БИШКЕК ЖЭБине ДАГЫ 24 МИЛЛИОН СОМГО ВИДЕОКАМЕРАЛАР САТЫП АЛЫНАТ

"Электр станциялары” ишканасы Бишкек жылуулук электр борборуна 24 миллион 640 миң сомго видеокамераларды сатып алганы жатат. Тийиштүү жарыя Мамлекеттик сатып алуулар порталына илинди.

ЖЭБди 386 миллион долларга жаңылоо алкагында станцияга 123 даана видеокамера орнотулган. Жогорку Кеңештин депутаты Акылбек Жамангулов кадимки баасы 5-6 миң сом турган видеокамералардын ар биринин баасы ЖЭБди жаңылоодогу документтерде 14,5 миң доллар деп көрсөтүлгөнүн айтып чыккан. Ал эми Улуттук энергетикалык холдинг компаниясы камералардын ар бири 300 доллардан сатып алынганын, аларды орнотууга 1 миллион доллардан ашык акча кеткенин билдирген.

“Электр станциялары” ЖЭБ кошумча видеокамераларга муктаж дейт. "Бишкек ЖЭБиндеги авариядан кийин түзүлгөн комиссия аталган борбордун бардык жагына видеокөзөмөл орнотулушу керек деген жыйынтык чыгарышкан. Буга чейин да камералар сатып алынып, алар Бишкек ЖЭБиндеги жаңы курулган блокко коюлган. Эски блоктордо башынан эле видеокөзөмөл болгон эмес. Азыр ЖЭБдин бардык тарабына видеобайкоо коюлуп, алар бир экрандан көрүнүп тургандай болуп жасалат”,- дейт ишкана. 24 миллион 640 миң долларга жалпы 210 видеокамера сатып алынары айтылды. Ошондо 1 видеокамераны сатып алып орнотуу иши 117 миң сомдон айланууда.

Автандил Добулбеков
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 826, 31-август-6-сентябрь, 2018-жыл