Криминалдан жабыр тарткан ишкер: “ИШТЕЙМ ДЕСЕҢ АКЧА БЕРЕСИҢ ДЕП САБАП, САКАЛЫМДЫ ЖУЛУШТУ”. "КАРАЛАРДЫ" КАНТКЕНДЕ ТОКТОТСО БОЛОТ?

Жакында милиция кызматкерлери "ишкерди коркутуп акча талап кылган" деп шектелген уюшкан кылмыш тобунун мүчөсүн кармашты. Ишкерлерди коркутуп, аларга салык салуу буга чейин деле көп катталып, бирок токтотулбай келе жатат.

ИШКЕРДИН 115 МИҢ СОМУН ТАРТЫП АЛЫШКАН

Жалал-Абад ОИИБинин маалымат кызматынын жетекчиси Мыктыбек Турдубековдун берген маалыматына ылайык, ушул жылдын 25-майында кылмыш тобунун мүчөлөрү Сузак районунда жашаган ишкерди коркутуп 115 миң сом акчасын тартып алышкан. Ишкер коркконунан укук коргоо органдарына арыз жазбай жүрө берген. Кийин гана милиция кызматкерлери бул окуя тууралуу билип, жабырлануучуга жолугуп, андан арыз алышкан. Бул факт боюнча Кылмыш-жаза кодексинин 170-беренеси (опузалап талап кылуу) боюнча кылмыш иши козголуп, 18-июнда бул кылмышка шектүү катары 1985-жылы туулган Н.З. аттуу Сузак районунун тургуну кармалган. Анын кылмыштуу топтогу шериктерине издөө жарыяланып, учурда тергөө иштери жүрүп жатат.

“АКЧА ТАЛАП КЫЛЫП САБАП КИРИШТИ”

Биз Арипжан аттуу жабырлануучуга байланышканыбызда, ал окуя тууралуу төмөнкүлөрдү айтты:

– Мен таш талкалаган заводдо иш башкаруучу болуп иштейм. Сайдан таш-шагыл алып келип, аны жууп-элеп элге сатабыз. Завод досторума тиешелүү, азыр 7 жумушчу иштейт. 25-май күнү түштөн кийин заводго бир жигит келип, “Арипжан деген ким?” деп сурады. “Менмин” десем, ал “сизде бирөөнүн иштери бар эле, барып келели” дегенинен машинасына отуруп жөнөп кеттик. Мен Сузак районундагы мамлекеттик органдардын биринин кызматкерлери болсо керек деп ойлогом. Ошентип Жалал-Абад шаарына бардык. Бизди спорт залдын жанындагы чайкананын жанынан 3-4 жигит тосуп алды. Экөөнүн аты Эркин, Замир экен. Алар мага “заводду жабасың. Иштейм десең 10 миң доллар бересиң” деп уруп, сакалымды жулуп коркутуп киришти.

Мени заводдун ээси деп ойлошту окшойт, алардын максаты – мени коркутуп, акча “грузить” этиш керек экен. “Анча акчам жок” десем, Эркин “анда сөз бүттү, жакшылыкты билбейт экенсиң, сени менен башкача сүйлөшөбүз” деди. Алар бир күн мурун менин үйүмө барып, үйдө канча киши жашаганынан бери билип алышыптыр. Кызым төрөтканадан чыгып, менин үйүмдө жашап жатканын да билишет экен.

Мен эптеп эле булардын колунан тирүү чыгып кетүүнү кааладым. Аларга жанымдагы 30 миң сомду берип, үйдөн да акча алып берүүгө аргасыз болдум. “Качып кетсең жерден чукуп болсо да таап алабыз” дешти. Ошентип экөө мени алып келишти, мен үйдөн 85 миң сом алып чыгып бердим.

“ЭМИ АРЫЗЫҢДЫ АЛ ДЕП СУРАНЫШУУДА"

– 2 күндөн кийин Замир деген жигит заводго дагы келип “Сен эмне кыйынсыңбы? Сенин үстүңдөн “кызылдар” арызданып жатышат. Заводуңду жабыш керек. Сен шефибиз менен сүйлөшүп алып анан иш кылбайт белең? Азыр шефке барып жолугасың” деп коркутуп кирди. Мен жолугууга барганга көнбөй койсом, кетип калды. Анан гана бул тууралуу досума айтсам, ал милиция кызматкерлерине айтып коюптур. Эртеси милиция кызматкерлери келип, окуя тууралуу сурап, арыз жаздырып кетишти.

Мени коркутуп, акча талап кылгандардын бирөөсү Замир дегенди кармап, отургузуп коюшуптур. Кармалган жигиттин тааныштары 3-4 жолу келип, "арызыңды кайра ал" деп суранып кетишти. Коркутушкан жок, бирок “Адам өлтүргөндөр тез эле бошоп кетип жатышат. Бул деле тез эле чыгат. Анан өзүңө эле зыян кылып койбосун” дешти. Көнбөй койдум. Бул жигиттер көп адамдарды коркутуп, аларга зулумдук кылышыптыр. Алардан жабыр тарткандарга жолугуп "силер да милицияга арыз жазгыла" десем, коркуп эч кимиси көнбөй койду.

Өлкөбүзгө туризмди жайылтып, инвесторлорду тартабыз деп уралап жатканда мындай окуялар бизге жакшы аброй алып келбеси бышык. Инвестор да кылмыштуу топтордун коркутууларына дуушар болсо экономика кайдан өнүгөт, өлкө качан бутуна турат? Ар бир өлкө жетекчиси, ар бир партия шайлоодо ишкерлерди, бизнести коргойм дейт. Андай убадалар ишке ашчу күн барбы?..

ӨЛКӨДӨ 3 ИРИ КЫЛМЫШ ТОПТОРУ БАР

Башкы прокурор Өткүрбек Жамшитов 30-майда парламентте отчёт берип жатканда Кыргызстанда негизинен 3 уюшкан кылмыш топ бар экендигин жана уюшкан кылмыштуу топтордун активдүү мүчөсү катары 523 адам каттоодо турарын билдирди. Ага ылайык, Камчы Көлбаевдин тобунда 424, Алмаз Бокушевдин тобунда 50, Азиз Батукаевдин тобунда 49 активдүү мүчөсү бар. Мындан сырткары ар кандай кылмыш топторунун 941 мүчөсү каттоодо турат.

Нурбек Абдыкадыров
koom@super.kg