Гүлнур Асанова, ырчы жана актриса: «БАЛАМ БОЛСО УКМУШ СҮЙҮНМӨКМҮН»

Интернет өнүгүп социалдык тармактарды күндө сүрөтүн жүктөгөн жылдыздарсыз, аларга комментарийлерди жаадырган сынчыларсыз элестетүү кыйын. Бул ирет ырчы жана актриса Гүлнур Асанова айрым окурмандардын бүйүрүн кызыткан, ал эми хейтерлердин адаттагыдай жаадырган жагымсыз суроолоруна жооп бермекчи.

Edelveis929317
– Бир жумада берген убадаларын кантип аткарып үлгүрөт? Билбейм, экс-күйөөң Супермен эле болбосо, анда таарынсаң болот.
Гүлнур: – Жеке жашоомо тийиштүү суроолорго мен жооп бербей калгам. Эң негизгиси Кудайга койгом.

DAIN
– Өзүн назик, периште көрсөткүсү келгени менен, иш көп бул сулууда да, теңиңди табасың деп ойлойм.
Г.: – Рахмат, жок дегенде теңиңди табасың деген сөзүңүзгө.

KIRA.
– Бул шоу-бизнестегилер өздөрүн пиарлап бүтпөйт го, ээ, популярдуу кайсы ыры бар бул айымдын? Бир жаркылдап жүргөнүн көрбөйм.
Г.: – Мен өзүм муңдуу, лирикалык ырларга жакынмын. Салттуу музыкада хит жаратып жылдыз болуу максат эмес. Башкы вазыйпа – муундан-муунга элдик чыгармаларды бузбай калтыруу, жеткирүү, жоготпоо. Пиар менен алек болгон учурум болгон эмес. Буюрса, эми жаркылдаганымды дагы көрүп каларсыз.

Nanei
– «Орус мектепте окуп, орус мүнөзмүн» дегенди бул да кыпчып кетиптир.
Г.: – Кыргыз мектепти окуп, ЖОЖду дагы кыргызча аяктагам. Болгону экинчи жогорку билимимде гана орусча окууга туура келген. Болушунча адабий тилде сүйлөгөнгө аракет кылам. Анткени кыпкыргызмын.

saamalya__01
– Балаң барбы сенин, Гүлнур?
Г.: – Балам болсо укмуш сүйүнмөкмүн. Бир тууган эжемдин баласына төрөлгөндөн баштап каралашып, сүрөткө көбүрөөк түшүп, баракчама чыгаргандан улам «ушул балаңбы?» деп сурагандар көп. Төрөт үйүнөн чыгарган күндү видеого түшүргөнбүз. Жомок токуп менин балам дегендерге эмне дейм эми, ошол видеобузду көрүп кеткиле анда! Жээним апасына таарынганда «мен эжеме бала болом» деп таарынат.

aik951
– Мынча куниксиң...
Г.: – Ушул суроону берген адамдын өзүнүн бетин көрүп суктангым келди. Ар бирибизди жаратуучу Аллах. Эң негизгиси 12 мүчөм түгөл экенине шүгүр кылам.

kubatova_0711
– Сиздин да көзүңүз минуспу? Кандай дары тамчылатасыз, кандай витаминдерди ичесиз?
Г.: – Ооба. Врач жазып бергендерден башкасын колдонуп көргөн эмесмин. Көбүнчө көзгө тиешелүү көнүгүүлөрдү жасап турам. Анткени дарылардан көрө көнүгүүлөрдүн пайдасын кадимкидей байкагам.

Asipatapaeva
– Сен да мактанчааксың. Өзүңдү сулуу сезбечи. Такыр жакпайсың.
Г.: – Беш кол тең эмес, кээ бирлерге жагам.

abdamitov.nursultan
– Эл адамы болгондон кийин сынды көтөрө билиш керек. Баарына тегиз жакпайсыңар өзүнүн майына өзү куурулуп эле жүрөт ушул эже.
Г.: – Сындын да чеги болот. Туура сын-пикирди көп эле кабыл алам.

musa_barber1991
– Гулнур айым, мен сизди бактылуу кылмакмын, эгер кааласаңыз. Бирок акчам, байлыгым сиздикинен аз.
Г.: – Азыр мен эч кимге ишенбей калгам.

Asnlieva
– ГКНБ кыларга иши жок «псевдо жылдызга» жазган комментарийлерди аңдып отура беришет бекен?
Г.: – Аңдыйт деп эч ким айтпаса керек. Бирок мыйзам чегинде баарын аткарса болот.

DAKS
– Качан кабагы ачылат, мурун эле ачылчу эмес эле эми «после развода» такыр ачылбай калганбы?
Г.: – Тилекке каршы, жасалма жаркылдай албайт экенмин.

keldibekova.janara
– Кандайсың? Ушу жазган ар бир комментарийге жинденип өзүңдү ачууга алдырбай жүр. Ушу жаман жазган комментарийди көңүлүңө алсаң жинди болуп каласың. Сабырың жок экен.
Г.: – Сабырдуу болуш оңой эмес. Бир күн орун алмашып көрсөк болор эле).

bema3262
– Күйөөгө эмнеге тийдиң эле? Калың алуу үчүнбү же ойноппу?
Г.: – Калыңды алуу үчүн тийсем, кайтарып бермек эмесмин. Мага бөтөн акча керек эмес! Менде баары Кудайга шүгүр, жетиштүү! Ойноп кайсы кыз тиер экен күйөөгө? Же күйөө оюнчукпу? Күйөөгө ар бир аялзаты бактылуу болсом, балалуу болуп, түтүн булатып сонун көз ирмемди өткөрсөм деген ниет менен тиет! Жашоо оюнчук эмес да, ойноп эскирсе жаңы сатып алгыдай. Же болбосо үйгө келгенде жакпай калып базардан алмаштырып келгидей. Тагдыр, жазмышты кийинчерээк түшүнөт чыгарсыз.

Atahsov
– Гүл кармап колдоруңа муңдуу карап,
Жылмайып турасың го, бакыт самап.
Кудайым жакшы нерсе бере көрсүн,
Кыргыздын керегине койчу жарап.
Г.: – Рахмат, сизге да Кудай жакшы нерселерди берсин!

muenchen.kg
– Калдарыңды алдыртсаң болот. Меники дагы бар болчу, жакшы врач таап алып салсаң болот. Бул менин жеке оюм.
Г.: – Бирөөсүн алдырайын деген ой болгон, менин ден соолугума кооптуу экенин айтышкан соң жүрөм да калым менен).

Асхат Субанбеков
star@super.kg