КСДПнын ДЕПУТАТЫ АЙЫЛДАШЫН БЫЧАКТАДЫ ДЕП ИЗДЕЛҮҮДӨ

Токмок шаардык кеңешинин депутаты Тынай Жансейитов айылдашы Талантбек Жамангуловго бычак сайган деп айыпталууда. Депутаттын кайда экендиги азырынча белгисиз, аны милиция кызматкерлери издеп жатышат. Ал эми жабырлануучу Токмок шаардык ооруканасында дарыланууда.

«АРЫЗ ЖАЗБАЙМ. АНТКЕНИ ШААРДЫК МИЛИЦИЯНЫН БАШЧЫСЫНА ИШЕНБЕЙМ»

Окуя боюнча жабырлануучу Талантбек Жамангулов төмөнкүлөрдү айтып берди:

- Тынай Жансейитов экөөбүз тең Чүй районунун Мээнеткеч айылынанбыз. Бирок ортобузда аласа-бересебиз же талашыбыз жок. Анын тууган-туушканы, бир туугандары Токмокту ээлеп алган. Туугандары Токмокто жакшы кызматтарда иштешет. Бакыт Жетигенов Жогорку Кеңешке депутат болуп баргандан баштап булар элди коркутуп-үркүтүп, ачык эле үстөмдүк кыла башташты. Мен буга чейин Токмокто салык кызматында иштегем. Ал жактан да мени жумуштан кетиришкен.

26-август күнү эртең менен байкем экөөбүз кой алалы деп мал базарга барганбыз. Базарда жүргөндө Тынай келип себепсиз эле мени бычактап салды. Милицияга арыз жазган жокмун. Анткени Токмок ШИИБинин башчысына такыр ишенбейм. Анын дагы аларга тууганчылыгы бар, бири-бирине жээн-таяке экен. Мага бычак сайып жатканын 20-30 киши көрдү. Эки күбө милицияга көргөндөрүн жазып берсе, эми аларга, туугандарына барып үстөмдүк кылып жатышат.

«ЖАМАНГУЛОВ «БЕСПРЕДЕЛЬЩИК»

Тынай Жансейитов менен байланышуу мүмкүн болгон жок. Аны милиция кызматкерлери да таппай жатышат. Ал эми Токмок шаардык кеңешинин КСДП фракциясынын лидери Максат Жоошбеков буларды айтты:

- Мен иш сапар менен Жалал-Абад облусунда жүрөм. Бул окуяны интернеттен окудум. Жансейитов туура жолдо жүргөн адам, бул окуя эмнеден улам болуп кеткенин түшүнө албай жатам. Телефону өчүк болгондуктан аны менен байланыша алган жокмун.

Ал эми Жамангулов тууралуу айта турган болсом, ал "беспредельщик". Былтыр президенттик шайлоо убагында Тынай Жансейитовдун үйүнө барып "чык эшикке" деп аны коркутканын уккам. Жамангулов президенттик шайлоодо Өмүрбек Бабановго, Жамансейитов Сооронбай Жээнбековго иштеген.

«ЖАБЫРЛАНУУЧУ АРЫЗ ЖАЗУУДАН БАШ ТАРТЫП ЖАТАТ»

Чүй ОИИББинин басма сөз катчысы Назира Имангазиеванын билдиришинче бычакталган жаран милицияга арыз жазып, көрсөтмө берүүдөн баш тартып жатат. Бул арада жабырлануучу Талантбек Жамангуловдун кылмыштуу топтун мүчөсү экендиги тууралуу да маалымат тарады:

- 26-август күнү Чүй РИИБинин нөөмөт бөлүмүнө ооруканадан аларга бычактан алган жаракаты менен адам түшкөнү тууралуу билдирүү түшкөн. Алгачкы иликтөө иштеринин жыйынтыгында, Токмок шаарындагы мал базардан 36 жаштагы жаран Чүй районунун тургунуна бычак сайганы маалым болгон. Жабырлануучу ооруканага жеткирилген, ал айыпталуучуга карата арыз жазып, көрсөтмө берүүдөн баш тартып жатат.

Анын маалымат каражаттарына берген көрсөтмөлөрүнүн негизинде тергөө амалдары жүрүүдө. Бул факт боюнча Чүй РИИБинин тергөө кызматы тарабынан Кылмыш-жаза кодексинин 28-97-беренеси (адам өлтүрүүгө аракет жасоо) менен кылмыш иши козголду. Учурда тийиштүү соттук-медициналык экспертизалар дайындалып, тергөө амалдары жүрүп жатат. Шектүүнүн үйүнө тинтүү жүргүзүлдү. Сот аны камакка алуу тууралуу сыртынан өкүм чыгарып, кылмышка шектүү изделүүдө. Ал эми жабырлануучу кылмыштуу топтун мүчөсү деген маалымат боюнча да иликтөө жүрүп жатат.

Перизат Музуратбекова
koom@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Комментарийлер (2)

Izdei_-_berem

2018-09-04 10:55:13

Баш каттыго,кимисине ишенесин?Бироосу чёрный,бироосу депутат....

Bolotbek1991

2018-09-04 18:05:27

Туура ар кимиси эле актанат тушунуп болбойт ал эми табылбай жатканы жалган ал уйундолего деп ойлойм чайын ичип олтуратта интернеттен озун окуп коюп

Комментарий калтыруу үчүн өз ысымыңыз менен кириңиз же каттоодон өтүңүз.

№ 826, 31-август-6-сентябрь, 2018-жыл