БИР БҮРКҮМ. ӨЛКӨДӨ БЕНЗИН КЫМБАТТАШЫ КҮТҮЛҮҮДӨ...

Бишкек шаардык соту экс-депутат КАРГАНБЕК САМАКОВду 10 жылга эркинен ажыратуу боюнча райондук соттун өкүмүн күчүндө калтырды.
Мамлекеттик салык кызматы 2018-жылдын 1-январынан 1-июнуна чейин 30 МИЛЛИАРД 819 МИЛЛИОН СОМ салык чогултту. Бул тууралуу аталган мекемеден билдиришти.
2017-жылы Бишкек шаарында санитардык-экологиялык эрежелерди бузгандарга 2 МИЛЛИОН 198 МИҢ СОМ айып пул салынган. Бул тууралуу Санитардык-экологиялык инспекциясы билдирди.
Бишкекте миңден ашык адамдын катышуусу менен «Биз, жаштар, КЫЗ АЛА КАЧУУГА жана эрте турмуш курууга каршыбыз» деген аталыштагы флешмоб болуп өттү.
Парламент сот системинин 2017-жылкы иши боюнча Жогорку Соттун төрайымы АЙНАШ ТОКБАЕВАнын маалыматын укту.
Жогорку Сотто саясатчы САДЫР ЖАПАРОВдун ишин кароо башталды, кезектеги соттук отурум 13-июнда өтөт.
Мамлекеттик бажы кызматынын башчысынын орун басары ЗАМИРБЕК НИЯЗАЛИЕВ кармалды. Ал мамлекетке 116 миллион сом зыян келтирди деп айыпталууда.
Учурда өлкөдө 24 МИҢ БАЛА ата-энелери чет өлкөгө кетип, тууган-туушкандарынын колунда тарбияланып жатканын Эмгек жана социалдык өнүгүү министрлигинин өкүлү Назгүл Чолумова билдирди.
Кыргызстан-Кытай ГАЗ ТҮТҮГҮН КУРУУ 2019-жылы башталат. Бул тууралуу Өнөр жай, энергетика жана жер казынасын пайдалануу боюнча мамлекеттик комитеттин төрагасы Улан Рыскулов билдирди.
Бишкектеги Кыргыз техникалык университетинин кафедра башчысы студенттен 20 МИҢ СОМ ПАРА алып жатканда кармалды. Маалыматты Экономикалык кылмыштарга каршы күрөшүү кызматы билдирди.
Орусия заводдорунда баалар көтөрүлгөнүнө байланыштуу Кыргыз жеринде июнь айында КҮЙҮҮЧҮ МАЙДЫН БААСЫ кымбатташы күтүлүүдө. Бул тууралуу Кыргызстан мунай ташуучулар ассоциациясы билдирди.
"Чыгыш электр" ишканасы 32 миң "акылдуу эсептегич" сатып алуу үчүн Европа реконструкциялоо жана өнүктүрүү банкынан 4 МИЛЛИОН евро насыя алууда.

Автандил Добулбеков
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 814, 8-июнь -14-июнь, 2018-ж.