АЖОНУН БАШКЫ ЖАН САКЧЫСЫ КЫЗМАТТАН КЕТТИ

Улуттук коопсуздук мамлекеттик комитетинин 9-бөлүмүнүн, тактап айтканда, Мамлекеттик күзөт кызматынын башчысы Дамир Мусакеев президенттин буйругу менен кызматынан бошотулду. Мусакеев Мамлекеттин күзөт кызматынын башчылыгына ошол кездеги президент Алмазбек Атамбаев тарабынан 2016-жылдын 1-июнунда дайындалган. Ага чейин ал Алмазбек Атамбаевдин жан сакчысы болуп иштеген.
КСДПнын 31-мартта өткөн курултайында Мусакеевдин экс-ажо Атамбаевди кайтарып жүргөнү коомчулуктун сынына кабылды. Мыйзамга ылайык, УКМКнын 9-бөлүмү өлкө жетекчилеринин – президент, парламент спикери, премьер-министр жана Жогорку Соттун төрагасынын коопсуздугун камсыздайт. Экс-президент макамына ээ адамдар дагы мамлекет тарабынан коргоого алынат. Бирок Мусакеевдин дагы бир экс-президент Роза Отунбаеваны кайтарып жүргөнүн коомчулук байкай элек.
Мусакеевдин ордуна Жалал-Абад облустук ички иштер башкармалыгын 2011-2013-жылдары жетектеген Малик Нурдинов келери айтылууда.

Бектур Токтоноев
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 805, 6-апрель -12-апрель, 2018-ж.