“КЫРГЫЗ ТЕМИР ЖОЛУ” ИШКАНАСЫНЫН КЫЗМАТКЕРИ КУУГУНТУК КӨРҮП ЖАТКАНЫН АЙТАТ

Мамлекеттик “Кыргыз темир жолу” ишканасынын Алия Асанбаева аттуу кызматкери өзү иштеген мекемедеги коррупцияны коомчулукка жарыялаганы үчүн кысымга кабылганын айтып чыкты. Ал президент Сооронбай Жээнбековго кайрылып, колдоо сурады. Асанбаева “Кыргыз темир жолунун” жетекчилиги жарандардан пара алып, аларды поездге билети жок эле отургузуп жүргөнүн айтат. “Төрт айда эле 2 миңден ашык адам билети жок кетти. Мындан мамлекет 3 миллион сомго жакын зыян тартты. Буга каршы чыксаң коркутууга өтүшөт, көп кызматкерлер жумуштан айрылып калбайлы деп унчугушпайт”,- дейт кызматкер.

“Кыргыз темир жолунун” жетекчиси Алмазбек Ногойбаевдин дарегине жарым жылдан бери сын айтылып келе жатат. Жогорку Кеңештин трибунасында да “Кыргыз темир жолунда” коррупция гүлдөп кетти деген сөздөр айтылып, өкмөткө ишкана жетекчилигине чара көрүүгө чакырыктар айтылып келет. Депутат Жанар Акаев бул ишкананын жетекчиси кызына “Кыргыз темир жолуна” караштуу жер тилкесине мейманкана ачып бергенин, ал эми поездге билеттерди Ногойбаевге караштуу компаниялар гана сатып жатканын жар салган. “Кыргыз темир жолунун” жетекчисин иштен алайын десе, парламенттеги фракциялардын биринин лидери калкалап жатканын мага премьер өзү айтты”,- дейт депутат. Өкмөт башчы фракция башчыларынын маанайына карап иш кылуусу керекпи же мамлекеттик кызыкчылыкка караппы? Бул суроо өкмөт башчыга берилиши керек.

Жогорудагы кызматкердин айткандары боюнча 24-августта Транспорт жана жолдор министрлиги тарабынан комиссия түзүлүп, айтылган маалыматтар иликтене турган болду.

Автандил Добулбеков
politika@super.kg

"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Талкуу жабык.

№ 826, 31-август-6-сентябрь, 2018-жыл