8 адамдын өмүрүн алган кырсык. АЙДООЧУ «ЖИНДИ» ДЕГЕН МААЛЫМКАТ МЕНЕН КУТУЛАБЫ?

2017-жылдын 20-июлунда Ош-Бишкек жолунда 3 унаа, жүк ташуучу МАН, Хонда Степвагон жана Хонда Одиссей унаалары катышкан жол кырсыгы катталып, ал 8 адамдын өмүрүн алып кеткен. Бул окуя боюнча соттун өкүмү чыга элек. Бирок жабырлануучулар айдоочулар жазадан кутулуп кетет деп кабатырланышууда.

АЙДООЧУЛАРДЫН БИРИ КҮБӨ, ЭКИНЧИСИ ООРУЛУУ
Гезитибиздин №769 санында бул кырсык тууралуу сөз кылып, жол кырсыгынан каза тапкандар, алардын жакындарынын абалы тууралуу маалымат бергенбиз. Каргашалуу окуя 3 аял, 4 эркек жана 1 кичинекей кыздын өмүрүн алып кеткен. 3 адам ар кандай жаракаттарды алышкан. Арадан 9 ай өттү. Тергөө иштери аяктап, иш Ош шаардык сотуна өткөнү менен, азырынча соттун чечими чыга элек. Бирок жабырлануучулар "күнөөлүүлөр жазасын албай жоопкерчиликтен кутулуп кетишет" деп кабатырланышууда. Анткени сотто Хонда Одиссейдин айдоочусу күбө катары көрсөтмө берип жатса, Хонда Степвагондун айдоочусу психикалык жактан оорулуу деген маалымкатты көтөрүп жүрөт.

Ал учурда ИИМдин басма сөз кызматкери Эрнис Осмонбаев кырсык тууралуу төмөнкүлөрдү айтып берген:
– Бишкектен Ошту карай бараткан Хонда Степвагон үлгүсүндөгү унаа каршы тилкеге чыгып, жүк ташуучу МАН унаасы менен сүзүшкөн. Бул учурда үчүнчү унаа, Хонда Одиссей келип Степвагонду сүзгөн. Кырсыктын кесепетинен Степвагондун ичиндеги 8 адам каза болуп, айдоочусу оор жаракаттар менен ооруканага жеткирилген, унаа жараксыз абалга келген. Одиссейдин ичиндегилер жаракат алышкан эмес, унаа зыянга учураган. КамАЗдын ичинде 2 адам болгон. Алар башынан жеңил жаракат алышкан. Бул окуя боюнча Жалал-Абад ОИИБи тарабынан Кылмыш-жаза кодексинин 281-беренеси боюнча (Жол коопсуздук эрежелерин бузуу менен бир нече адамдын өлүмүнө алып келген кырсыкка себепкер болуу) кылмыш иши козголгон. ИИМдин башкы башкармалыгы тергөөнү жүргүзүп жатат. Автотехникалык экспертиза даярдалды. Айдоочу уктап кеткенби же унаанын тетиктери чыгып кеткенби, ал экспертизанын жыйынтыгы менен белгилүү болот.

«ВРАЧТАР МЕНЕН ТЕРГӨӨЧҮЛӨРГӨ АКЧА БЕРИП СҮЙЛӨШҮП ЖАТЫШАТ ОКШОЙТ»
Аталган кырсыктан Өзгөн районунун Кароол айылынын тургуну Бактыбек Кочкор уулу 16 жашар тун уулу Исламбек Бакытовдон айрылган. Ал "айдоочулар акчанын күчү менен кутулуп кетүүнү көздөп жатышат окшойт" деп тынчсызданууда.
– Хонда Одиссейдин айдоочусу Н.А. уулун башынан эле күбө катары сурашкан. Азыр да ишке күбө катары катышып жатат. Тергөөчүдөн эмне себептен мындай болуп жаткандыгын сурасак, «Одиссейдин айдоочусунун кырсыкты болтурбай коюу мүмкүнчүлүгү жок болчу» деп жооп беришти. Биологиялык экспертизадан Одиссейдин алдыңкы бөлүгүндө каза болгон кишинин каны, чачтары чыкканын өзүбүз окудук. Адамдар чачылып кеткенде өлгөнгө көмгөн кылып Одиссей кайра үстүнөн тебелеп кетиптир. Акыркы соттук процессте Степвагондун айдоочусу С.Д. уулунун психикалык жактан жабыркаган деп Оштогу ооруканага жатып калганын уктук. Чын-төгүнүн билели деп ооруканага барсак, бизге маалымат бербей коюшту. Бирок тааныштарым аркылуу сурасам, «андай оорулуу жок» деп айтышыптыр. Анан ал адамга маалымкат берген дарыгерди издеп баштадым. Багыттаманы Куршабдагы оорукананын Айпери аттуу врач-психиатры бериптир. Айпери мага оорулууну көрбөй эле жетекчиликтен келген буйрук менен багыттама жазып бергенин айтты. Ош облустук ооруканасында иштеген, Айперини көзөмөлдөгөн Нурлан деген врач телефон аркылуу чалып, багыттама жаздырыптыр. Ал врачтар боюнча да облустук прокуратурага арыз менен кайрылдым. Алар ачык эле кызмат абалынан пайдаланып жатышпайбы. Айпери мага «Нурлан текшерүүчүбүз. Жазып бербесем, отчётторумду албай кыйнайт» деп айтты. Минтип эки айдоочу тең кутулганы калышты. Ортодон балдарыбызды жоготуп биз гана күйүп жатабыз. Макул, ал айдоочу оорулуу экен. Анда ал кантип рулга отурду? Анда оорулууга айдоочулук күбөлүк бергендер да жаза тартышсын! Дагы эмне кылып жиберишет, билбейм. Сот системасына өтө нааразыбыз. Ошол күндөн бери баарыбызга Ошко улам келип-кетүү деле кыйын. Бир эже Чоң-Алайдан бери келет. «Мына, бүтөт» деп жатсак, эми ушундай сюрприз жасап жатышат. Айдоочулар врачтар, тергөөчүлөр менен сүйлөшүп, акча берип жатышабы, билбейм. Күнөөлүүлөр тиешелүү жаза алышсын, бизге моралдык да, материалдык да чыгым төлөшсүн. Алардын айынан адамдар каза болду, канчалаган үй-бүлө сыздап, көз жашын кургата албай жүргөндө күнөөлүүлөр жазадан кутулуп кетпеши керек.

Багыттама жазып берген Куршаб ооруканасынын Айпери аттуу психиатр врачына байланышканыбызда, ал «Бул окуя боюнча ич ара да иликтөө жүрүп жатат. Азырынча эч нерсе айта албайм» деп жооп берди.

Перизат Музуратбекова
koom@super.kg