Мурадил Данияров: “ЫРЧЫЛЫККА КЕЛГИЧЕ ДАЛАЙ ОКУЯ БОЛДУ”

“Маликам”, Кызыңызды берчи, апа”, “Замана”, “Толгонай” деген ырларды угуп жүрсөңүз керек. Бул ырлардын аткаруучусу ырчы Мурадил Данияров позитивдүү маек куруп берди.

Аты жөнү – Мурадил Данияров
Туулган жылы, күнү – 1993-жыл, 22-ноябрь
Туулган жери – Жалал-Абад облусу, Базар-Коргон району, Карача айылы
Репертуарындагы ырлар – “Замана”, “Толгонай”, “Маликам”, “Кызыңызды берчи, апа” жана башкалар

– Мурадил, баары эмнеден башталды?
– Кичинемден ырдаганды жакшы көрчүмүн. Атам ырдап калат, үнү жакшы. Чоң атам болсо чечен болгон экен. Балким, ошондонбу, мен да өнөр дүйнөсүнө кадам таштадым. Кичинемден аккордеон чертип жүрдүм. Дагы бир өзгөчөлүгүм – ырды бир угуп жаттап, ошондой кылып туурап берчүмүн. Музыкалык чоң окуу жайга тапшырам деп жүрүп турмуш шартка байланыштуу башка окуу жайга тапшырып калдым. Бирок баары бир музыка жакка жүрөк тарта берди.

– Ырчылыкка таштаган биринчи кадамың кандай болду?
– Отуруш, кечелерге барып ырдап калчумун. Бирок кылган ишимден канаат албай, дагы башкача болсо дей бердим. Ырчылыкка чейин далай жол бастым. Көп жерлерге мурдумду тыгып көрдүм. Алгач тамада болом деп чечтим. Жалал-Абад шаарында 400 адамдык тойго тамада боло турган болдум. Жакшы эле даярданып сөз жаттап жаткам. Кудалар, кудагыйларды жакшы эле чыгардым. Тага журту дегенден кийин эле сөзүмдү таппай калсам болобу?! Ырчы жок, же бийчи жок. Той эмес эле, батага келген адамдардай соксоюп отуруп калышты. Алып барган тоюм эч жаккан жок. Эптеп эле убакыт өтүп кетсе дедим. Үйгө келип тамадалык менин өнөрүм эмес экенин түшүндүм да, “жок, мен актёр болом” деп чечтим.

– Актёр болдуңбу?
– “Миң бир түн”, “Мегатой” тасмаларында эпизоддук роль жараттым. Эмнегедир ал да жаккан жок. Айла жок ал жакты да токтотуп, эми ырчы болсом деп баштадым. Ыр жаздырдым. Акыркы акчаларымды чогултуп клип тарттым. Аябай кыйналып кеттим. Айылга барсам жакындарым “азаматсың, ийгилик сага” деп аябай дем беришти. Антип жатса кантип айылда калам? Ичимден “ооба, силерге азамат” деп коюп кайра борборго жол тарттым. Ичимден эмне кылсам деп кыйналып жатам. Ал кезде эч кимди деле таанычу эмесмин. Ошентип жүрүп аралаштым. Продюсерим Лутфилла байке менен ага-ини катары жүрүп “менеджер болуңуз” дедим. Аны да айта албайм десеңиз. Уялчаак болчумун да. Телефондун заряддагычын сурамыш болуп бара берчүмүн. Акыры айттым, макул болуп иштешип калдык. Кийин "продюсерим болуңуз" деп сурансам макул болду. 5 жыл чайналып жүргөн эмгегимден продюсер 5-6 айда жыйынтык чыгартты.

– Бардык эле клиптериң тамашалуу тартылат экен, идеясы кимдики?
– Мен негизи позитивдүү маанайда жүрөм. Элге да ошондой маанай тартуулагым келет. “Кызыңызды берчи, апа” деген клиптин идеясы актёр Эркин Эгембердиевдики. Эркин байке экөөбүз тасмага тартылып жатып таанышканбыз. "Маликанын" сөзү, обону аныкы. Ырымды болсо продюсерим бир угуп көрүп эле "ушу ырың хит болот" деген, айткандай эле болду. Анын да клибин тамашалуу кылып тарттык.

– Сендей ырчы болгусу келгендер көп да, тажрыйбаң менен бөлүшүп кетсең. Ырчы болуу үчүн сулуу жүзбү, эмгекпи же күчтүү продюсер керекпи? Же талантпы?
– Мына телефонду эле карасаңыз, сырткы кабыгы болбосо жакшы көрүнбөй калат, ичинде бир тетиги болбосо кайсы бир функциясы иштебей калат. Ырчылыкта деле ошондой. Биринчи орунда талант болуш керек экен, анан эмгек, продюсер, кээде сулуу жүз да керек. Ошонун баары бирдей керек.

– Жакшы көрүп калган кызыңды клиптегидей апасынан сурай алат белең?
– Сурамакмын, маселе деле эмес го.

– Дайым анда ушундай позитив маанайда жүр.

Нуржамал Жийдебаева
star@super.kg