүп, ишеничтүү курбу күтө алдыңызбы?
– Мен дээримден шайыр, боорукермин. Бирөөгө арам оюм жок. Ойлоп көрсөм, курбуларыма ишенип сырларымды айта берчү экенмин. Кийин ошонун баары чогулуп келип, далымдан бычак болуп өзүмө сайылганда гана туура эмес кылып жүргөнүмдү түшүндүм.

– Сахнада элдин маанайын көтөргөн ырчылардын деле көшөгө артында өз турмушу, кайгы-кубанычы болот эмеспи. Кайгы, кыйынчылыктарды кантип жеңесиз?
– Убакыт өткөн сайын адам такшалып, турмушка болгон көз карашы өзгөрөт экен. Ар бир үй-бүлөдө, ар бир адамда маселе болот. Биздин жүрөгүбүз канчалык канап, ыйлап турса да сахнага чыкканда аны билдирбешибиз керек. Элдин маанайын көтөрүп, позитив тартуулашыбыз кажет. Мен сахнага чыгып элди көргөндө баарын унутам, ырдаганда эмоцияларымды чыгарып алам. Сахнадан көшөгө артына өткөндө баягы эле көр оокат башталат (күлүп). Үйдө болсо балдарыма алсыздыгымды көрсөткүм келбейт. Алар мени күчтүү аял катары гана билиши керек. Аябай оор учурда үйдө жалгыз отуруп, баарын таразалап туура чечим чыгарганга аракет кылам.

– Балдарыңыз деле чоңоюп калыптыр. Жалгыз тарбиялап жатасызбы?
– Ооба. Бала чоңойгон сайын кийим, окуусуна көп каражат кетет. Колдон келишинче татыктуу билим алышсын деп тытынып иштейм. Улуу кызым Арина 16 жашка чыкты, келечекте психолог болом дейт. Уулум Максим программисттик кесипке кызыгат, 14 жашка чыкты. Кызымды турмушка бышсын, апасы кантип акча табат, көрсүн деп дайым жаныма алып жүрөм. Менин ишеничтүү жардамчым. Экөөбүз курбудай жакшы сырдашабыз.
Балдарым баарын көрүп-билип, турмуштун оош-кыйышын түшүнүп калышты. Кыйын күндөрдө кызым «апа, кайгырбаңыз. Бизде баары жакшы болот» деп мага колдоо көрсөтүп турат. Балам болсо «үйлөнгөндө сиз менен чогуу жашайбыз, сизди эч жакка кетирбейм» дейт.

– «Маңдайга жазылган» дегенге ишенесизби?
– Маңдайга кандай нерсени жазса, канча аракет кылбагын, өзгөртө албайт экенсиң. Мага берилген сыноонун баарын тагдыр деп кабыл алдым, Кудайдан деп билдим. Тагдырга баш ийдим.

– Жеке жашооңуз тууралуу өйдө-ылдый сөздөр айтылды. Чындыкты өз оозуңуздан уксак...
– Жашоо ушундай экен, эртең кандай болуп кетерин билбейт экенбиз. Жолдошум менен түтүн булатканыбызга 16 жыл болуптур. Тилекке каршы, экөөбүз эки жыл мурун расмий түрдө ажырашканбыз. Бул нерсени элге жарыя кылбай эле коёлу дегенбиз. Интернетке жагымсыз маалыматтар тарап кетти, чындыкты айтууга аргасыз болдум. Кайнатам да биз тууралуу айтыптыр, ал акылдуу киши эле, айланасындагылардын таасири болду окшойт.
Акыркы кезде жолдошум экөөбүздүн ортобузда түшүнбөстүктөр болуп, көп таарынышып жүрдүк. Акыры бири-бирибизди кыйнап жашабай эле коёлу деп чечкенбиз.

– Жубайлар ажырашканда көпчүлүк аялзатын күнөөлөшөт. Сиз эмне дейт элеңиз?
– Эки алаканды чапса анан үн чыгат. Турмуш татаал экен, аны алып кетүү да оңой эмес. Экөөбүз сүйүүбүздү бакпай ушул жыйынтык болду окшойт.

– Сиздин дарегиңизге да жагымсыз кептер айтылыптыр.
– Мен балдарыма тарбия берип чоңойттум, алар мени тандап мени менен калышты. Бала жаман энени тандамак эмес да, туурабы?
Атактуу болгондун бир кемчилиги – ушак көп. Аял кишинин үй-бүлөсү бузулгандан кийин ажырашкан деген статус жаман экен. Ар кимди жабыштыра беришет. Башында аябай жаман болуп жүрдүм. Тийишкен мырзалар да көп. Сүйүүсүн билдирип, турмуш курууга чакыргандар көбөйдү. Бирок эркектерден аябай көңүлүм калды.

– Мезгил дарылайт дешет. Кийин сиздин кадырыңызга жеткен мырза табылса, өмүрүңүздү байлашыңыз мүмкүнбү?
– Аны убакыт көрсөтөт. Эгер маңдайга жазылса, эки баламды өзүнүкүндөй кабыл алса, нике кайып болсо, балким, ал нерсе да болуп калар...

– Кыялкечсизби? Эмнелерди көп кыялданасыз?
– Мен реалистмин. Кыялданып отурбай бир максат кылдымбы, түз эле ошону багындырганга аракетимди баштайм. Куру кыялдарга убактымды коротпойм.

– Эгер мүмкүнчүлүк болсо жашооңузду кантип өзгөртмөксүз?
– Бул суроону кечээ кызым берди эле. Мен «өзгөртмөк эмесмин» дедим. Эгер башка жашоону тандасам силер жок болот элеңер, силердин барыңарга рахмат, ошого ыраазымын дедим.

– Маегиңизге рахмат.

Гүлжамал Абылкасымова
Адилет Бектуров
star@super.kg

 Кыстарылган видео