Назира Бердигулова, актриса: «ЖОЛДОШУМДУН МУРУНКУ ЖУБАЙЛАРЫ МЕНЕН СЫЙ МАМИЛЕДЕМИН»

Актриса, телеалпаруучу Назира Бердигулованын айланасында бойдок кезинде кеп-сөз кандай көп болсо, турмуш курганда деле азайган жок. Буга себеп эмне? Актриса ал нерсени «демек, мен элге кызыктуу адаммын. Эң негизгиси сөз жабышса да, чөп чабышпасын» деп кабыл алат.
SUPER.KG порталына конок болгон Назира айымдын түз эфирдеги маегинин кызыктуу учурларын сиздерге сунуштайбыз.

– Тасмаларда жакшы аткарасыз. Актрисалык билимиңиз барбы же жөн гана таланттуусузбу?
– Актрисалык билимим жок. Кыргыз Республикасынын Эмгек сиңирген артисти, актриса Калича Сейдалиева эжебизден дикция, актёрдук чеберчилик боюнча сабак алып келем. Аракет, эмгек менен ушул даражага жеттик. Андан сырткары туура багыт койгон күчтүү режиссёрлор менен иштешкеним үчүн жакшы ролдорду жараттым окшойт.

– Жолдошуңуз сизге чейин эки ирет үйлөнгөн экен. Мурунку жубайлары менен бет келишкенсизби? Катышасыздарбы?
– Ооба, жолдошум мага чейин эки ирет үйлөнгөн. Биринчи жубайынан бир, экинчисинен да бир кызы бар. Ал айымдар менен сый мамиледемин, сүйлөшүп турабыз. Кыргызда жамандык-жакшылык бар эмеспи, катташабыз. Майрамдарда мен кыздарыбызды тамактанууга же эс алууга чакырып, колумдан келген жардамымды көрсөтөм. Бул менин аялдык милдетим деп эсептейм.
Турмушта ажырашуу кимдин гана башына түшпөйт. Мен жолдошума «кой, алар менен сүйлөшпө» деген күндө деле ал кабар алып турушу шарт. Мен деле энемин, андай нерсени жакшы түшүнөм.

– Турмуш деген оор экен да. Бирок сен сыр бербей жашап кеттиң. Жолдошуң кыздарына алимент төлөйбү?
– Албетте, толук төлөйт. Колунан келген жардамын берип келет.

– Эжеге бир эле суроо, үйүңөрдө канча машинаңар бар?
– Бул суроого жооп бербейм (күлүп)... Ар бирибиздин бирден машинабыз бар, ошол жетет го. Негизгиси унааларыбыз жолдо калтырбайт. Машина ошон үчүн керек да.

– Табигый сулуусуң. Келбетиңе кантип кам көрөсүң?
– Рахмат. Мен жашоодо идеал туткан адам – апам. Апам кичинекей кезибизден чачыбызга айрандан маска жасап берчү. Азыр деле кызым экөөбүз айран, чалкан, жумурткадан чачыбызга маска кылып турабыз. Анан да мен жер-жемиштерди көп жейм, ошонун чоң пайдасы бар. Кымбат баалуу косметикаларга көп акча коротпойм. Табигый азыктарга көңүл бөлөм.

– Жолдошуңуздун биринчи жубайы айыккыс дартка кабылып, элден жардам сурап жүрүптүр. Силер акчалай көмөк көрсөттүңөрбү?
– Ооба, ал айым ооруп жатат. Мен кол сунганмын. «Кайрымдуулук фонд менен биргеликте концерт өткөрүп берейин» деп телефон чалып байланышкам. Концерттен канча каражат чогулушун алдын ала билбейм да. Бирок жардам берейин дегем. Тилекке каршы, ал «эл билишин каалабайм, башкалар эмне деп ойлойт?» деп баш тартып койду.

– «Бирөөнүн көз жашына бакыт кура албайсың» деген кыргызда сөз бар го. Ошол макалга кошуласызбы?
– Жаракат болсо аны эч качан бүтөй албайсың. Жашоодо эч качан айым тандабайт, мырза тандайт. Мырза сага колдоо көрсөттү, сени сүйдү, сени менен турмуш курам деди. Демек, анын чечими болду. Ал кыялындагы таппай жүргөн айымын жолуктурду. Мындай ашыктык болгондо эч ким жолтоо боло албаса керек. Эгер түгөйлөрдүн ортосунда тунук махабат болсо, ал үй-бүлө эч качан бузулбайт деп ойлойм.

– Стресске кабылган учурлар болгонбу? Андан кантип чыккансыз?
– Стресс дайыма эле болот. Биздин баскан-турганыбыз стресс менен коштолот. Мен стрессти спорт менен чыгарам. Чуркаганды жакшы көрөм, 8-9 чакырымга чейин жөө басам. Кээде баламды велосипедине салып алып, жаан, суукка карабай алыска чейин кете берем.


ТҮЗ ЭФИРДЕН СОҢ...

– Атактуу болом деп бала кезден кыялданчу экенсиң. Атактуулук сага эмне берди?
– Кичинекей кезимде чын эле атактуу болсом деп тилек кылчумун. Анда экранга супсулуу болуп чыкканга кызыксам керек. Анын артындагы түйшүктү билчү эмесмин да. Көрсө, сулуу болуп чыгыштын өзү деле эмгекти талап кылат экен. Атактуулуктун артынан тааныш күттүм, дос күттүм, колум узарды.

– Ар бир адамдын кемчилиги, артыкчылыгы болот. Сен өзүңдү кандай мүнөздөйсүң?
– Кемчилигим – ишенчээктигим, ачыктыгым. Өзүмдүн сабырдуулугума баа берем.

– Турмуштан кандай сабак алдың?
– Жашоодо айымдардын ортосунда эч качан дос болбойт экен, мен ошого ынандым. Сен сыйлап, ашыңды коюп, ыйласа кошо ыйлаган айымдар оңой эле сатып кетишет экен. Азыр менин эң жакшы курбум – бул жаздык. Ыйласаң да, кыйкырсаң да унчукпайт.

– Айрымдар «үй-бүлөдө аял көбүрөөк сүйүш керек» десе, айрымдар «эркек сүйсө үй-бүлө бекем болот» дешет. Сенин оюң кандай?
– Мырза көбүрөөк сүйүш керек. Мырзанын сүйүүсү бийик болсо, бүт нерсени жеңет. Аялзаты жакшыбы-жаманбы баарына чыдайт. Эркектер сен сулуусуң, сен мыктысың деп дайым мактап, колдоп турса ошол бизге чоң дем болот.

– Азыр ажырашуулар көп болуп жатат. Буга эмне же ким себеп деп ойлойсуң?
– Эч нерсе жөн жерден болбойт. Аракет кылып, ал жагынан карманасыңбы, бул жагынан карманасыңбы жашооңду өзгөртө албайсың. Демек, ал Кудайдын буйругу. Эгер мырза башканы сүйүп калса, аялзаты бир гана белди бекем бууп, жашоого тике карап, «күйөөсү таштап кетти» деген кепке калбай аракет кылышы керек. Эркектин артынан чукулап, жамандаган бул алсыздык деп эсептейм. Албетте, балдардын баары ата-эне менен өскөнү жакшы. Эркек менен аял ажырашам деп чечтиби, алардын иши. Ортодо кыйналган эле балдар.

Гүлжамал Абылкасымова
star@super.kg

 Кыстарылган видео