Архив
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар
Akbuura gazeta

«ФОРМАЧАНДАРДЫН» КАДЫРЫН БИЛГЕНДЕЙ БОЛДУМ

№228 16-22-март, 2007-ж.


«Супер-Инфонун» кабарчысы бир күнүн милициянын участкалык инспектору менен өткөрдү.

Көчөдөн «кызыл шапкечен» кызматкерди көргөндө көпчүлүгүбүздө жагымсыз реакция пайда болот. Бир даарыбыз аларды байкамаксанга салып өтүүгө аракет кылабыз. Чындыгында жалпыбыздын аң-сезимибизге сиңип калгандай, участкалык милиционер элдин үрөйүн учура кооптондурган, жөн шылтоо менен коркутуп-үркүткөн адам эмес, жарандардын укугун коргоп, бейпилдигин сактоочу кызматкер болуусу шарт. Биз ушинтип кадырлабай жүргөн участкалык милиционерлердин бир эле күнүнө күбө болуп, алардын түйшүгү оор же жеңил болсо, анда аны өз терибиз менен сезип, эгер көпчүлүк айтып жүргөндөй акча иштеп тапмай болсо, ага да күбө болуу максатында алгач Свердлов райондук ИИБ башчысынын коомдук тартипти сактоо боюнча орун басары подполковник Мелис Абдрахмановго кайрылдык.

«ЖУМУШ УШУНДАЙ...»

Калктын негизги көмөкчүсүнүн жумушу таң­кы саат сегиз жарымда шаардык милиция бөлүмдөрүнүн (ГОМ) аянтчасына чогулуудан башталат. Эртең менен чогулган кызматкерлер күндүн иш тартиби менен таанышып, өздөрүнө бекитилген тапанчаларын алып ишке киришет.
Мени Мелис Токтомушевич №22-ГОМдун участкалык милиционери Тойчиев Жылкычыга кошуп берди.
Участкалык милиционерлер ар бир күнү өзүнө бекитилген аймакты кыдырып, ал жердин тургундары, үй башкармалыктын жетекчилери (орусча сүй­лөп көнгөн элибизге домкомдор десек түшүнүктүү болоор) менен жолугушуп, баш ооруткан маселелеринен, сутка ичинде болгон окуялардан кабардар болушат экен.
Ошентип, мен Жылкычы Тойчиевге кошулуп, анын аймагына караштуу «Комфорт» соода борборунун айланасындагы үйлөрдүн бирине бардык. Подъезддин кире беришинде бизди көргөн «домком» күлүп-жайнап келип учурашып, ал-жай сурап, үйүнө чакырып калды. Сыягы, экөө кызматтан улам жакшы тааныш, жакшы мамиледе көрүнөт.
– Сенин келип учурашып, байланышып тур­га­ның жакшы бизге. Денсоолук, иштериң кандай?
– Силерде баары жакшы болсо, бизде да баары жайында болот. Ошон үчүн келдик.
Мындай жылуу мамиле шеригиме түгүл мага да жага түштү.
– Өзүңөр кандайсыздар? Эмне маселе, эмне көйгөй?
– Кудайга шүгүр, баягыдай бейбаштар жок. Ызылдап музыканы бакыртып, подъезддин алдында чатакташмай азайып калды. Баягы эки күндүн биринде ичип келип үйбүлөсүн чуу түшүрүп сабап, мушташа берээр Темир да тынчып, адам боло баштады. Көргөн сайын учурашып калат.
Экөө кызуу кепке киришти. Бул үйдүн тургундары батирде тургандар, ал эле эмес үйдө жашаган чет жердиктер жөнүндө да сүйлөшүп жатышты. Таңкалыштуусу, участкалык милиционер үйдүн ар бир жашоочусу түгүл аларга тез-тез келип туруучулардан бери билет экен. Менин таңкалганымды байкап: «Эмне кыл дейсиз, жумуш ушундай» деп күлүп койду.

«КООПТУУ АЙМАКТА» КЫЛМЫШ КӨП

– Бүгүн чынында бул жакка келмек эмесмин, ырас, биздин жумуш менен таанышуу үчүн келсеңиз, бул жактарды да көрө кетиңиз. Ал жакты биздин райондун «кооптуу аймагы» деп атайбыз.
«Комфорттун» аймагындагы үйлөрдөн чыккан соң шеригим мени түз эле темир жолду көздөй ээрчитип жөнөдү. Линейная көчөсү менен темир жол кесилишкен жерге келдик.
– Бул жердин алдынан узун өткөөл өтөт. Өткөөлдө жылуулук берүүчү линия жайгашкан. Аны “катакомба” десе болчудай. Бери келсеңиз, бомждор мындай люктардын ичин кадимки үйгө айландырып жашап алышат,– менин «экскурсоводум» люктарды көрсөтүп кирди. – Кышында бомж аттуунун көбү ушундай жерлерге баш калкалап киришет. Көпчүлүгү жыл бою деле жашай беришет. Ичи ысык, тоңуп калат экенмин деп коркушпайт.
Анчалык ишенбей люктардын бирине башымды салып көрдүм. Ичи чын эле кенен, ары көздөй уланып кетет экен. Буюм-тайымдар да тургансыйт.
– Мындай жылуу-жумшак жерлерди талашып, далай жолу кырылышат. Жоош, момундарын алдуу-күчтүүлөрү кубалап чыгып ээлеп алышат. Түшүп көрүп чыгалыбы?
Ырас, чыгынып келген соң мындай сунуштан баш тартуу катуу айтканда күнөө болоор эле.
Өткөөлгө кирген эле жерден башын шылкыйта жер тиктеп отурган кишиге көзүм түштү. Суроо менен кайрылсак, угаар түрү жок. Көңүлкош гана башын көтөрүп, кайра өзүнчө күбүрөнө отуруп алды. Көкүрөгүндө жашоого болгон кызыгуу деле калбаган өңдүү. Тереңдеп басып барып көрүүдөн пайда жок өңдө­нөт. Бир аз баса түшүп, кайра тарттык. Участкалык милиционер мындай өткөөлдүн жашоочулары жөнүндө айтып кирди.
– Үй-жайы жок, туш келген жерде түнөп, көпчүлүгү бү­лөм, жакыным дегенди унутушкан бул адамдар ичишет, уурулук кылышат, айтор, сиздерге оңбогондой түйшүк алып келишсе керек?
Менин суроомо инспектор катарынан кеткен люктардын жанында туруп алып, бомж­дордун жашоосу, кылык-жоруктары, көйгөй­лөрү жөнүн­дө көп нерселерди айтып жооп бере баштады.
– Ишибиздин жарымына жакыны эле ушул бомждор, алар жасап жаткан кылмыштар менен өтөт. Кыштын кычыраган суугунда далайы жол-белде тоңуп калышат. Алардын аты-жөнүн, бүлөсү менен жакындарынын бар-жогун тактап, моргго өткөзүп дегендей, далай түйшүктү баштан өткөрөбүз. Ал эми мынабул люктардан да далай баш ооруларга туш болобуз. Көбүнчөсү бомждордун сөөгүн табабыз. Арак, самогон деген балекеттерди ичишет да, жөнөкөй сөздөн улам мушташа кетишип, көпчүлүгү биринин өлүмү менен аяктайт. Анан өлүктү мындай элге байкалбаган люктарга таштап салып, өзүлөрү башка аймактарга өтө качышат. Биздин райондо эле эмес, бомждор бардык аймактарда кооптуу топ. Уурулук, тоноочулук, ал эле эмес, киши өлтүрүүлөр да алардын арасында өтө көп.
– Өзүңүздүн аймактын жашоочуларын жакшы тааныйт экенсиз, бомждорду да жатка билсеңиздер керек?
– Билишибиз шарт. Ар бирин каттап, жоголгонун да, жаңыдан биздин аймакта пайда болгонун да тактап турабыз. Кечээ балдар (кесиптештерин ушундай аташат) Сергей деген немени каттап жатышкан. Өзү Маевкадан экен. «Балдарымды тажатып бүттүм окшойт, көп ичип, ээ-жаа бербей кетчүмүн. Азыр эч кимисинин сүйлөшкүсү жок. Жарым жылдан бери көчөдө жүрөм» дейт. «Биз аты-жөнүңдү, дайыныңды каттадык, эми тынч жашагын» деп жөнөтүп жиберишти. Ушинтип тизмелерди толуктап тазалап турабыз.

ТӨӨ КӨРДҮҢБҮ ЖОК, БЭЭ КӨРДҮҢБҮ ЖОК

«Кооптуу аймактан» эми эле ШМБга (ГОМ) келсек, көз жашына ээ боло албай ыйлаган эже кирип келди. «Комфортко» линолеум алганы келген экен, жаш эле жигит сумкасын жула качыптыр. «Акчамдын баарын алып кетти» деп ыйлаган аялды арызын жаздырып отургузуп коюп, аты аталган базарга келдик. Менимче, болгон окуяны ошол жердеги соода кылгандардын баары эле көрүшсө керек. Бирок, биринин да күбө өткүсү жок. “Унчукпаган үйдөй балээден кутулуптур” болушуп, «билбейм, мындайды байкаган жокмун» дешет. Айрымдары бизден алыс кеткиче шашышты. Улам такып сурап жатып, бир-экөөнөн маалымат алдык. Күбө өтүп, көргөн билгенин жазып берүүнү эч бири каалабайт. Баары ыргылжың. Мейли, ар бир жарандын өзүнүн эрки, болгону, «кокус тиги жабыркаган аялдын ордунда өзүлөрү болуп калышса, көрүп туруп бир ооз айтып койгонго жарабады деп капа болушаар беле?!» деген ой кетти.

ТҮН БАКЫРДЫКЫ ЭМЕС, МАСТАРДЫКЫ

Шарт боюнча участкалык милиционерлер кечки саат сегиздерге чейин иштешет. Бирок, бул кагаз жүзүндө эле калуучу регламент. Чындыгында алардын накта жумушу, түй­шүгү кечке жуук, айрыкча түн жарымында баш­талат. «Комфорттун» айланасы менен жакшылап таанышкан соң эми жаңы конуштарга кезек келди. Свердлов районунун көлө­мү башка райондордон кем калышпаса да, кылмыштуулуктун көпт­ү­гү менен айырмаланат. Райондук ички иштер бөлүмүнө келип кызматкерлер менен маектешүүгө жетишкен жокпуз. Мени өзгөчө маанилүү экскурсияга алып чыккан Ж.Тойчиевге рахматымды айтып, күзөт бөлүмүнө Актилек жаңы конушунан шашылыш келип түшкөн чакырык боюнча жөнөгөн ыкчам иликтөөчү топко кошулдум.
Ошентип, кечке жуук Актилек аталган жаңы конушка бардык. Аталган даректеги үйгө кире бериште эки-үчөө турушуптур. Ичип алып короосунда ызы-чуу салганынан улам кошуналары да чыгып калышкан экен. Алардын арасында улгайып, саамайын бубак баскан эне менен карыя да бар экен. Бул үйдөгү окуянын чоо-жайын алгач ошолордон уктук.
Жакын досу Россиядан келип, аны менен кошо жоон топ теңтуштарын коноктоп, толкунданган Руслан (атын өзгөртүп бердик) аттуу 26дагы жигит аракка болушунча тоюп алып чатак салыптыр. Бычак ала жүгүрүп, досторунун арачы түшкө­нүнө ээ бербей, көңүлүнө жакпай калган жигитти жыгып алып бычактап салыптыр. «Оң ийинин кесип кетиптир, ооруканага жөнөт­түк» дешип чогуу ичкендердин баары баштарын шылкыйтып отурушат. Чатак салган бала эки жылдан бери нашаа тартат экен.
Дале жакшы өзүнө келе албай, мастыгынанбы же кылган кылмышынан уламбы, өңү кубарган жигитти досторуна кошо бөлүмгө алып келишти.
Мындайда бир топ кагаз, документтерди толтуруу зарыл. Ушундай иштер менен алектенип жатып, бул бөлүмдүн кызматкерлери жакында эле ушул райондо болгон жагымсыз окуяны айтып киришти.
– Жашырганда эмне, бүгүнкү күндө баңгилер көп. Керектүү «дозаны» жерди чукуса да табышат. Мындан үч эле ай мурун бир кылмыштын бетин ачтык. Каза тапкан киши коомчулукка белгилүү эле спортчу. Жубайы экөө тууганынын үйлөнүү тоюна барышып, кызганычтан таарынышып кетишкен экен. Күйөөсү: «Көзүмө чөп салчу болсоң өлтүрүп салам» деп кыжыныптыр. Аялы болсо: «Андайга сенин духуң жетпейт! Меники жетет...» деп бечараны бырчалай бычактап салыптыр. Анын аялы да алты жылдан бери героин сайынып жүрүптүр.
Бул өңдүү окуялар коомубузга көнүмүш көрүнүш болуп кетпесин үчүн күрөшү­шү­бүз керек. Айрыкча жаш муунга жакшы түшүн­дү­рүү зарыл.
Кагазы менен алектенип жатып, өзүнчө сүй­лөп жаткан кызматкердин кебине кошула баш ийкеп жаттым.

ИШЕНИМ ТЕЛЕФОНУ

– Көпчүлүк жарандар күбө болгон окуяларды айтуудан коркушуп, биздин жумушту татаалдаштырышат. Дагы далайы коркутуп акча алып, салык салгандардан жабыр тартышса да айтпай жүрө беришет. Учурдан пайдаланып, бизде ишеним телефону иштээрин айта кетейин,- дейт подполковник М. Абдрахманов мени менен коштошуп жатып. – Урматтуу, жарандар, чалыңыздар, жашырбаңыздар, чочулабаңыздар, аты-жөнүңүздөр жашыруун сакталат. Номерибиз; 28-42-96, 28-26-98.
Болгону бир гана күн бул кызматкерлердин жанында жүрүп суй жыгылгыдай болдум. «Эртең тура алаар бекем?» деп коём ичимден. Мындай жыргалынан кууралы көп кесип ээлерине бир жолу эмес, ийилип кат-катынан рахмат айтсак деле жарашчудай. Ушинтип бут тарта албай калгыча түн бир оокумга чейин иштешсе да, эртеси таң заарынан жумушта болуп калуулары шарт эмеспи.

Айбек Нурадилов


"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  0 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
21193;
 
Маалымат-маанайшат порталы
2006-2018 © SUPER.KG
Кыргыз Республикасы, Бишкек шаары,
Күрөӊкеев көчөсү - 180
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: