АЛМУРУТ МААНАЙДЫ КӨТӨРӨТ

Окумуштуулардын изилдөөсүнө таянсак, алмурут жүрөктүн иштешине оң таасир берүүчү жана кан басымдын туруктуулугун камсыздоочу пайдалуу мөмө. Күздүн мөмөсү болгон алмуруттун пайдасы, андан жасалган рецепттер төмөнкү макалада.

АЛМУРУТ КОМПОТУ

Керектелүүчү азыктар:

(3 литрлик банка үчүн)

Алмурут – 7-10 даана

Кумшекер – 200-250 грамм

Суу – 2800 миллилитр

Даярдоо ыкмасы:

1. Алмурутту жууп, тең ортосунан бөлүп, данектерин тазалап, сабагын кесип салабыз.

2. Бууланган банкага алмурутту салабыз. Табитиңизге жараша бул компотко жалбыз жалбырагын, лимон, апельсин кесимдерин кошсоңуз да болот.

3. Банкага кайнап жаткан суудан толтура куюп, капкагын жаап, 7-10 мүнөткө тыныктырып коёбуз.

4. Эми банкадагы сууну мискейге куюп алып, кумшекерди салып кайнатабыз. Сууну кайнак боюнча банкага куюп, оозун капкак менен бекитип, көмкөрүп, жылуу ороп коёбуз.

АЛМУРУТ ДЕСЕРТИ

Керектелүүчү азыктар:

Каттама камыры – 500 грамм

Алмурут – 3 даана

Суу – 400 миллилитр

Кумшекер – 150 грамм

Лимон – 1 даана

Коюулатылган сүт – 100 грамм

Шоколад – 100 грамм

Жумуртка – 1 даана

Даярдоо ыкмасы:

1. Алмуруттун кабыгын аарчып, тигинен тең ортосунан бөлөбүз. Данектерин тазалап алып салабыз. Ал эми сабагын кооздук үчүн калтырып койсок да болот. Эми алмурутту желпилдеткич (веер) формасындай кылып аягына жеткирбей тилебиз.

2. Мискейге сууну жана лимон ширесин куюп, кумшекерди салып эритип сироп даярдайбыз. Бул сиропко алмурутту салып, 5-7 мүнөт кайнатып, чыгарып алабыз.

3. Каттама камырын 4 миллиметр калыңдыкта жайып, тегерек формада кесип алабыз. Камырдын диаметри алмуруттун узундугунан 2 сантиметрге узун болушу шарт.

4. Камырдын четине чийки жумуртканын сарысын сүйкөп, ал жерге арткан камырдан туурасын 1 сантиметр кылып узун кесиндилерди кесип тегерете чаптап чыгабыз. Эми камырдын ортосун вилка менен сайгылап, 220 градуста иштеп турган электр мешине 7-10 мүнөткө салабыз.

5. Токоч бир аз муздагандан кийин ортосуна коюулантылган сүттөн 1 аш кашык салып, үстүнө алмурутту жайып коёбуз. Токочтун бетине кайрадан жумуртканын сарысынан сүйкөп, электр мешинде кызартып бышырып алабыз. Десерт даяр! Десерттин бетине эритилген шоколаддан чуурутуп кооздоп коёбуз.

АЛМУРУТ КЫЯМЫ

Керектелүүчү азыктар:

(1 литрлик банка үчүн)

Алмурут – 1 килограмм

Кумшекер – 700 грамм

Апийим уругу (мак) – 1-2 чай кашык

Даярдоо ыкмасы:

1. Алмурутту жууп, тазалап, 1 сантиметр өлчөмүндө төрт бурчтук формада туурайбыз. Мискейге салып, үстүнө макты жана кумшекерди себелеп, 7-8 саатка, ширеси бөлүнүп чыкканча коё турабыз.

2. Кыямды жай отто 10 мүнөт кайнатабыз. Бөлүнүп чыккан көбүктөрүн алып салабыз. Кыям муздагандан кийин дагы 5 мүнөт кайнатып, бууланган банкаларга куюп оозун темир капкак менен бекитип коёбуз.

АЛМУРУТТУН ПАЙДАСЫ

• Аз калориялуу (100 граммында орточо эсеп менен 57 калорий бар), курамында фруктоза, сахароза, глюкоза бар. Булардын ичинен фруктозанын өлчөмү көбүрөөк. Андыктан кант диабети менен жабыркагандарга жана салмак таштоо үчүн диета кармагандарга пайдалуу.
• Курамында аллергендер дээрлик жокко эсе.
• Иммунитетти бекемдеп, организмдеги ар кандай инфекцияларга каршы тура алат жана стресстин алдын алып, маанайды көтөрөт.
• Заара кубалоочу касиетке ээ.
• Организмден шлактарды, ууларды айдап чыгат.
• Алмуруттун курамындагы А витамини (ретинол) жабыркаган ткандарды калыпка келтирет, теринин катмарларынын абалын, көздүн көрүүсүн жакшыртат.
• С витаминине (аскорбин кычкылы) бай. Бул витамин кан тамырлардын иштөөсүн жакшыртат.
• Курамында К витамини (менадион) бар болгондуктан, ашказан рагынын өөрчүшүнүн алдын алат, сөөктөрдү бекемдейт.
• В9 витамини (фолий кычкылы), кандын айлануусун жакшыртат.
• РР витаминине (ниацин же никотин кычкылы), калийге бай болгондуктан, нерв системине, жүрөккө пайдалуу.
• Алмурут ширеси суусунду кандырып, дене табын өз нормасында кармайт.
  
  ЭСКЕ АЛЫҢЫЗ!
• Алмурут ичти көптүрүшү мүмкүн. Андыктан жаш балдарга берүүдө абайлаңыз.
• Ачкарын же болбосо сүт, суу жана оор тамактар менен чогуу жегенге болбойт. Ашказанда көйгөй жаратышы мүмкүн.
• Ашказан жарасы барлар алмурутту бышырып жегени жакшы.