АРТИСТТЕРДИ ЖЫРГАТКАН, БАЛА-ЧАКАНЫ ЫЙЛАТКАН ТҮНКҮ КОНЦЕРТ

Концерттин аталышы – «Жыргализм»

Концерт өткөн күн – 25-26-июнь

Өткөн жери – Спорт ордосу

Башталышы – 21:45 (26-июнда 1 саат 45 мүнөт кечикти)

Көрүүчүлөр – Залдын 35-40 пайызы

Мыкты номер – Сапар Зулпуев менен Жакут Сыдыковдун айтышы, Гүлжигит Сатыбековдун аккордеон менен аткарган ырлары

26-июнь бир эле мага эмес, Спорт сарайына келген эл үчүн унутулгус болду окшойт. «Ий, укмуш болгон тура» деп барбаганыңарга кейип кеттиңерби? Ооба, укмуш өттү. Эми кандай десем, артисттерге чейин элдин концертин көрдүк. Саат 20:00дө башталат деген эл Спорт ордосуна 8 жарымга чейин бир-экиден келип жатты. Кечки саат 9га чамалап баштаганда сабыры кетип тарсылдатып ургулап жатып эшикти ачтырышты. Ошончо күтүп кирген соң дароо баштап салса экен деп тилейсиң да. Же эл чууруп киргенин койбоду, же концерт башталып кетпеди. Кечке сахнаны айланта коюлган жашыл фонду тиктеп отурдук.

 Концерт баштала бербегенинен залда өкүрүп-бакырып, «Гүлжигит, чы-ык» деп кыйкырып ышкыргандар көбөйдү. Бишкекте концертте эмес эле, айылда тойдо отургандай болдум. «Бул кандай элди сыйлабагандык? Акчабызды кайтарып бергиле, биз кетебиз» деп жигиттер, аялдар көшөгөнүн артына өтө башташты. "Түнкү саат 10го чейин концерт кармалчу эмес эле, кап, чыгып элге себебин айтып койсо болмок" деп аларга жан тартып отурган мен эле болдум окшойт. Нааразы болгон жанагы топ катуу уруштубу, айтор, көпкө күттүргөн куудулдар сахнага чыгышты.

«Ассалому алейкум» деген ыры менен «повод» бербей кубанычтуу чыга келишти куудулдар. Улам-улам кечиккени үчүн кечирим сурап жатышса, бирөөсү «элди жыргатабыз деп "пачагыбыз" чыкты го» деп күлүп коёт. Гүлжигит Сатыбековду «качан үйлөнөсүң?» деп эле жанын коюшпайт го. Бул ырчы үйлөнгөн окшобойбу деп койдум, анткени сөз арасында «Гүлжигит үйлөндү» деп кыстара кетишти.

Куудул Союзбек Нурлан Насип менен Асел Кадырбекованын тоюн "бир нерсесинен башка баарын элге жарыялашты" деп тийишти. Бир маалда эле куудулдар чыкты, ар кимиси бир аспапты кучактап. Союзбек «эми ыр кесеге орун берели. Сиздер да ырларды билсеңиздер колдоп-коштоп отуруңуздар» дебеспи. Жандуу ырдашса, жакшы болот турбайбы деп кубанып калгам. Анан эле башташты, бири артта, бири алдыда. Бири аны ырдаса, бири муну ырдап, сөздөрүн унутуп, айтор, отурушта отурган кызуу аяштардай элес калтырышты. Баарынан да өздөрүнө жагып жатты окшойт, аябай жыргап алышты. Алардан соң мен "бытыкыймын" деген Талха аттуу куудул жигит узун кепке кирип кетти. Концерттин башталышын күтүп отуруп чарчаган элдин айрымдары анын арманын укпай үргүлөп да кетти. Качан гана төкмө акын Сапар Зулпиев менен Жакут Сыдыков чыгып, тамаша аралаш айтышканда эл жандана түштү. Албетте, алардын бири-бирин "сен Мерген Турганга окшошсуң", "сен Кайрат Кыргыздайсың" деп тамашалагандары көп жага бербеди. Айтыш учурунда Болсунбек Стакеев менен Максат Тасмаевдин кыргыз көйнөкчөн чай ташып чыкканы концерттин эң туздуу жери болду окшойт.

 Концерттин аягында Гүлжигит аккордеон менен күйөрмандарынын суроосу боюнча ырларды аткарды. Түн бир оокум болгонуна карабай эл жандуу ырларды акыркы күчүн топтоп жандуу коштоп беришти. Саат 12ден ооп калганда бала-чака ыйлап, Спорт ордосу өзүнчө эле ызы-чуу болуп чыга келди. Уюштуруучулар кийинкиде элдин шартын да ойлоп койсо деген ой менен концертке тойгон-тойбогонумду билбей жолума түштүм.

Толик сынчы
star@super.kg