ТОЙ ДАСТОРКОНУНА ТОЮМДУУ САЛАТТАР

“БАКЧА” САЛАТЫ 6 ПРОЦИЯ

Керектелүүчү азыктар:

Баклажан – 3 даана

Помидор – 3 даана

Болгар калемпири – 2 даана

Пияз – 1 баш

Зайтун майы – 3 аш кашык

Сарымсак – 1 тишче

Лимон ширеси – 1-2 аш кашык

Өсүмдүк майы – 200 миллилитр

Петрушка – 2-3 тал

Татымына жараша туз

Даярдоо ыкмасы:

1. Жашылчалардын баарын жууп тазалап алабыз.

2. Баклажанды жууп, калыңдыгын 7-8 миллиметрден кылып тегерек формада кесип алабыз. Үстүнө туздан себелеп, 15 мүнөттөй тыныктырып коёбуз. Аны эки бетин кызартып майга кууруп алып, майын сарыктырыш үчүн кагаз майлыктын бетине тизип коёбуз.

3. Помидор менен пиязды жарым тегерек, болгар калемпирин ичке, узун-узун туурайбыз.

4. 2 аш кашык зайтун майына лимон ширесин, туз, кумшекер, мурчту, майда тууралган сарымсакты кошуп аралаштырып соус даярдайбыз.

5. Чоң идишке куурулган баклажанды, тууралган жашылчалардын баарын салып, үстүнө соусту куюп аралаштырабыз. Салатты петрушка менен кооздоп коёбуз.

ТООК ЭТИНЕН САЛАТ 6 ПРОЦИЯ

Керектелүүчү азыктар:

Тоок эти – 400 грамм

Бадыраң – 2 даана

Жумуртка – 1 даана

Сүт – 3 аш кашык

Соя соусу – 2 аш кашык

Зайтун майы – 2 аш кашык

Күнжүт уругу – 2 аш кашык

Татымына жараша туз, мурч

Даярдоо ыкмасы:

1. Тоок этин сууга бышырып, муздатып, кол менен тарамдары боюнча ажыратабыз.

2. Бадыраңды жууп, жарым тегерек формада туурайбыз.

3. Жумурткага сүттү, татымына жараша туз кошуп жакшылап аралаштырабыз да, андан куймак бышырабыз. Куймакты узун-узун кылып туурайбыз.

4. Күнжүттү көмөч казанга кызартып кууруп алабыз.

5. Тоок этине бадыраңды, майды, соя соусун кошуп аралаштырабыз. Салат даяр. Тарелкаларга салып, үстүн куймактын кесимдери менен кооздап, күнжүттөн себелейбиз.

“КОКТЕЙЛЬ” САЛАТЫ 6 ПРОЦИЯ

Керектелүүчү азыктар:

Уй же тоок эти – 300 грамм

Грек жаңгагы (маңызы) – 100 грамм

Жумуртка – 2 даана

Алма – 3 даана

Сыр – 100 грамм

Зайтун мөмөсү – 80 грамм

Майонез – 100 грамм

Даярдоо ыкмасы:

1. Этти сууга бышырып алып, таякча түрүндө, ал эми сууга бышырылган жумуртканы төрт бурчтук түрүндө туурайбыз.

2. Алма таякча түрүндө, зайтун мөмөсү тегерек формада тууралат.

3. Сырды сүргүчтөн өткөрөбүз.

4. Азыктарды ирети менен бокалга тизип салып, үстүнө 1 аш кашык майонезди салып, сырдан себелеп, салаттын бетин кооздоп, дасторконго коёбуз.

ИТАЛИЯ САЛАТЫ 6 ПРОЦИЯ

Керектелүүчү азыктар:

Жүгөрү (консерваланган) – 340 грамм

Козу карын (маринаддалган) – 300 грамм

Бадыраң – 6 даана

Колбаса (ветчина) – 340 грамм

Көк пияз – 60 грамм

Майонез же каймак – 200 грамм

Татымына жараша туз

Даярдоо ыкмасы:

1. Колбаса менен бадыраң таякча түрүндө тууралат.

2. Козу карынды ичке, көк пиязды майда туурайбыз.

3. Жүгөрүнүн суусун төгүп, жашылчаларга кошобуз.

4. Эми салатка майонезди же каймакты кошуп аралаштырабыз. Салатыбыз даяр.

Дамира Арстанова
kenesh@super.kg