СҮЙЛӨШКӨН КЫЗЫН ӨЛТҮРГӨН ДЕП ЖИГИТИ КАРМАЛДЫ

24-мартта Бишкектин четиндеги Ак-Ордо-2 жаңы конушунда киши колдуу болуп каза тапкан 25-30 жаштардагы аялдын жансыз денеси табылган. Көп өтпөй анын ким экендиги аныкталып, сөөгү туугандарына өткөрүлүп берилген. Андан соң аны өлтүргөн деп шектелип 25 жаштагы Т.Б. аттуу Бишкек шаарындагы жаңы конуштардын биринин тургуну кармалды.

«МАРКУМ ӨТКӨН ЖЫЛДЫН ДЕКАБРЬ АЙЫНДА ӨЛТҮРҮЛГӨН»
Бул кылмыш тууралуу Чүй ОИИББинин басма сөз кызматынын кызматкери Нургүл Нусупова төмөнкүлөрдү айтып берди:
– 24-март күнү Сокулук РИИБинин нөөмөт бөлүмүнө Ак-Ордо-2 жаңы конушундагы жер тилкелеринин биринен белгисиз аялдын жансыз денеси табылгандыгы тууралуу маалымат түшкөн. Аталган дарекке барган ыкчам иликтөө тобу ал жерден буту байланып, үстүнө таш ташталган 25-30 жаштардагы аялдын өлүгү жатканына күбө болушкан. Бул факт боюнча Сокулук РИИБинин тергөө кызматы тарабынан Кылмыш-жаза кодексинин 97-беренеси (адам өлтүрүү) менен кылмыш иши козголгон. Иликтөө иштеринин натыйжасында маркумдун ким экендиги аныкталып, ал 1992-жылы туулган А.Н. аттуу Талас облусунун тургуну болуп чыккан. 29-мартта бул кылмышка шектелип 25 жаштагы Т.Б. аттуу Бишкектеги жаңы конуштардын биринин тургуну кармалып, ал Сокулук РИИБинин убактылуу кармоочу жайына киргизилген. Алгачкы тергөө иштеринин жыйынтыгына караганда, кылмыш өткөн жылдын декабрь айында болгон. Кылмышка шектүү менен маркумдун ортосунда уруш чыгып, ал маркумдун өлүмүнө алып келген. Шектүү кылмыш ишин жашыруу максатында маркумдун денесин жаңы конуштардын бириндеги жер тилкелерине алып барып, үстүнө таштарды үйүп салган. Б.Т. таксист болуп иштеп жүргөн. Учурда тиешелүү соттук-экспертизалар дайындалып, тергөө амалдары жүрүп жатат.

«НЕБЕРЕМ ИШТЕГЕНИ БИШКЕККЕ КЕТКЕН ЭЛЕ»
Маркум Түркияга барып иштеп келүүгө даярданып, жол киресине акча топтоп жүргөн. Бул тууралуу аны кичинесинен тарбиялаган таятасы айтып берди. Небереси тууралуу Талас облусунун Бакай-Ата районунун 66 жаштагы тургуну Жаныбек Сооронбаев буларга токтолду:
– Неберем 1 жарым жашка чыкканда кызым менен күйөө балам ажырашып кетишкен. Ошондон баштап ал биздин колубузда тарбияланды. Атасы менен апасынын башка үй-бүлөсү бар. Неберем мектепти аяктагандан 2 жылдан кийин өзүбүздүн айылдык жигитке турмушка чыккан. Бирок кийин кайненеси менен келише албай жолдошу экөө ажырашып кетишти. Жолдошу экөөнүн ортосундагы уулу азыр 5ке чыгып калды. Ал баланы багышып жардам берүүгө менин алым жетпейт, кемпирим 4 жыл мурун каза болгон. Ошондуктан неберем баланы күйөө балама таштап, иштегени Бишкекке кеткен. Ал жакта шаурма жасап саткан жайда иштеп жүргөн.
Акыркы жолу 2017-жылдын октябрь айынын аягында үйгө келип жолугуп кеткен. Ошондо ал Түркияга барып иштеп келем деп айтып жаткан эле. Декабрдын 15теринде келиним менен да телефон аркылуу сүйлөшүп, 20ларында Түркияга кетерин айтыптыр.

«ТУУРА ЭМЕС АДАМДАРГА ИШЕНИП АЛГАН ОКШОЙТ»
– Ошол бойдон дайыны жок болуп кетти. Телефонуна чалсам, өчүк болуп туруп алды. Издеп баштадым. Бишкекке барып досторунан, чогуу иштегендеринен сураштырсам эч ким билбейт, таппай койдум. Түркияга кетип калган окшойт деп кызымдын телефон чалышын күтүп жүргөм. Анан эле интернетке чыккан сүрөтүн балдарым көрсөтүп калышты. Мындай окуя болот деп ким ойлоптур? Анын өлтүрүлүшү тууралуу жаман кабарды укканда өзүмдү жоготуп коюптурмун.
Сөөктү айылга алып келип, 26-мартта жерге бердик. Неберемди өлтүрдү деп шектелип анын сүйлөшүп жүргөн жигити кармалыптыр. Неберем ал жигит тууралуу бизге эч нерсе айткан эмес, жигити бар экенин да билген эмесмин. Ошол жигит өлтүргөнүн моюнуна алыптыр деп уктум.
Менин божомолум боюнча неберемди 1 эмес, 2-3 адам биригип пландап эле өлтүрүп, анын Түркияга кетүүгө жол кире үчүн чогулткан акчасын алып коюшкан. Көтөрүп жүргөн сумкасынын боосу менен эле муунтуп өлтүрүшүптүр. Аны өлтүргөн адам колу менен кылганын моюну менен тартсын. Мыйзам чегинде жазалансын. Кызым ак көңүл, ишенчээк эле. Минтип туура эмес адамдарга ишенип алган окшойт.

Перизат Музуратбекова
koom@super.kg