Жоодарбешим, ырчы: «СҮЙҮҮБҮЗ КҮЧТҮҮ, БИРОК РОМАНТИК ЭМЕСПИЗ»

Жаш жубайлар ырчы Жоодарбешим менен Аксаана 5 жыл сүйлөшүп жүрүп баш кошушкан. Учурда наристе күтүп жатышат. Эки жаш менен баарлашып отуруп, «сүйүү бул – болбогон жомок» деген сөздүн өзү жомок экенине дагы бир жолу ынандым.

– Экөөңөрдү табыштырган кайсы күн? Ошондогу сезимдер эсиңердеби?

Жоодарбешим: – Аксаана экөөбүз жаздын жыпар жыттуу күндөрүндө, тагыраагы, 1-майда таанышканбыз. Ал күнгө миң рахмат. Биринчи көргөндө эле жүрөгүмдүн ээси ушул кыз деген ой келди. Бир көрүп сүйүп калуу дегенди укчумун, бирок башымдан өтө элек болчу. Дароо эле ашык болуп, сүйүүгө мас болуп, көздөрүм тумандап калды. Ошондогу сезимдерди сөз менен жеткире албайм. Ашыктык жалыны түн уйкумду бузуп, кайра-кайра обон кайрыктары келип, толкундардан чыга албай жаткандай бир башкача бушайман болгом. Ал кез тууралуу сурасаңыз ошол күндөр көз алдыма тартылып, дагы да толкунданып, акын болуп кетчүдөй болуп турам.

– Катуу сүйүптүрсүң да. Аксаана, Жоодарбешимди 1-көргөнүңдө кандай ой келди?

Аксаана: – Биринчи көргөндө Жоодар өзүн бийик сезген, керсейген адам көрүнгөн. Таанышып сүйлөшө келгенде менин оюм таптакыр туура эмес болуп чыкты. Тез тил табышып кеттик, турмушка болгон көз карашыбыз да бирдей экен. 1-2 жолу сүйлөшсөм да Жоодар мага көп жылдан берки таанышымдай сезилди. Ошондон кийин жакындан билгим келип, кызыгуум арта баштады.

Көрсө, Жоодар мен жакшы көрүп угуп жүргөн «Өкүнбө» деген ырдын аткаруучусу экен. Ал ырды уга берип, жаттап да калгам. Жоодар деген таанышыбыз деле жок, бирок апам капысынан Жоодар деп көп айтып алчу. "Ал ким?" деп сурап койчумун. «Пенденин оозунда болсо Кудайдын кулагында» деген ушул экен деп азыр ойлоп коём. Ошондо апамдын оозуна Кудайым күйөө баласынын ысымын салып коюптур. Апам экөөбүз ошол күндөрдү көп эстейбиз.

Ж.: – Бизди байлык, бийлик, атак-даңк же башка кызыкчылык эмес, ысык жана таттуу махабат бириктирип турат. Кудайым ушул сезимдерди узагынан кылсын.

– Сезимдер бир учурда экөөңөрдө тең пайда болуптур. Ошону билдирүү аракетин биринчи ким көрдү?

Ж.: – Албетте, эркек бардык жерде биринчи кадам ташташ керек. Ошондуктан мен биринчи сезимимди билдиргем. Ашык болгондугум ырас болгон соң мен эмнени күтүшүм керек деп ойлондум. Биз таанышкан 2013-жылы ырчы катары жаңы кадам шилтеп жүргөм. Аксаана менин ырымды угуп жүргөнү менен, өңүмдү тааный элек болчу.

А.: – Таанышканда мен Жоодарбешимдин ырчы экенин билген эмесмин. Спорт тармагында жүргөндүктөн ырчыларга маани берчү эмесмин. Апам казак кызы болгондуктан биз казак, кыргыз ырларын бирдей угабыз. Мен анын жубайы катары эмес, жөн гана угарман катары ырларын жогору баалайм.

– Романтиксиңерби? Мисалы, түнү менен кино көрөсүңөр же башка адатыңар бар дегендей...

Ж.: – Бул жагынан да окшошпуз. Сүйүүбүз күчтүү, бирок романтик эмеспиз.

– Бири-бириңерден алыста болуу оорбу, сурайын дегеним, Жоодарбешим бир топко Алматыда иштеп жүрдү окшойт.

Ж.: – Бири-бирибизден алыста жашай албайбыз го. Достор да бизди экөөңөр эки башка эмес, бир адамсыңар деп тамашалашат. Бир суткада 24 саат болсо биз ошол убакыттын баарын чогуу өткөргөнгө аракет кылабыз.

А.: – Жоодар Казакстанда аранжировкачы катары иштеп жүргөндө мен жанына барып алгам. Анткени тайларым ошол жакта, ал жак дагы мага жакын сезилет. Биз 5 жыл кыз-жигит болуп сүйлөштүк. Ал убакыт көз ачып жумганча өтүп кетти. Азыркы бир үй-бүлө болуп жашап жаткан күндөрүбүз ошондо кыял эле.

Кудайыма ыраазымын. Мени колдогон, сыйлаган, айткан сөзүнө турган, эки жүздүүлүгү, куулугу жок, ар дайым эркекче жүргөн жолдошум бар экенине сүйүнөм. Буюрса, мыкты ата болот деп ишенем.

– Ата-эне статусуна ээ болоруңарга канча калды?

Ж.: – Аз калды. 1 айдын тегереги.

– Бизге сүйүнчүлөгөндү унутпагыла. Уул күтүп жатасыңарбы же кызбы?

А.: – Күтүүсүз белек болсун деп атайын ага кызыккан жокпуз. Эң башкысы, акыл-эси менен, алты саны аман төрөлүп, элибиздин керегине жараган инсан болсо деп тилеп жатабыз.

– Келинчегиң бошонуп алгандан кийин кесиби боюнча иштейби же үйдө отур деген эркектерденсиңби?
Ж.: – Аксаана дизайнер, модель, спорт чебери, жеңил атлетика боюнча Кыргызстандын бир нече жолку чемпиону. Чуркоо боюнча 8 жыл машыккан, 30га жакын медалы бар. Бирок мен үйдө отурушун каалаган эркектерденмин. Нике окулгандан кийин эркек киши аялды бардык жагынан камсыз кылууга, аял киши сага бала төрөп берип, тукумуңду улоого милдеттүү. Билегимде каруум, башымда акылым бар кезде аялымды иштетпейм.

– Бири-бириңерди эмне деп эркелетесиңер?

Ж.: – Азыр деле жаңы таанышкандардай сөзүбүз бүтпөйт. Буюрса, ичер суубуз түгөнгүчө ушундай мамилебизди сактаганга аракет кылабыз. Аксаана мени мамалагым, арстаным деп эркелетет. Мен болсо чычалатып челегим деп коём.

– Кайнене-кайнатанын жанында деле бири-бириңерди эркелетип, кучактай бересиңерби?

Ж.: – Андайдан алыспыз, мусулмандар үчүн ал жат көрүнүш болуп калат.

– Жоодарбешим, чыгармачылыгың токтоп калгандай, эмнеге алыстап кеттиң?

Ж.: – Негизи акыркы учурда ушул сөз артымдан көп айтыла баштады. Мен өзүмдү анчалык деле жылдыз сезбейм. Бирок ырдаганымды токтоткон жокмун. Зал толо концерт берип, угармандарымды топтой алдым. Мени ырчы катары кумир тутуп, сыйлагандар да бар. Казактар да чыгармачылыгыма кызыгып, алар менен да иштешип келдим. Чынында чыгармачылыгым мурдагыдай болбой солгундап кетти. 2016-жылы менин аска-зоом болгон атам өтүп кетти. Атамдын жылдыгы өтсүн деп бардыгын жыйыштырып койдум. Айрымдар 2 айдан кийин өз турмуш-тиричилигин ойлоп алаксып кетсе, мен үчүн оор болду. Анын ордун азыр да толтура албай, кыйналып келем. Ыраматылык атамдын орду катуу сезилди, тагдырдан мага берген оор соккусу болду. Кенжеси, эркеси болуп чоңойгон жаным кабыргам кайышып, бул күндөрдү атамды сагынуу менен өткөрүп жүрөм. Чыгармачылыгымдын солгундашынын себеби ушундай. Кээ бир оозуна алы келбегендер табалагансып "күйүп-өчтү" деп жатышпайбы. Мен үчүн ийгиликтер алдыда.

– Рахмат маегиңерге. Аксаана, аман-эсен көз жарып ал.

Сүйүн Кулматова
star@super.kg