Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

№819 13-июль -13-июль, 2018-ж.


Дүйшөнбек Байдөбөтов дүйнө салды. АКТЁР УУЛУНУН ӨЛҮМҮНӨН КИЙИН ЖҮРӨК ООРУСУ МЕНЕН АЛПУРУШУП КЕЛГЕН

Кыргыз Эл артисти Дүйшөнбек Байдөбөтовду акыркы жолу Кыргыз драма театрынан студенттерден экзамен алып жатканда көрдүм. Ооруп араң басып, араң сүйлөп турса да, жаштардын ойногонуна өз баасын берип, берилүү менен ар бир студенттин чеберчилигине шашпай токтолуп, акыл-насаатын айтып, багыт берип жатты. Иш дегенде, театр дегенде ичкен ашын таштап чуркаган инсан 69 жылдык өмүр тарыхын артка калтырып, 7-июль күнү арабыздан кетти. Ал үч жыл мурда инсульт алып, дарыланып жүргөн экен. Залкардын сөөгү 9-июлда өзү туулуп-өскөн Чүй облусуна караштуу Ысык-Ата районунун Үч-Эмчек айылында жерге берилди.


АТКАРГАН РОЛДОРУ:

  • Кинодогу ролдору – «Мен Тянь-Шань» (Илияс), «Айсулуунун талаасы» (Сабыр), «Каныбек»(Түлкүбек), «Акбаранын көз жашы» (Базарбай), «Саманчынын жолу» (Субанкул), «Кайчы жолдор» (Хан), «Белгисиз маршрут» (айдоочу), «Курманжан датка» (манасчы) жана башкалар.
  • Театрдагы ролдору – «Курманбек» (Курманбек), «Барпы ырчы» (Барпы), «Коммунист Танабай»(Танабай), «Отелло» (Отелло), «Дарак түбүндөгү махабат» (Кэбот) жана башкалар.
  • Сыйлыктары – 1995-жылы «Манас» медалын, 1978-жылы «Кыргыз ССРинин Эмгек сиңирген артисти» наамын, 1988-жылы «Кыргыз ССРинин Эл артисти» наамын алган. 1993-жылы Муратбек Рыскулов атындагы эл аралык сыйлыкка, 1999-жылы Чыңгыз Айтматов атындагы эл аралык сыйлыкка ээ болгон.

Актёр пенсияда экенине карабай акыркы жылдары Кыргыз драма театрында актёр жана театрдын алдындагы окуу жайда окутуучу болуп иштеп жүргөн.


АКТЁР БАСЫП ӨТКӨН ЖОЛ
Болочок актёр 1949-жылы, 5-январда Ысык-Ата районуна караштуу Үч-Эмчек айылында жарыкка келген. Ымыркайдын апасы ал кезде 49, атасы 73 жашта болгон. Бир тууган Байдөбөтовдордун төртөө согушка кетип, үчөө кайтпай калган. Актёр ал учурду бизге берген маегинде мындай деп эскерген:

– Мага чейин апам байкуш 15 бала төрөптүр. Эки баласы сууга агып каза болсо, төртөө согушка барып, алардын бири гана кайтып келип, сарык оорусунан көз жумат. Мен согуштан кийин төрөлгөм. Кичине кезимде атамдын сырты жыгач менен капталган Куран китептерин көтөрө албай жыгылган күндөрүмдү, айылдагы аялдардын баары кара кийинип алып суу жээктеп ыйлап отургандарын көп эстейм, ошондо Сталин өлгөн экен. 1-класска барганымда атамдан, 5-классымда апамдан айрылдым. Жалгыз эжем бар эле, ал да каза болуп калды.

1-класска барганымда окумак тургай, эки ай бою «а» менен «б» тамгаларын жаттай албай кыйналдым. Эжем мени сабап жүрүп окуганды үйрөттү.

Артист болом деген дымагы күч инсан мектепти аяктагандан кийин 1966-жылы Алай элдик театрына иштөөгө кетет. Москвадагы ГИТИСке студенттерди кабыл алып жүргөн мугалимдер тууралуу окуп калып, жарнамадагы жерге келсе, алар кетип калышкан болот. Комиссияны артынан кууп отуруп, аэропорттон кезиктирет.

«Окууга тапшырайын дедим эле, комиссия кетип калыптыр, ошолорду кууп баратам» дедим. Режиссёр Аманкул Куттубаев «Алайдан бери кууп келе жатса, бул баланы өттү деп жазып коёлу»деп мени каттап коюшту. 20-майда дагы сынак болду, кезегим жетип кирсем, комиссияда Муратбек Рыскулов, Даркүл Күйүкова, Бакен Кыдыкеева, Советбек Жумадылов, мен тапшырып жаткан окуу жайдын ректору Алексей Горбуновдор отурушуптур. Образга кирип ыйлап, «Карагул ботом» дастанындагы атанын монологун айтып бердим. Жыйынтыгында «Байдөбөтов өттү!» дегенди угуп алып башым тегеренип, жер көчүп, кан басымым көтөрүлүп кетти.

Ошентип, актёр Москвага окууга өтөт да, кетер алдында «үйлөнөм, болбосо сүйүктүүмдү ала качып кетишет» деп арзыганы, классташы Кенже Исмановага баш кошот. Ал учурду актёр мындай деп эскерген.

– Байбичем Кенже менин классташым. Мектепте окуп жүргөндө эле кыз-жигит болуп сүйлөшүп жүрүп, башкага тийип кетпесин деп эрте үйлөнүп алгам. Жаш кезде жалындап сүйгөн-күйгөн, тентектик кылып койгон учур менде да болгон. Анын баарына байбичем чыдады. Ал опералык студияны бүткөн, азыр театралдык окуу жайдын көркөм жетекчиси болуп иштеп жүрөт.

Чыңгыз Айтматовдун «Кызыл жоолук жалжалым» чыгармасынын негизинде тартылган «Мен Тянь-Шань» тасмасына кастинг болуп, жоон топ студенттердин арасынан 2-курстун студенти Дүйшөн Байдөбөтов Илиястын ролуна өтүп кетет.

– Кышында ал киного тартылам деп алакандарымды үшүккө да алдыргам. Азыр ойлоп коркуп кетем, тайгак жолдон машинаны учуртуп айдап баратып киши сүзүп же өзүм авария болуп кетсем эмне болмок деп. Анда менин дагы Илиястай курч кезим да. Мүнөзүм да ага окшош эле, айтканымдан кайтпаган, өз максатымды көздөй бет алган. Бирок ал жашоодо катуу жаңылышпадыбы. Эми мен деле тептегиз жол менен баратам дегенден алысмын, жаңылып-жазып, өкүнгөн күндөр менде да болгон. Ошентсе да мен анын ордунда болсом, Аселдин кетип калганын билген күнү артынан издеп таап, кечирим сурамакмын.

Жаш актёрдун ысымы кыргыз журтуна ушул ролунан кийин тез эле чагылгандай тараган. Москвадан окууну бүтүп келип, 1972-жылы Ош облустук драма театрына ишке кирген. 19 жылдан кийин борбордогу Кыргыз мамлекеттик академиялык драма театрына которулган. Кандай наам албасын жөнөкөйлүгүнөн, адамгерчилигинен жазбаган залкар аткарган ролдору тууралуу бизге берген акыркы маегинде күйүп-жанып төмөндөгүлөргө токтолгон:

– Ошто 18 жыл иштеп, 28 жашымда Эмгек сиңирген артист, 38 жашымда Эл артисти наамын алгам. Мага жол көрсөткөн устатым деп Кыргыз Эл артисти Абдашым Көбөгөновду айтам. Роль ойногондо берилип, чын дилим менен аткарчумун. Театрда калп ойносоң элге жетпей калат. Үйдөн репетиция кылганда уктоочу бөлмөдө аялымды өнөктөш кылып алып даярданар элем. Союз кезинде тартип катуу болуп, бут тосуулар жок болчу. Мен роль талашкан актёр эмесмин. Режиссёр ишенип берген ролду жан дилим менен аткарганга аракет кылам. Театр адамы болгонума эки дүйнөдө тең ыраазымын. Эч нерсеге өкүнбөйм, Союз таркап, артисттер ишсиз калганда да театрды таштап кетпедим.


Турганбү Бообекова, курсташы: «ДҮЙШӨН КУРСТАШ КЫЗДАРДЫН ТӨРКҮНҮ ЭЛЕ»


– Мен Дүйшөндү 1965-жылдан бери тааныйм. Ал №5 мектепте, мен №1 интернатта окуп жүрүп, Советбек Жумадылов, Абдашым Көбөгөнов сыяктуу залкарлар уюштурган ийримге барчубуз. Тажрыйбалуу актёрлор роль аткарышса, бизге окшогон жаштар массовка болот элек. Мектепти аяктаган соң Медициналык институтта окуп жатсам да чыгармачылыкты эңсеп жүрүп, Москвага
ГИТИСке окууга өтүп кеттим. Мен барчу окууга Дүйшөн да өтүптүр. Ошентип 24 студентти поезд менен Москвага алып кетишти.

Түнкүсүн кыздар почтада, ооруканада пол жуугуч болуп иштесек, Дүйшөндөр таңкы беште туруп, жааган кардын үстүнө кол менен туз себишет да, жарым сааттан кийин күрөп салышчу. Туз карды бат эритет экен. Иштеп, акча таап калганда батирге көчүп чыгып алдык. Батир болгондо кандай, жергиликтүү эл жашабаган, эскирип, түрттүрөбүз делинген үйлөрдө жашачубуз.

Дүйшөн өтө аракетчил, жакшы окуган студент, курстун куратору, СССРдин Эл артисти Иосиф Раевскийдин сүймөнчүгү болчу. Ал актёрлук чеберчилик деген сабактан дайыма «5» алчу. Найза, кылыч өңдүү куралдар менен чабышуудан, үн коюу, сахнада сүйлөө чеберчилиги сыяктуу сабактарда анын алдына эч ким чыкчу эмес. Окууну такыр калтырбай, мыкты жетишкендиктер менен бүтүрдү. Табиятынан аябагандай ак көңүл, таза, чынчыл, тааныштарына ашынган күйүмдүү жан эле. Жалгыз өзү биздин курстун кыздарына төркүндүн милдетин аткарып койчу. Аны көзү өткөндөн бери эстеп ыйлап отурабыз. Бизге кылган мамилесин, аракетин, күйгөнүн эч бир жигит аткара алчу эмес. Бирөөбүздө бир маселе болсо, жамандык болуп кетсе, кыскасы, кыйчалыштаган иштин баарына тикесинен тик туруп, өзү жайгарчу. Келиндеринин баарын «Ак Мөөрүм» деп чакырчу экен. «Бизди эми ким Ак Мөөр деп чакырат?» деп ыйлап жатышат.

Мындай адамдар эмоционалдуу, сезимге жакын, сүйгүч да келишет. Бирок сезим жагынан да бирөө-жарымды ыйлатып, капа кылып, кордоп, пайдаланып же жамандап артынан сөз кылчу эмес. Өзү жем болсо жем болуп кала берет эле. Ушунча жыл жашап, бир да жолу байбичесине катуу айтпаптыр. Байбичеси «жок дегенде бир жолу урушуп койбойт беле, көңүлүмдү оорутуп койбойт беле» деп ыйлап отурат. Үй-бүлөгө жанда жок камкор адам болчу. 2 уулу, бир кызы бар эле, улуу баласы ооруп каза болгон. Жумшактыгын карабайсыңбы, ошол уулунун күйүтүнөн инсульт болуп калды. Бул сапар инфаркт болуп, кете берди. Ошол күнү жакын жолдошунун келинчегин акыркы сапарга узатышмак экен. Кийинип чыгып, 1-2 тепкич түшкөндө эле жүрөгү токтоп калыптыр.

Дүйшөн акыркы учурга чейин эле театрда иштеп жатты. Жубайы Кенжеге орден бериш керек. Баласы машина менен жеткирип келет да, Кенже ооруганын билгизбей жумушка жетелеп келип, жанында жүрүп, жумуштан бүткөндө жетелеп кетчү.


Чоро Думанаев, кесиптеши: «МЕН ДЕМДЕГЕН ЧАЙДЫ ЖАКТЫРЧУ ЭМЕС»

– Өлүм менен ооруга айла жок турбайбы. Жанымда жүргөндөй сезилип, өз колум менен топурак салып көмсөм да ишене албай жатам. Кесиптеш деген бир туугандай болуп калат экен. Чындап келсек, бир туугандар менен да күндө көрүшпөйбүз да. Ооруса да келип, окуу жайда студенттерге сабак берип, театрда да ролдорун ойноп берчү. Мен, Марат Алышпаев, Дүйшекем, анан Арнис Кыдырмышев театрда бир кабинетте отурчубуз. Анан ого бетер жакынбыз да. Марат Ошто иштеп жүргөндө чай демдегенди укмуш үйрөнгөн экен. Ал чай демдейт, отуруп алып өткөн-кеткенди эстеп, бакылдашып чер жазчубуз. Марат жокто мен демдесем Дүйшөке жактырбай «Чорого демдетпегиле, эски чаманын үстүнө эле кайнак суу куюп, сары суу бере берет экен» деп калчу.

Дүйшөкем адамгерчилиги менен адамдардын баарын тартып алчу. Күйүмдүүлүгү, боорукердиги да ченде жок эле. Караколдо Шаршен деген актёр байке бар, бир жолу тиши бошоп калганын Дүйшөнгө келип айтса, ага тиш салдырып бериптир. Айылдаштары бир тойдо чогулуп отуруп, өзүнүн тамы турган көчөнү «Дүйшөнбек Байдөбөтов атындагы көчө кылалы» дешкен экен. Антсе актёр «койгула, менин көзүм тирүү, кереги жок» деп болбой коюптур.


Данияр Байдөбөтов, уулу: «КАНТ ДИАБЕТИ МЕНЕН ООРУП КЕЛГЕН»

– Улуу агам каза болгондон кийин атам инсульт алып, бул оору менен үч жыл алышты. Негизи буга чейин кант диабети менен ооруп келген. Атамды он күн мурун ооруканадан чыгардык. Дарыгерлер жүрөгү, бөйрөгү ооруп жатканын айтышты. 7-июль күнү көзү өткөн туугандардыкына бармакпыз. Эртең менен тамагын берип, дарысын ичирип, кийинтип алып сыртка чыктык. Бир тепкич ылдый болгондон кийин эле буттары калчылдап, баса албай калды да, «балам, артка кайталы, барбай эле коёлучу»деген боюнча кете берди.

Атам ооруп жүргөн учурда да иштеп жүрдү. Тынган жок. Дайыма эрте туруп жумушуна жөнөп калчу. Бирок акыркы жылдары эл менен көп аралаша албай, буттары ооруп, башы айланып, унаасын айдай албай калган. Эң негизгиси, атам төшөктө жатпай басып жүрүп, анан дагы менин колумда көз жумду. Атам дүйнөдөгү мыкты ата. Ал бир мүнөз адам болчу. Кандай гана адам болбосун бирдей мамиле кылчу. Дүнүйө деп жашаган жок. Болгону маңдай тери менен гана эмгек кылчу. Ал бизди да ошондой адал эмгекке үйрөттү.


Максат Өкөшов, иниси: КӨЗҮМ ӨТҮП КЕТСЕ ТУУГАНДАРЫМДЫН ЖАНЫНА КОЙГУЛА ДЕГЕН»

– Мен бир тууган агасынын баласымын. Атасынын аты Өкөш да, мени чоң Өкөш деп, «атамдын ордуна карманарым, ишенгеним» деп дайыма мени менен акылдашып турчу. Биздин атабыз мен сегизге чыкканда каза болуп, Дүйшөн байкемди ата, жеңебизди апа деп калганбыз. Атам бирөөнө да катуу сөз айтчу эмес. Жаман айтып жатса да «кой, унчукпа, мейли» деп турчу. Атамдыкындай мүнөз бир туугандардын арасында да, керек болсо мен тааныган адамдарда да жок.

Жыл сайын кесиптештери менен шерине жешчү. Театр эс алууга чыгарда биздикине барып конок болушуп, суунун жээгинде отуруп, анан тарап кетишчү. Быйыл гана шартка жараша чогула албай калышты. Атам аябай куудул киши болчу. Жылына 2 жолу тай союп, туугандар 25 түтүн шерине жейбиз. Чогулганда атамдын оозун эле карап отурчубуз. Келиндерди, күйөө балдарды бөлөк деп бөлчү эмес. Мындан 3-4 жыл мурун болсо керек, ооруй элегинде «кийин көзүм өтүп кетсе туугандарымдын арасына айылга эле койгула» деген. Ошол керээзин аткарып туугандар өзү туулуп-өскөн айылга жерге бердик.


"Мен Тянь-Шань" тасмасында кинодогу уулу Самат менен.
Актёр "Курманжан датка" тасмасында манасчынын ролун ойногон.
Актёр жубайы Кенже эже менен классташ болгон.


Сүйүн Кулматова
star@super.kg


69 жашында каза болгон актёр Дүйшөн Байдөбөтовдун сөөгү жерге берилди

Автор: Илим Туратбек уулу
Оператор: Руслан Алыбаев

"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(15)
Super TV
10.07.2018. 03:10 
Тайпасы:
Жаран
Комментарийлердин саны:
21
Катталган:
02-06-2016
Соӊку аракети:
11-11-2018 01:09
Жынысы:
Белгисиз
0
Жаткан жери жайлуу болсун
17.07.2018. 09:15 
Тайпасы:
Жаран
Комментарийлердин саны:
331
Катталган:
01-02-2017
Соӊку аракети:
13-11-2018 11:42
Жынысы:
Белгисиз
+7
Жайы жаннаттан болсун. Залкар инсан эле аттиң....
17.07.2018. 10:19 
Тайпасы:
Жаран
Комментарийлердин саны:
18
Катталган:
18-09-2017
Соӊку аракети:
10-11-2018 22:53
Жынысы:
Белгисиз
Калаасы:
♡Love♡
+11
"Жакшы" деген бир ат бар кууса жеткис...
Кыргыз дагы бир мыкты уулунан ажырады. Окунучтуу. Жайы жаннаттан болсун.

17.07.2018. 11:20 
Тайпасы:
Жаран
Комментарийлердин саны:
1136
Катталган:
07-11-2016
Соӊку аракети:
01-11-2018 09:51
Жынысы:
Белгисиз
Калаасы:
Бишкек
+35
Кечке Анжелика ,Самарадан интервью бошобой,сиздин жакшы создорунузду укпай калдык.Бейишиниз болсун залкар инсан элениз.
17.07.2018. 12:39 
Тайпасы:
Жаран
Комментарийлердин саны:
314
Катталган:
31-05-2017
Соӊку аракети:
12-11-2018 17:37
Жынысы:
Белгисиз
+9
meni_kut,Айчурок да бар,
17.07.2018. 14:04 
Тайпасы:
Жаран
Комментарийлердин саны:
1136
Катталган:
07-11-2016
Соӊку аракети:
01-11-2018 09:51
Жынысы:
Белгисиз
Калаасы:
Бишкек
+8
Кимиси болсо да
17.07.2018. 13:37 
Тайпасы:
Жаран
Комментарийлердин саны:
1
Катталган:
12-05-2018
Соӊку аракети:
12-11-2018 18:46
Жынысы:
Белгисиз
+5
жаткан жери жайлуу, ыйманы саламат болсун!
17.07.2018. 18:29 
Тайпасы:
Жаран
Комментарийлердин саны:
2
Катталган:
31-01-2018
Соӊку аракети:
13-11-2018 09:11
Жынысы:
Белгисиз
+7
Эх, бири кем дуйно деген ушу экен да. Мага озгочо уну жакчу. Кулакка жагымдуу эле. Дагы 10жыл жашай турса болмок. Аттин жараткан да Жакшы адамдарды алат тура
17.07.2018. 21:55 
Тайпасы:
Жаран
Комментарийлердин саны:
209
Катталган:
19-04-2011
Соӊку аракети:
03-11-2018 22:27
Жынысы:
Белгисиз
+5
Акыркы интервьюсунда «кемпириме ыраазымын»-деп кемпирин ыйлатты эле....
18.07.2018. 00:12 
Тайпасы:
Жаран
Комментарийлердин саны:
27
Катталган:
10-06-2015
Соӊку аракети:
13-11-2018 08:14
Жынысы:
Белгисиз
+4
Кыргыз жузун дуйного тааныткан актерлордун бири эле.... Жаны жаннатта болуп, жаткан жери жайлуу болсун. Укканымда кадимкидей козумо жаш тегеренди...
18.07.2018. 11:15 
Тайпасы:
Жаран
Комментарийлердин саны:
Катталган:
14-04-2016
Соӊку аракети:
11-10-2018 22:31
Жынысы:
Белгисиз
Калаасы:
Түп айылы
+5
Мурда союз маалында Түпкө гастролдоп келишип, арак ичпей койгондо түптүктөр "ой кинодо жакшы эле ичесиң го" деп тамашаласа "ой анын баары арак болсо аракеч болуп кетпейбизби!" деген экен.
Super TV
19.07.2018. 03:11 
Тайпасы:
Жаран
Комментарийлердин саны:
52
Катталган:
22-07-2016
Соӊку аракети:
11-11-2018 05:45
Жынысы:
Белгисиз
0
Jatkan jeri jailuu bolup Allahym beyishten orun bersin. Omiin.
22.07.2018. 16:52 
Тайпасы:
Жаран
Комментарийлердин саны:
16
Катталган:
20-09-2012
Соӊку аракети:
12-11-2018 09:56
Жынысы:
Белгисиз
Калаасы:
Ак Монгулуу Ала Тоо
+1
Жаткан Жери жайлуу ,арты кайырлуу Болсун!!!
besha түзөттү 2018-07-22 16:53:17
23.07.2018. 09:15 
Тайпасы:
Супермодератор
Комментарийлердин саны:
2107
Катталган:
22-02-2011
Соӊку аракети:
13-11-2018 12:07
Жынысы:
Белгисиз
Калаасы:
...
-2
surgeon777, Гезиттин ЖАЛПЫ ИШМЕРДҮҮЛҮГҮНӨ байланыштуу сын-пикирлер же сунуштар болсо gazeta@super.kg электрондук дарегине жазылып жөнөтүлүшү керек.
23.07.2018. 14:31 
Тайпасы:
Супермодератор
Комментарийлердин саны:
2107
Катталган:
22-02-2011
Соӊку аракети:
13-11-2018 12:07
Жынысы:
Белгисиз
Калаасы:
...
-1
surgeon777,эскертүү бергенге карабастан кайрадан эреже бузгандыгыңыз үчүн 3 күнгө БАН!
1
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21442;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: