БИР БҮРКҮМ. ҮЙ-БҮЛӨЛӨРДҮН 20 ПАЙЫЗЫ АЛА КАЧУУ МЕНЕН КУРУЛГАН...

26-июнда Нарын облусунун Жумгал районунда жүзгө чукул КӨМҮР ТАШЫГАН УНААЛАРДЫН ээлери жана көмүр ташып иш алып барган тургундар ЖЭБге күл ташып кетүүгө мажбур кылып жатышкандыгын жана башка кысымдарга кабылып жаткандыгын айтып нааразычылык акциясына чыгышты.
Чүй облустук Ички иштер башкы башкармалыгынын башчылыгына милициянын полковниги САМАТ КУРМАНКУЛОВ дайындалды.
Өлкөдөгү КЫЙНООЛОРДУН 90 пайызы Ички иштер органдарында орун алат. Бул тууралуу Кыйноолорду эскертүү улуттук борборунун директору Нурдин Сулайманов билдирет.
Биринчи Май райондук соту бажы кызматынын мурунку башчысы КУБАНЫЧБЕК КУЛМАТОВдун камакта калуу мөөнөтүн 28-августка чейин узартты.
2018-жылдын башынан бери ЖЕМКОРЛУК боюнча 60 кылмыш иши козголгон. Мамлекетке келтирилген чыгым 1 миллиард 669 миллион сомго бааланды.
Бишкектеги "Ош базарында" ӨРТТӨН ЧЫГЫМ БОЛГОН 488 ишкерге 10 миң сомдон берилсе, Жалал-Абаддагы ишкерлер убактылуу салыктардан бошотулган. Бул тууралуу вице-премьер-министр Замирбек Аскаров билдирет.
27-июнда Талас облусуна караштуу Бакай-Ата районундагы Акназаров айылындагы Үрмарал капчыгайынан АЛТЫНДЫ КАЗУУ иштерине каршылыгын билдиришип 100гө жакын киши митингге чыгышты.
Балбан АЙСУЛУУ ТЫНЫБЕКОВА 11 айлык тыныгуудан кийин мелдешке катышып, эл аралык «China Open» турниринде коло байге жеңди.
Өлкөдөгү үй-бүлөлөрдүн 20 пайызы кызды АЛА КАЧУУ менен курулган. Бул тууралуу «Үй-бүлөлүк зомбулукка каршы» конференциясында айтылды.
КУШ ТУМООСУНАН улам Кыргызстанга Орусиянын үч облусунан куш этин алып келүүгө тыюу салынды.
27-июнда Жогорку Кеңеш Чынара Садырова менен АСКАТ СЫДЫКОВду Жогорку Соттун судьялыгына шайлады.
Бишкекте МИЛИЦИЯ КЫЗМАТКЕРЛЕРИ мушташты. Маалыматка ылайык, Биринчи Май райондук милициясынын кызматкери кол алдында иштеген кызматкерин сабап салган.
Жогорку Кеңештин VI чакырылышынын депутаттары 28-июнда КАНИКУЛГА тарашты. Кийинки жыйындар сентябрь айынан баштап улантылат.

Адилет Керимбек уулу
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 817, 29-июнь -5-июль, 2018-ж.